Achka runakunam yuyayninkupi mana allin tarikuchkanku
Huk runam nin: “Sapa kutim yanqapas-yanqa mancharisqallaña utaq preocupasqallaña kani, huk rimaypiqa ansiedadwanmi kani”, nispa.
Huk runapas ninmi: “Allin kachkaspaypas preocupakuytam qallaykuni. Musyakuniñam kusisqa kaspayqa qunqaymanta llakisqa tarikunayta”, nispa.
Huk runañataqmi nin: “Kallpanchakunim hamuq punchawkunamanta mana preocupakunaypaq, chaywanpas qunqayllamantam preocupakuyta qallaykuni”, nispa.
Chaynataqa ninku yuyayninkupi mana allin tarikuqkunam (problema de salud mental). ¿Yaqachu qampas chayna tarikurqanki, utaq riqsinkichu pitapas chayna tarikuqta?
Manam qamllachu chaynaqa tarikunki, enteron pachapim achka runakuna chayna tarikunku utaq mayqin familiankupas chay unquywan ñakarillachkanku.
‘Tukupay punchawpi’ kawsakusqanchikraykum imamantapas hukmanyasun utaq llakikusun (2 Timoteo 3:1). Organizacion Mundial de la Salud nisqanman hinaqa pusaq runakunamantas huk runa yuyayninpi mana allin tarikun. Kay 2020 watapim coronavirus unquy kasqanrayku ansiedadwan aswan achka runakuna unqurqaku (26 % nisqam yapakururqa), aswan achka runataqmi llumpay llakisqallaña utaq depresionwan karqaku (28 % nisqam yapakururqa).
Ichaqa manam hayka unqusqankumanta yachaytachu munachkanchikqa, aswanqa familianchik hawka kananpaq ima ruwanamantam.
¿Imaynataq pipas yuyayninpi allin tarikuqqa?
Pipapas yuyaynin allin kaptinqa kallpanpas chaynataq ganasninpas kanmi. Ima ruwaynintapas chayllam ruwarun, mana sasachakuspallam ima sasachakuytapas atipan. Allintataqmi llamkakunpas, kusisqataqmi kawsakunpas.
Yuyayninkupi mana allin tarikuqkunamanta
Yuyayninkupi mana allin tarikuqkunaqa MANAM mana kallpayuq utaq debil kasqanraykuchu chaynaqa tarikunku.
CHAYQA hukkaqnin unquy hinam, chaywan unquqkunaqa llumpay llakisqam tarikunku, pensamientonkupipas manam allinchu tarikunku, manataqmi imayna tarikusqankutapas controlayta atinkuchu.
Wakinpiqa manam munankuchu hukkunawan hukllawakuyta, ima ruwayninkupipas sasachakunkum.
Kay unquyqa aputapas, wakchatapas, warmatapas chaynataq machu-payatapas hapiruwachwanmi.
Yanapakuyta maskay
Wakinpiqa qunqayllamantam pipas mana mikuyta munanchu, mana puñuyta atinchu, qunqaymantataqmi imayna kasqanpas chaylla cambiarun. Wakinpiqa hukmanyasqallaña utaq llakisqallañam tarikun. Pipas chayna tarikuspanqa doctormanmi rinan kanqa, chaynapi ima kasqanta yachananpaq hinaspa yanapachikunanpaq. Ichaqa ¿maypitaq yanapakuyta tarichwan?
Aswan yachayniyuq hinaspa allin yuyayniyuq señorninchik Jesucristom nirqa: “Sano runakunaqa manam necesitanchu doctortaqa, unquqkunam ichaqa necesitanku”, nispa (Mateo 9:12). Doctorkunapa yanapakuyninwanqa atiwaqmi allinyayta. Chaymi kay unquywan kasqaykimanta cuentata qukuspaykiqa chaylla doctorkunapa yanapakuyninta maskanayki.a
Bibliaqa manam doctorkunapa libron hinachu, chaywanpas nisqankunaqa hawka kananchikpaqmi yanapawachwan. Qatiqnin yachachikuykunam sumaqta yachachiwasun unquptinchik bibliapa nisqankuna yanapawananchikmanta. Kallpanchaykikum leenaykipaq.
a Willakuq qillqapiqa manam tarisunchu ima hampita tomaspa allinyanamantaqa. Sapakamam tantiakunanchik imaynata hampichikunapaqqa.