¿IMATAQ YANAPAWACHWAN MANAÑA CHIQNINAKUNAPAQ?
3 | Sunqunchikmantayá chiqnikuyta hurqusun
Bibliapim nin:
“Amayá kay tiempopi runakunapa imayna kawsasqankutaqa qatipakuychikchu, aswanqa yuyaynikichikta musuqyachispayá imayna kawsasqaykichikta tikraychik, chaynapim allintapuni yachankichik Diospa munayninta, Diospa munayninqa allinpunim, mana pantaqmi hinaspapas munasqanman hinam”, nispa (ROMANOS 12:2).
¿Imatam yachachwan?
Jehova Diosqa yachanmi imapas piensasqanchiktaqa (Jeremias 17:10). Chaymantapas piensasqanchikman hinam imatapas ruwanchik. Chayraykum umanchikpi hinaspa sunqunchikpi mana allin piensaykuna kaptinqa chaylla hurqunanchikpaq kallpanchakunanchik. Chaynata ruwaspaqa manaña chiqninakuspam hawkaña kawsakusun.
Kaypaqyá kallpanchakuy:
Runakuna maymantaña kaptinkupas ama chiqnikuq kanaykipaq kallpanchakuy hinaspa nikuy: “¿Imanaruwasqanraykutaq runamasiytaqa chiqnini, icha hukkuna chiqnisqankuraykuchu chiqnini?”, nispa. Chaymantapas internetpi utaq televisionpi chiqninakuymanta peliculakunata manaña qawanaykipaqyá kallpanchakuy.
Bibliapi yachachikuykunaqa yanapawachwanmi manaña chiqnikuq kanapaq
Wakinpiqa manam musyakuchwanchu chiqnikuq kasqanchikmantaqa. Chaymi cuentata qukunanchikpaq biblia yanapawanchik. Bibliaqa runapa “piensasqankunatawan sunqunpa munapayasqankunatam riqsichin” (Hebreos 4:12). Chaynaqa bibliapi yachachikuykunaman hinayá piensay, hinaspapas chayman hina ruwanaykipaqyá kallpanchakuy. Diospa palabranqa ‘allin takyasqa kaqkunata tuñichiqmi’, chaymi yanapawasun umanchikmanta hinaspa sunqunchikmanta chiqnikuyta chinkachinapaq (2 Corintios 10:4, 5).