¿Imaynatam yachachwan mañakusqanchikta Dios uyariwasqanchikta?

1, 2. ¿Imatam wakinpiqa piensayta qallaykuchwan?

¿HAYKALLAPIPAS piensarqankichu: “Mañakusqayta Dios uyariwachkanchu imaynaya”, nispa? Manam qamllachu chaynataqa nikurqanki. Achka iñiqmasinchikkunapas chaynatam nikurqaku, astawanraqmi sasachakuypi tarikuspankuqa. Imawanpas ñakarispaqa ñuqanchikpas iskayrayachwanmi mañakusqanchikta Dios uyariwasqanchikmanta.

² Kunanmi yuyarichkasunchik serviqninkunapa mañakusqanchikta Diosqa uyariwasqanchikmanta imanasqa mana iskayrayanamanta (1 Juan 5:15). Yachasuntaqmi kay tapukuykunamantapas: ¿Imaynanpitaq wakinpiqa piensayta qallaykuchwan mañakusqanchikta Dios mana uyariwasqanchikta? Ichaqa, ¿imaynatam yachachwan mañakusqanchikta Dios uyariwasqanchikta?

WAKINPIQA DIOSQA MANAM MUNASQANCHIKMAN HINACHU YANAPAWASUN

3. ¿Imanasqataq Jehova Diosqa munan mañakunanchikta?

³ Bibliapim niwanchik Jehova Diosninchikqa ancha-anchata kuyawasqanchikta chaynataq paypaqqa ancha valorniyuq kasqanchikta (Ageo 2:7; 1 Juan 4:10). Chayraykum munan yanapawananchikpaq mañakunata (1 Ped. 5:6, 7). Hinaspapas paymanta mana karunchakunapaqmi llapanchik yanapayta munan chaynapi ima sasachakuyninchiktapas aguantanapaq.

4. ¿Imaynatam yachanchik Jehova Diosqa serviqninkunapa mañakusqanta uyariykamusqanta? (Qawaytaq dibujotapas).

⁴ Bibliapim willawanchik ñawpaq tiempopi serviqninkunapa mañakusqanta Diosqa uyariykusqanmanta. Davidmanta rimaykusunchik. Payqa tukuy ima sasachakuypim tarikurqa, enemigonkunapa qatikachasqanmi karqa. Chaymi sapa kuti Diosta mañakullaq yanapaykunanpaq. Huk kutipim kaynata mañakurqa: “Jehova Dioslláy mañakamusqaytayá uyariykullaway, yanapaykuwanaykipaq qayakamusqaytayá uyariykullaway, nisqaykiman hina ruwaq kasqaykiraykuyá uyariykullaway, allin ruwaq kasqaykiraykuyá uyariykullaway”, nispa (Sal. 143:1). Jehova Diosqa uyariykurqamá, hinaspam enemigonkunamanta libraykurqa (1 Sam. 19:10, 18-20; 2 Sam. 5:17-25). Chaymi Davidqa mana iskayrayaspan nirqa: “Jehova Diosqa qayakuqninkunapa hichpallanpim kachkan”, nispa. Ñuqanchikpas David hinam mana iskayrayananchikchu mañakusqanchikta Dios uyariwasqanchikmanta (Sal. 145:18).

5. ¿Jehova Diosqa munasqankuman hinapunichu serviqninkunata yanapaykurqa? Rimarimuy apostol Pablomanta. (Qawaytaq dibujotapas).

⁵ Jehova Diosqa wakinpiqa manapaschá munasqanchikman hinachu yanapawasun. Chaynam pasarqa apostol Pablotapas. Paypam karqa ‘tipaqnin kichka’ hina hatun sasachakuynin, chaymi kimsa kutikama Diosta mañakullarqa yanapaykunanpaq. ¿Jehova Diosqa uyariykurqachu? Arí, ichaqa manam Pablopa munasqanman hinachu yanapaykurqa. Sasachakuyninta chinkachinanmantaqa kallpatam qurqa tukuy sunqunwan hinalla servinanpaq (2 Cor. 12:7-10).

6. ¿Imanasqataq wakinpiqa mana munasqanchikman hinachu Diosqa yanapawasun?

⁶ Wakinpiqa ñuqanchiktapas Diosninchikqa manapaschá munasqanchikman hinachu yanapawasun. Ichaqa, amayá iskayrayasunchu ñuqanchikpaq imam allin kasqanta Dios aswan allinta yachasqanmantaqa. Payqa ‘mañakusqanchikmantapas hinaspa piensasqanchikmantapas aswan mastaraqmi’ ruwapuwanchikman (Efes. 3:20). Chaymi Diosqa tiempollanpi yanapaykuwasun utaq mañakusqanchikmantapas aswan sumaqtaraq yanapaykuwasun.

