¿Yacharqankichu?

¿Ima impuestokunatam Jesuspa tiemponpi runakuna pagaqku?

ÑAWPAQ tiempomantaraqmi Israel runakunaqa qullqita quqku Jehova Diosta yupaychayninkupi. Jesuspa tiemponpim ichaqa achka impuestokunataña pagaqku, chayqa paykunapaqqa llumpay sasamá karqa.

Llapallan judiokunam impuestota pagaqku Diospa carpanpaq, chaymantañataq templopaq. Chay qusqanku qullqitaqa servichikuqku templopaq imatapas ruwanankupaqmi. Chay impuesto quymanta Jesus ima piensasqanta yachanankupaqmi wakin judiokuna Pedrota tapurqaku. Jesusqa manam nirqachu chay impuestota mana paganankupaqqa, aswanqa Pedrotam nirqa pagaq rinanpaq (Mat. 17:24-27).

Chaymantapas, chay tiempopi Diosta yupaychaqkunaqa diezmotam qunanku karqa cosechasqankumanta hinaspa qullqinkumanta wakinta (Lev. 27:30-32; Num. 18:26-28). Religionpi punta apaqkunaqa runakunatam hikutaqku chakrankupi lliw tarpusqankumanta qunankupaq. Nirqakutaqmi eneldomanta, cominomanta hinaspa mentamanta wakinta qunankupaqpas. Jesusqa manam nirqachu chaykunamanta wakinta quyninku mana allin kasqantaqa. Payqa fariseokunapaqwan escribakunapaqmi piñakurqa iskay uya kaspanku chaykunamanta mañakusqankurayku (Mat. 23:23).

Chaymantapas, judiokunaqa Roma nacionta kamachiqmanmi impuestota pagananku karqa chakrankumanta. Chaytaqa pagaqku wakinkum qullqiwan, wakinkuñataq tarpukusqankuwan. Kamachiqqa sapa runamantapas sapaq impuestotataqmi mañaq. Chaymi fariseokuna Jesusta tapurqaku: “¿Allinchu kanman Roma nacionta kamachiqman kay impuesto pagayninchik?”, nispanku. Jesusñataqmi nirqa: “Roma nacionpi kamachiqpa kaqtaqa paymanyá quychik, Diospaq kaqtañataq Diosman quychik”, nispan (Mat. 22:15-22).

Impuestotaqa mañaqkutaqmi rantikunankupaq huklawmanta imata apamuptinkupas chaynataq huklawman apaptinkupas. Chaytaqa mañaqku mercado punkupi, chakapa kasqanpi hinaspa llaqtaman yaykunapim.

Chay mañakusqankuta pagayqa llapallan llaqta runapaqmi llumpay sasa karqa. Tacito sutiyuq runapas willakunmi Siria hinaspa Judea llaqtayuqkuna impuestota manaña llumpayta paganankupaq Roma nacionpi kamachiqta mañakusqankumanta.

Pipas kamachiqman achka qullqita quqmi impuestotaqa mañaq. Chaymi paykunaqa munasqankuman hina mañaqku. Huk runakunatapas contrataqkum mañanankupaq, paykunapas hina chaynallatam ruwaqku. Saqueo sutiyuq apu runapas impuestokunata mañaqpa jefenmi karqa (Luc. 19:1, 2). Chayraykum runakunaqa impuesto mañaqkunata llumpayta chiqniqku.