¿Allin runa kaspaykiqa allinchu kawsakunki?

Ñawpaqmanta kunankamam achka runakuna ninku, allin runa kaspaqa allin kawsakunamanta. Chaynatam Confucio sutiyuq runapas nirqa. Payqa kawsakurqa Jesuspa tiemponmanta ñawpaqtaraqmi 551 watamanta 479 watakama. Paymi nirqa: “Runamasikitaqa amayá imatapas ruwaychu qamta chaynata ruwasunaykita mana munaspaqa”, nispa.a Asia lawpi yachaq runakunaqa achkaqmi kay nisqantaqa allinpaq hapinku.

¿IMATATAQ NINKU ACHKA RUNAKUNA?

Achka runakunam ninku: “Qipakunaman allin kawsakunapaqqa allin runakunam kananchik”, nispanku. Chayraykum runakunaqa kallpanchakunku respetakuq kanankupaq, runamasinkunawan allin kanankupaq, llaqtankupipas allin kanankupaq, allin sunquyuq kanankupaq. Vietnam nacionpi Linh sutiyuq warmipas ninmi: “Ñuqaqa nirqanim mana suwakuspayqa hinaspa chiqap rimaq kaspayqa allin kanaymanta”, nispa.

Chay warmillataqmi mikuyta qarachkan wakchakunaman.

Wakin runakunañataqmi allin kaqkunataqa ruwanku religionninku chayta ruwanankupaq nisqanrayku. Taiwan nacionpi yachaq Hsu-Yun sutiyuq runapas ninmi: “Yachachiwarqakum pipas vidanpi allin runa kaspanqa wañukuspanpas allin kananmanta. Mana allin runa kaspañataq wiña-wiñaypaq ñakarinanmanta”, nispa.

¿IMATATAQ HAYPANKU ALLIN RUNA KASQANKUWAN?

Wasinman kutiruspanmi llakisqallaña, pisipasqallaña wawanta marqallachkan.

Runamasinchikkunapaq allin kaqkunata ruwaspanchikqa allinmi kawsakunchik. Ichaqa wakinpiqa manam chaynachu. Hong Kong llaqtapi Shiu Ping sutiyuq warmipas ninmi: “Hukkunapaq allin kaqkunata ruwaspapas wakinpiqa sasachakuypim tarikunchik. Anchatam kallpanchakurqani familiayta imaymanata yanapanaypaq, imatapas allinta ruwanaypaq, chaywanpas qusayqa ñuqawanqa manam allinchu karqa, wawaytawan ñuqata saqiruwaspankum ripukurqa”, nispa.

Achkaqmi cuentata qukurunku runakunaqa religionman yaykuruspankupas hinalla mana allin ruwaq kasqankuta. Japon nacionpi yachaq Etsuko sutiyuq warmipas ninmi: “Religionman yaykuruspaymi musu-sipaskunata imatapas ruwayta yachanankupaq yanaparqani, ichaqa religionniypi runakunaqa mana allinllatam ruwaqku, manam allinchu kawsakuqku, imamantapas nanachikuyta munasqankuraykum peleaykunaman chayaqku, qullqi churasqaykutapas yanqakunapim gastaqku”, nispa.

“Anchatam kallpanchakurqani familiayta imaymanata yanapanaypaq, imatapas allinta ruwanaypaq, chaywanpas qusayqa ñuqawanqa manam allinchu karqa, wawaytawan ñuqata saqiruwaspankum ripukurqa”, nispa (SHIU PING, HONG KONG).

