1921: Pachak wata ñawpaqta

1921 watapi enero killapa qallariynin punchawpi ingles rimaypi lluqsimuq Willakuq qillqapim iñiqmasinchikkunapaq kaynata nirqa: “¿Imatataq kay wata imamantapas astawan ruwasunchik?” nispa. Hina chay Willakuq qillqapim Isaias 61:1, 2 nisqanman hina Diosmanta willakunankupaq yuyarichirqa, chaypim nin: “Wakchakunaman allin noticiata willakunaypaqmi sapaqchawarqa [...], chaynapi tayta Diospa agradonpaq watamanta willakunaypaq, chaynapi yupaychasqanchik Diospa vengakunan punchawmanta willakunaypaq”, nispa.

MANA MANCHAKUSPA WILLAKUQKUNA

Isaiaspa nisqanta cumplinankupaqqa mana manchakuqmi kananku karqa iñiqmasinchikkunaqa. Manam ‘allin noticiallamantachu willakunanku’ karqa, aswanqa mana allin runakunata ‘Diospa vengakunan punchawmantawanmi’.

Canada nacionniyuq John Hoskin sutiyuq iñiqmasinchikmi harkakuptinkupas Diosmanta mana manchakuspa willakurqa. 1921 wata qallariytam metodista religionniyuq pastorwan rimayta munaspan kaynata nirqa: “Mana iguallata piensaspanchikpas bibliamantayá hawkalla parlakusun, hinaspayá amistad hina kusisqa despediykanakusun”, nispa. Ichaqa manamá chaynachu karqa. Iñiqmasinchik Johnmi willakun: “Chayllaraq rimayta qallarichkaptiykum chay pastorqa piñakuywan punkunta wichqaramuptin vidrionkunapas yaqachalla pakikururqa”, nispa.

Chay pastormi piñakuspan nirqa: “Diospi mana iñiqkunamanyá willakamuy”, nispa. Iñiqmasinchik Johnqa upallakuykurqam. Ichaqa pasakuchkaspanñam sunqullanpi nikurqa: “¡Diospi mana iñiq runawanchiki rimachkani nirqanim ñuqaqa!”, nispa.

Paqarintinpas chay pastorqa runakunata huñuruspanmi yachachisqa. Chaymantam John nin: “Iglesianpi kaqkunamanmi nirusqa ñuqaqa pantay yachachiq kasqayta hinaspa wañurachiwanankupaq hina kasqayta”, nispa. Chaywanpas payqa mana hukmanyaspanmi hinalla achka runakunaman Diosmanta willakurqa. Kikinmi nin: “Manam haykapipas chayna kusisqaqa Diosmanta willakuspayqa karqanichu. Wakin runakunaqa niwarqaraqmi: ‘Yachanikum Diospa runan kasqaykita’, nispa. Chaynata niwaspankum imallapipas yanapaykuwanankupaq tapuykuwarqa”, nispa.

SAPALLANKU HINASPA FAMILIANKUWAN DIOSTA YUPAYCHASQANKU

Iñiqmasinchikkunapa ingles rimaypi ruwasqanku Luz y Verdad sutiyuq qillqapim musu-sipaskunapaq yachachikuykuna karqa.a Chay yachachikuykunapim achka tapukuykuna karqa tayta-mamakuna bibliawan churi-wawankuta yanapanankupaq. Wakin tapukuykunam karqa: ¿Hayka libroyuqtaq bibliaqa? ¿Diospa chiqap serviqninkunaqa runakunapa chiqnisqanchu kananku? niq. Chaykunawanmi musu-sipaskunata yanapaqku Diosmanta mana manchakuspa willakunankupaq.

Estudios avanzados sobre el Plan Divino de las Edades nisqa yachachikuyñataqmi Diosmanta allintaña yachaq iñiqmasinchikkunata yanaparqa. Chay yachachikuymi hurqusqa karqa Estudios de las Escrituras sutiyuq qillqamanta. Chayqa waranqantin iñiqmasinchikkunatam yanaparqa. Ichaqa 1921 watapim diciembre killapa 21 punchawninpi ingles rimaypi lluqsimuq Luz y Verdad qillqapi nirqa chay yachachikuykuna manaña kananmanta. ¿Imanasqataq manaña lluqsimunanchu karqa?

