4 | Allinninchikpaq bibliapi yachachikuykunamanta

¿Ima ninantaq bibliapi chayna nisqanqa?

Bibliaqa manam hampikunamanta rimaq librochu, chaywanpas nisqankunaqa ancha allinmi depresionwan, ansiedadwan utaq chayman rikchakuq unquykunawan kaqkunata yanapananpaq. Qatiqninpiyá yachaykusun bibliapa nisqankuna imayna yanapawasqanchikmanta.

¿Imaynatam yanapawanchik?

MATEO 9:12 nisqanpim nin: “Sano runakunaqa manam necesitanchu doctortaqa, unquqkunam ichaqa necesitanku”, nispa.

Bibliata leespam yachanchik unquspaqa doctorman riy allin kasqanta. Achka runakunam doctorman risqanku qipata allinña sientekusqankumanta ninku.

1 TIMOTEO 4:8 nisqanpim nin: “Cuerponchikwan ejercicio ruwayqa cuerponchikpaqmi allin”, nispa.

Ejerciciota ruwanapaq tiempochakuyninchik hinaspa kallpanchakuyninchikqa ancha allinmi. Ancha allintaqmi allinta mikuypas chaynataq horallanpi puñuypas. Chaykunata ruwaspaqa allinmi yuyayninchikpi tarikusun.

PROVERBIOS 17:22 nisqanpim nin: “Kusisqa sunquyuq kayqa allin hampi hinam, llumpay llakisqa kaymi ichaqa tullupi unquy hina llumpayta hukmanyachikun”, nispa.

Bibliapi sumaq yachachikuykunata leeymi hinaspa imakuna ruway atisqanchikpi piensaymi yanapawasun kusisqa kawsakunapaq. Allin kaqkunallapi astawan piensaspaqa atipasunmi imapas llakichiwaqninchikkunataqa.

PROVERBIOS 11:2 (willakuy) nisqanpim nin: ‘Mana ruway atisqanta riqsikuq runaqa yachayniyuqmi’, nispa.

Wakinpiqa yaqapaschá hukkuna imapipas yanapasunaykita necesitanki, chayna kaptinqa chay yanapakuytayá kusisqa chaskikuy. Yaqapaschá kuyasqayki familiayki utaq amistadniki yanapaykuyta munasuchkanki, ichaqa manapaschá yachankuchu imayna yanapaykuyta, chayraykuyá imaynata yanapasunaykipaq niykuy, ichaqa kuyakuyllawanmi niykunaykiqa, agradecekuqtaqmi kanaykipas.

¿Imaynatam bibliapa nisqankunaqa unquq runakunata yanapan?

Trastorno bipolar nisqa unquywan unquq Nicolea sutiyuq warmim nin: “Sunquypim mana allin tarikurqani, chaymi doctorman rirqani. Doctoram niwarqa imanasqa hukman tarikusqayta, chaymi yanapawarqa imawan unqusqayta entiendenaypaq. Doctoraqa niwarqataqmi imaynata hampikunaymantapas”, nispa.

Depresionwan unquq Peter sutiyuq runam nin: “Warmichaywan sapa punchaw biblia leesqaykum anchata yanapawan. Sapa temprano leesqaykum yanapawan allin kaqkunapi piensanaypaq hinaspa kallpanchasqa tarikunaypaq. Astawanraqmi yanapawan llumpay llakisqa hinaspa hukmanyasqa tarikuchkaptiy, chay punchawraqmi kallpanchawaqniy yachachikuykunata tariruni”, nispa.

Trastorno alimentario niqwan unquq Ji-yoo sutiyuq warmim nin: “Qallariyllapiqa pinqakuqmi kani ima unquywan unqusqaymanta willakuytaqa. Ichaqa huknin amistadniymi ama hukmanyarunaypaq kuyakuyllawan yanapaykuwarqa, chaymi cuentata qukurqani mana sapallay kasqayta”, nispa.

Trastorno obsesivo-compulsivo niqwan unquq Timothy sutiyuq runam nin: “Bibliapa nisqankuna yanapawasqanraykum allintaña puñunaypaq kallpanchakuni, kallpanchakunitaqmi ama llamkayllamanña qukurunaypaqpas. Bibliapa nisqankunaqa yanapawantaqmi yuyayniypi allin tarikunaypaqpas”, nispa.