¿Kanchu imapas qipa punchawkunamanta yachanapaq?

Kaykama leemusqaykiman hinapas, runakunaqa qipa punchawkunata allin kanankupaqmi tukuyta ruwarqaku. Wakinkuqa nirqakum imayna kanankupaq destinasqa kasqankuta, estudioyuq kaspanku allin kanankuta, qullqiyuq kaspanku kusisqa kawsanankuta, allin runa kaspanku allin kawsakuyta haypanankuta. Ichaqa, chaykuna ruwayqa maymanpas chayanapaq mana riqsiq runata tapukuy hinam. Chaywanqa manam nichkanchik hamuq punchawkunata ima kanamanta mana yachayta atisqanchikmantachu.

ÑUQANCHIKMANTA ASWAN YACHAQTA TAPUKUSUN

Imatapas allinta tantianapaqqa yuyayniyuq, yachayniyuq, runatam tapukunchik, chayraykum qipa punchawkunaman allin kawsakuyta munaspaqa ñuqanchikmanta astawan yachayniyuqpa nisqankunata maskananchik. Chayqa kachkan bibliapim. Biblia qillqaytaqa qallaykurqaku 3.500 wata ñawpaqtaraqmi.

¿Imanasqataq mana iskayrayachwanchu bibliamantaqa? Pimantapas aswan yachayniyuqpa palabran kasqanraykum. Payqa ‘wiñaymanta wiñaykamam’ kawsakuchkan (Daniel 7:9; Salmos 90:2). Payqa, ‘cielokuna unanchaq Diosmi, kay pachata unanchaspa takyachiqmi’ (Isaias 45:18). Willawanchiktaqmi sutintapas, paypa sutinqa Jehovam (Salmos 83:18).

Bibliaqa tukuy ima unanchaq Diospa palabranmi. Chayraykum bibliapiqa riman mayqan kastaña kaspanchikpas runakunaqa chaynalla kasqanchikta. Paypa nisqankunaqa allinninchikpaqmi, llapallan nacionpi runakunatam yanapan. Chaymantapas bibliaqa tukuy rikchaq rimaykunamanmi ruwakurqa, chaymi allpantinpi yaqa lliw runakunapa kapun.a Sapa runapa rimayninpi kasqanraykum bibliapi Diospa nisqankunataqa chaylla entiendenku, hinaspankum chaypi Diospa nisqanman hina kawsakunku. Bibliaqariki ninmi:

‘Diosqa mana pimanpas sayapakuqmi, Diosqa chaskinmi lliw nacionkunapi respetaqnin hinaspa allin ruwaq runataqa’, nispa (HECHOS 10:34, 35).

Imaynam kuyakuq taytapas churinkunataqa kuyaspan yanapan, chaynam Jehova Diospas palabranwan yanapawanchik (2 Timoteo 3:16). Jehova Diosqa unanchawaqninchik kasqanraykum yachan ima ñuqanchikpaq aswan allin kasqanta, chayraykum palabranmantaqa mana iskayrayananchikchu.

IMANASQATAQ BIBLIAMANTAQA MANA ISKAYRAYACHWANCHU

Bibliamantaqa manam iskayrayachwanchu, bibliaqariki Diospa palabranmi. Bibliaqa yaqa 2.000 wata ñawpaqtaraqmi nirqaña imakuna pasakunanmanta. Nirqañataqmi runakunapas imayna kanankumanta. Chay nisqanman hinam kunanqa tukuy imapas kachkan.

TUKUY IMAM KANAN KARQA

‘Huk nacionmi peleanqa huklaw nacionwan, chaynataq huk gobiernopas huklaw gobiernowan, kanqam manchakuypaq terremotokuna, kaypi-chaypi unquykuna hinaspa muchuykuna’ (LUCAS 21:10, 11).