MUSUQ QILLQATA RUWASQANKUMANTA

Ingles rimaypi *El Arpa de Dios* sutiyuq libro.

Libropa mayqin partenkuna leenankuta marcanapaq.

Tapukuyniyuq tarjetachakuna.

Punta apaqkunam tantiarurqaku iñiqmasinchikkuna Diosmanta ordenninpi yachanankupaq. Chaypaqmi 1921 watapa noviembre killanpi ruwarurqaku ingles rimaypi El Arpa de Dios sutiyuq qillqata. Diosmanta yachay munaq runamasinchikkunatam chay librowan yachachiqku. Chay qillqawanmi runamasinchikkunaqa entiendeqku hamuq tiempopi runakuna wiñay kawsayta chaskinankupaq Dios imakuna ruwasqanmanta. ¿Imaynatam chay qillqawan yachachiqku?

Pipas chay librota munaspanqa huk tarjetachatawanmi chaskikuq, chay tarjetachapim niq chay semanapi ima paginakunata leenanpaq. Qatiqnin semanatañataqmi chay leesqanmanta achka tapukuykunata contestananpaq huk tarjetachata chaskiq, chay tarjetachapa tukuyninpiñataqmi nirqa qatiqnin semanapi imakunata leenanpaqpas.

Yaqa kimsa killam iñiqmasinchikkunaqa tarjetachakunata sapa semana apachiqku Diosmanta yachaq runamasinchikkunaman. Chay tarjetachakunataqa apachiqku yuyaq chaynataq wasin-wasin Diosmanta willakuq riyta mana atiq iñiqmasinchikkunam. Anna Gardner sutiyuq iñiqmasinchikmi kaynata willakun: “Thayle sutiyuq ñañaymi silla ruedapi kasqanrayku runakunaman Diosmanta yachachinanpaq kay tarjetachakunata sapa semana apachiq”, nispa. 12 semana chayna tarjetachakunawan yanaparuptinmi huk iñiqmasinchikkunaña riqku bibliamanta hinalla yachachinankupaq.

Iñiqmasinchik Thayle Gardnermi silla ruedanpi kachkan.

“ACHKAMANRAQMI YACHACHINANCHIK KACHKAN”

1921 wata tukuytam iñiqmasinchik Joseph Rutherford lliw iñiqkunaman cartata apachirqa, chay cartapim nirqa: “Ñawpaq watakunamantaqa kunan watam runamasinchikkunataqa astawanraq yanaparqanchik Diosman asuykunankupaq”, nispa. Nirqaraqmi: “Achkamanraqmi yachachinanchik kachkan, chaypaqyá hukkunatapas kallpanchasun”, nispa. Chayna nisqantam iñiqmasinchikkunaqa kasukurqaku, chaymi 1922 watapipas mana manchakuspanku hinalla Diosmanta willakurqaku.

Allin amigokuna

Iñiqmasinchikkunaqa anchata kuyanakusqankuraykum yanapanakurqaku. Paykunaqa sasachakuy tiempopipas mana manchakuspankum yanapanakurqaku (Prov. 17:17).

1921 watapim mayo killapa 31 punchawninpi Estados Unidos lawpi yana runata carcelman yanqamanta hinarurqaku. Carcelarurqakuqa “yuraq warmita maqaspam wañurachiyta munarqa” nispankum, chay tiempopiqa yuraq runakunam yana runakunata chiqniqku. Chaypim waranqa masnin yuraq runakuna aslla yana runakunata maqayta qallaykurqaku. Yana runamasinchikkunapa yachasqanman chayaruspankuñataqmi 1400 masnin wasikunatawan negociokunata tukuyta ruwarurqaku. Chay maqanakusqankupi 36 runakuna wañusqantam nirqaku. Chaywanpas, yaqachusmi pachaknintin runakuna wañurqakuqa.