Wakin religionniyuq runakunaqa ñakakunkum imapas allin ruwasqanku kaqqa yanqapaq kasqanta qawaspanku. Vietnam nacionpi yachaq Van sutiyuq warmipas chaynam tarikurqa. Paymi nin: “Sapa punchawmi wañukuq aylluykunapaq churaq kani, frutakunata, waytakunata, mikuykunata, chaynapi paykuna yanapawananpaq. Ichaqa chayta ruwachkaptiypas qusaymi llumpa-llumpayta unqururqa, wawaypas 20 watallanpiraq kachkaspanmi wañukurqa, payqa huklaw nacionpim estudiachkarqa. Chaywanmi yacharqani achka wata wañukuq aylluykunapaq tukuy ima ruwasqayqa yanqapaq kasqanta”, nispa.

¿ALLIN RUNA KASPALLACHU ALLIN KAWSAKUYTA HAYPACHWAN?

Allin runa kayqa allinmi, ichaqa manam chayllawanqa haypachwanchu allin kawsakuytaqa. ¿Imanasqa? Qawasunyá bibliapi ima nisqanta.

MANAM LLIWCHU ALLIN KAQ RUWAYTAQA MUNANKU

“Huk huchallikuq runaqa achka allinkunatapas pierderachinmanmi” (ECLESIASTES 9:18).

Allin runa kanapaq kallpanchakuspapas wakinkunapa mana allin ruwasqankunawanmi sasachakuyman chayaruchwan. Wakinpiqa mana riqsisqa unquykuna kaptinmi autoridadkuna kamachiwanchik imatapas ruwanapaq. Chaytam wakiqninchikqa kasukunchik. Wakinkum ichaqa mana kasukuspanku munasqankuta ruwanku. Chayna mana kasukusqankuwanmi wakinpiqa paykunapa huchanpi unquruchwan allin runa kachkaspapas.

ACHKAM MANA YACHANKUCHU IMAM ALLIN UTAQ MANA ALLIN KASQANTAQA

“Kanmi allin ñanman rikchakuq ñan. Ichaqa chay ñanpa tukupayninqa wañuyllam” (PROVERBIOS 14:12).

Ñawpaq watakunamantaraqmi runakunaqa imapas ruwasqankutaqa allinpaq hapirqaku ichaqa chaymantam cuentata qukururqaku mana chayna kasqanta. Allin kaqtaña ruwaptinchikpas ñawpaqta mana allin tantiasqanchikkunaqa hinallam sasachawasun.

MANAM YACHANCHIKCHU QIPAKUNAMAN IMA KANANTAQA

“Qamkunaqariki manam yachankichikchu paqarin punchaw imam pasarusunaykichiktaqa” (SANTIAGO 4:14).

Maynaña allin runamanpas qunqayllamantam wañuyqa chayarunman. Chaynam pasarqa kay coronavirus unquy qallaykuptinpas. Achka allin runakunam hukkunata yanapaspanku wañukurqaku. China nacionpi yachaq Liting sutiyuq warmipa papanpas carrokuna chocaruptinmi wañukullarqa. Paymi nin: “Manam imawanpas sunquyta tiyaykachiyta atirqanichu, taytayqa manam mana allin ruwaqchu karqa. Payqa karqa llamkakuq runam, manam hatun tukuq runachu, imatapas chiqaptataqmi rimaq. Llakikuypaqmi karqa chay kutipi paylla wañukusqanqa”, nispa.

Chaynaqa, allin runa kaspanchikpas allin kawsakuytaqa manam haypachwanchu. Chaynaqa, ¿imaynata kawsakuspataq allin kawsakuyta haypachwan? Chaypaqqa necesitanchikmi pipas imapas yachay munasqanchikmanta yachaykachiwananchikta, qipa punchawkunata ima kananmanta willawananchikta. ¿Maypitaq chaykunataqa tarichwan?

a Confucio runapa yachachisqankunamanta astawan yachayta munaspaykiqa, qaway El hombre en busca de Dios niq libropa 7 kaq yachachikuyninta 31 parrafomanta 35 parrafokama. Kaytaqa Jehova Diospa testigonkunam ruwarqa. Kay librotaqa tariwaqtaqmi internetpipas www.pr2711.com nisqanpi.