RUNAKUNAM KAYNA KANANKU KARQA

“Kikillankupi piensaqkuna, qullqilla kuyaqkuna, alabakuqkuna, hatun tukuqkuna, hukkuna kamiqkuna, tayta-mamanku mana kasukuqkuna, mana agradecekuqkuna, runamasin qipanchaqkuna, ayllunta mana kuyaqkuna, acuerdoman mana yaykuqkuna, runamasinpa contranpi rimaqkuna, mana controlakuqkuna, animal hina kaqkuna, allin kaqta chiqniqkuna, runamasin traicionaqkuna, mana uyarikuqkuna, capaz tukuqkuna hinaspa Diosta kuyanankumantaqa kusirikuykunallataña kuyaqkuna” (2 TIMOTEO 3:1-4).

Kunanqa bibliapa nisqanman hinam imapas kachkan. Chayta qawaspanmi Hong Kong llaqtapi yachaq Leung sutiyuq runapas nirqa: “Tukuy kaykunaqa ñawpaqtaraqmi qillqakurqa, kunanmi ichaqa chayman hina imapas kachkan. Chaymi mana iskayrayanichu Diospa palabranmantaqa”, nispa.

Bibliapi imapas pasakunanmanta nisqanqa cumplikurqam,b chaywanmi yachanchik bibliaqa Diospa palabran kasqanta. Kikin Jehova Diosmi nin: ‘Ñuqaman rikchakuqqa manam pipas kanchu. Hamuq tiempokunapi sucedenanmantam willakuni’, nispa (Isaias 46:9, 10). Chayraykum mana iskayrayananchikchu qipa punchawkunapaq bibliapi Diospa nisqankunamantaqa.

BIBLIAQA YANAPAWACHWANMI KUNANPAS QIPAMANPAS

Bibliapi Jehova Diospa nisqanta kasukuspaykiqa allinmi kawsakunki. Yanapasunkim kaykunapi.

LLAMKAYMANWAN QULLQI MASKAYMAN MANA QUKURUNAYKIPAQ

“Iskay hora llamkanamantaqa huk horata samaykuymi aswan allinqa, llumpayta llamkayqa yanqapaqmi” (ECLESIASTES 4:6).

FAMILIAYKIWAN KUSISQA KAWSAKUNAYKIPAQ

“Kikikichikta hinayá warmikichikta sapakama kuyaychik, warmiñataqyá qusanta anchata respetachun” (EFESIOS 5:33).

HUKKUNAWAN ALLINLLA KANAYKIPAQ

“Amataqyá piñakuychu llumpaytaqa. [...] Amataqyá rabiakuychu sinchitaqa. Llumpaytamá huchallirachisunkiman chaykunaqa” (SALMOS 37:8).

Bibliapi Diospa nisqankunata kasukuspaykiqa kunanpas allinmi kawsakunki, yanapasunkitaqmi hamuq tiempopaqpas. Bibliapim Dios niwanchik hamuq tiempopiqa kusisqaña kawsakunamanta.

HAWKAÑAM, ALLINÑAM KAWSAKUSUNCHIK

‘Kusikuywanmi hawkayaypi kawsakusun’ (SALMOS 37:11).

IMAMANTAPAS MANAM USUSUNCHU

“Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku” (ISAIAS 65:21).

MANAÑAM UNQUSUNÑACHU NITAQ WAÑUSUNÑACHU

“Manañam kanqachu wañuypas, llakikuypas, waqaypas nitaq nanaypas” (APOCALIPSIS 21:4).

¿Imaynatam chay kawsakuyta haypawaq? Qatiqnin yachachikuypim chaymanta yachasunchik.

a Bibliata ima rimaykunaman ruwasqankumantawan imayna aypusqankumanta astawan yachayta munaspaqa internetpi maskay www.jw.org nisqanpi BIBLIAMANTA YACHACHIKUYKUNA > BIBLIAWAN WILLAKUYKUNA.

b Kaymanta astawan yachayta munaspaykiqa qaway La Biblia... ¿la Palabra de Dios, o palabra del hombre? niq libropa 9 kaq yachachikuyninta. Chay libroqa Jehova Diospa testigonkunapa ruwasqanmi. Maskawaqmi internetpi www.jw.org nisqanpi QILLQAKUNA > HUK QILLQAKUNA.