Chaylawpi yachaq Richard Hill sutiyuq yana iñiqmasinchikmi kaynata willakurqa: “Chay peleasqanku tutam bibliata estudiaspayku huñunakuypi karqaniku, huñunakuy tukuytam balakunapa tuqyasqanta uyarirurqaniku. Camaykuman yaykuspaykupas hinallaraqmi chaytaqa uyarirqaniku”, nispa. Paqarintinpaqqa astawanraqmi kakurqa. Iñiqmasinchik Richardmi willakurqa: “Wakin runamasinchikkunam hamuruspanku niwarqaku allinlla kanaykupaqqa casa comunalman kamaslla rinaykupaq”, nispa. Hinaptinmi iñiqmasinchik Richardqa warminpiwan hinaspa pichqa churinkunapiwan chayman pasakurqaku. Chay wasipim guardiakuna chaskiykurqaku kimsa waranqa masnin yana runamasinchikkunata.

Chay pasasqanmantam Arthur Claus sutiyuq yuraq iñiqmasinchik yacharurqa. Paymi kaynata nirqa: “Yana runamasinchikkunapa wasin kañasqankuta hinaspa tukuy ima ruwasqankuta yacharuspaymi amigoy Richardta watukuq rirqani”, nispa.

Arthur Claus sutiyuq iñiqmasinchikmi 14 warmachakunata yachachirqa El Arpa de Dios librowan.

Richardpa wasinman chayaruptinmi vecinon yuraq runa balearuyta munarqa, payqa Richardpa amigonmi kasqa. Wasin kañaq risqantam piensarqa, chaymi piñakuspan nirqa: “¡Imatam chaypi ruwanki!”, nispa.

Arthurmi willakurqa: “Chaynata niwaptinmi nirqani: ‘Richardwanmi unayña riqsinakuni, hinaspapas achka kutikaman wasinpi karqani’, nispay. Mana chaynata niptiyqa wañurachiwanmanmi karqa”, nispa. Arthurwan Richardpa vecinonqa chay wasitam allinta cuidarqaku mana pipas yaykurunanpaq.

Iñiqmasinchik Arthurmanmi willaykurqaku Richardqa familianpiwan casa comunalpi kasqankuta. Huk runam Arthurta nirqa guardiakunapa kamachiqnin Barret sutiyuqwan papelta firmachispallanku yana runakuna chaymanta lluqsimunankuta. Arthurmi willakurqa: “Chay kamachiqta tariruspaymi Richardta hurqunaypaq nirqani, hinaptinmi payñataq niwarqa: ‘¿Atinkichu llapan familia cuidayta?’ nispa. Chaynata niwaptinmi nirqani ‘arí atisaqmi’”, nispa.

Papelta firmaruptinmi Arthurqa casa comunalman utqayllamanña pasarqa. Chayaruptinmi huk guardia chay papelta qawarqa, hinaspam kamachiqninpa firmasqanta qawaykuspan admirakurqaraq. Paymi nirqa: “Qamllaraqmi kunan punchawqa runakunata pusaqqa hamurunki”, nispa. Arthurqa iñiqmasinchik Richardtawan familianta tariruspanmi carronpi aparqa paykunapa wasinman.

Arthurqa Richardtawan familiantam allinta yanaparqa. Yanapasqanta qawaspankum huk runakunapas anchata admirakurqaku. Arthurmi willakurqa: “Wasita cuidaysiwaqniy Richardpa vecinonqa Jehova Diospa testigonkunatam astawanraq respetawarqaku. Achka runamasinchikkunataqmi Diosmanta willakusqaykuta uyariyta qallaykurqaku testigokunaqa yanapas yuraqpas mana chiqninakusqaykuta qawaspanku”, nispa.

a Luz y verdad sutiyuq qillqam castellano rimaypi lluqsimurqa 1932 watapi. 1938 watapim Consolación nisqa sutin karqa. 1947 watapiñataqmi ¡Despertad! nisqa.