¿IMATAQ YANAPAWACHWAN MANAÑA CHIQNINAKUNAPAQ?

4 | Dioswanyá yanapachikusun

Bibliapim nin:

“Chuya espirituqa runakunatam kawsachin: Kuyakuqta, kusisqata, hawkallata, pacienciakuqta, sumaq sunquyuqta, kuyapayakuqta, iñiyniyuqta, llampu sunqullata hinaspa controlakuqta”, nispa (GALATAS 5:22, 23).

¿Imatam yachachwan?

Diospa yanapakuynillanwanmi atichwan manaña chiqnikuq kaytaqa, sumaq sunquyuq kaytaqa. Chaypaqmi yanapawachwan Diospa chuya espiritun. Kikillanchikmantaqa manam atichwanchu chiqnikuq kayninchikta saqiruytaqa. Dios yanapawaptinchikqa apostol Pablo hinam nisun. Paymi nirqa: “Dios kallpata quwaptinmi tukuy imata ruwanaypaq kallpayuq kani”, nispa (Filipenses 4:13). Chaymantapas nisunraqmi: ‘Yanapakuyqa hamullawanqa tayta Diosmantam’, nispa (Salmos 121:2).

Kaypaqyá kallpanchakuy:

“Pasaq watakunapiqa maqakuq runam karqani, Jehova Dios yanapaykuwaptinmi kunanqa hawkaña kawsakuni” (WALDO).

Tukuy sunquykiwan Jehova Diosta mañakuy atiyninwan yanapasunaykipaq, chaynapi sumaq sunquyuq kanaykipaq (Lucas 11:13). Kuyakuq, hawkalla, pacienciakuq, controlakuq kaspaqa atichwanmi chiqnikuq kayninchikta atipaytaqa. Bibliapi chayna nisqankunata kasukunaykipaq kallpanchakuy. Chaymantapas hukllawakuytaqyá pacienciakuq, Diosta kasukuq, kuyakuq, runakunawan. Paykunaqa yanapasunkim allin kaqkunata ruwanaykipaq (Hebreos 10:24).

Vidanmanta willakusqan (WALDO)

Chiqnikuq, maqakuq kaynintam saqirurqa

Waldoqa warmacha kasqanmantam sasachakuypi kaspan chiqnikuqllaña karqa. Paymi nin: “Drogata rantikuq runakunawanmi sapa kutilla maqanakuq kaniku. Huk kutipim drogata rantikuq runaqa huk runata contratarusqa wañuchiwananpaq. Hinaptinmi chay runaqa cuchillowan tuksiruwarqa, ichaqa lluptikururqanim”, nispa.

Jehova Diospa testigonkunawan warmichan bibliata estudiayta qallaykuptinqa llumpaytam Waldoqa piñakurqa. Paymi nin: “Ñuqaqa testigokunataqa llumpaytam chiqniq kani. Chaymi sapa kutilla kamiq kani, ichaqa paykunaqa manam kutipakuqkuchu, sumaq simillankuwanmi rimapayawarqaku”, nispa.

Tiempo pasasqanman hinam Waldopas bibliata estudiayta qallaykurqa. Paymi nin: “Bibliapi yachachikuykunata kasukuyniyqa sasam karqa. Piensarqanim ‘manapaschá atisaqchu genioy cambiaytaqa’”, nispay. Ichaqa bibliapi hukkaqnin textom Waldopa sunqunman chayarurqa.

Paymi nin: “Bibliamanta yachachiwaqniy Alejandrom niwarqa Galatas 5:22, 23 nisqanta leenaypaq, hinaspam niwarqa Diospa yanapakuyninwanqa bibliapi nisqanman hina kawsakuyta atinaymanta. Chayqa anchatam kallpanchawarqa”, nispa.

Waldoqa Dios yanapaptinmi chiqnikuq kayninta saqirurqa. Paymi nin: “Familiaykunawan amistadniykunam anchata admirakurqaku imayna kayniyta cambiarusqaywan”, nispa. Chaymantapas ninmi: “Pasaq watakunapiqa maqakuq runam karqani, Jehova Dios yanapaykuwaptinmi kunanqa hawkaña kawsakuni”, nispa.