7. ¿Imanasqataq wakinpiqa Jehova Diosta imam mañakusqanchikta cambiananchik kanqa? Rimarimuy iñiqmasinchik Martinmanta.

⁷ Wakinpiqa Jehova Diospa munayninta sumaqta entienderuspam imam mañakusqanchikta cambiananchik kanqa. Chaytam ruwarqa iñiqmasinchik Martin Poetzinger. Paytaqa casarakurusqan qipallatam Alemania nacionpi carcelman aparurqaku. Iñiqmasinchik Martinqa Jehova Diostam mañakullarqa carcelmanta hurqunanpaq, chaynapi señoranwan kuska kananpaq hinaspa hinalla Diosmanta willakunankupaq. Ichaqa iskay semana pasaytapas hinallaraqmi carcelpi karqa. Chaywanmi cuentata qukurqa Jehova Diosqa carcelmanta mana hurqunanta. Chaymi iñiqmasinchik Martinqa kaynataña Diosta mañakurqa: “Taytalláy Jehova, ama hina kaspa yanapaykullaway ima munasqaykita cuentata qukunaypaq”, nispa. Chaymantam iñiqmasinchik Martinqa chay carcelpi iñiqmasinkuna imakunawan sasachakusqankupi piensayta qallaykurqa. Chay carcelpi kaq iñiqmasinchikkunam señorankumantawan churinkumanta llumpay llakisqa kachkarqaku. Chaymi iñiqmasinchik Martinqa Jehova Diosta kaynataña mañakurqa: “Gracias taytalláy kaypi kasqaymanta. Ama hina kaspa, yanapaykullaway iñiqmasiykunata kallpanchaykunaypaq”, nispa. Chaytamá iñiqmasinchikqa ruwarqa isqun wata carcelpi kaspanqa.

8. ¿Imatam yuyarinanchik Diosta mañakuspanchikqa?

⁸ Yuyarinanchikmi Jehova Diosqa ñuqanchikpaq munasqanta tiempollanpi cumplinanmanta. Arí, Jehova Diosqa wiñaypaqmi chinkachinqa imapas ñakarichiwaqninchikkunata, llumpay wayra-parakunata, unquykunata chaynataq wañuytapas. Jehova Diosninchik allpa pachata kamachimuptinqa manañam chaykunaqa kanqachu (Dan. 2:44; Apoc. 21:3, 4). Chaykamaqa satanas kay allpa pachata munaychakunantam Diosqa saqichkan (Juan 12:31; Apoc. 12:9).b Sichu Jehova Dios lliw sasachakuyninchikta kunan tiempopi chinkarachinman hinaptinqa, satanaspa munaychakusqanmi allinpaq rikchakuwachwan. Ichaqa, Diosninchikqa kay tiempopas yanapawachkanchikmi, wakin prometewasqanchikkunata hamuq tiempopiña ruwanan kaptinpas. Imayna yanapawasqanchikmantayá qatiqninpi yachaykusunchik.

¿IMAYNATAM DIOSQA MAÑAKUSQANCHIKTA UYARIYKUWANCHIK?

9. ¿Imaynatam Jehova Diosqa yanapawanchik imapaqpas tantiakunanchik kaptinqa? Rimarimuy Mariamanta.

⁹ Jehova Diosqa yachaytam quwanchik. Payqa niwanchikmi imapaqpas allinta tantiakunapaq yachayta quwananchikmanta. Astawanmi yachayta quwananchikta munanchik imapas tantiasqanchik vidanchikta cambianan kaptinqa. Ichapas wakiqninchikqa tantiakunanchik kanqa casarakunapaq utaq solterolla qipanapaq (Sant. 1:5). Rimarisunchik soltera kaq iñiqmasinchik Mariamanta.c Paymi Jehova Diosninchikta precursora regular kaspa kusisqa servichkaspan huk musu iñiqmasinchikta riqsirurqa. Paymi nin: “Tiempopa risqanman hinam allin amistadta armarurqaniku, chaymi mana musyakuspalla kuyanakuytaña qallaykurqaniku. Chaymi Diosninchikta unaysu mañakurqani allinta tantiakunaypaq. Munarqanim yachayninwan yanapaykuwananta. Chaywanpas kikiymi casarakunaypaqqa tantiakunay karqa, manam Dioschu tantiapuwanan karqa”, nispa. Mariam nin Jehova Diosqa mañakusqanta uyariykusqanmanta hinaspa yachayta quykusqanmanta. ¿Imaynatam Jehova Diosqa yanapaykurqa? Payqa qillqanchikkunapim casarakuymanta rimaq yachachikuykunata leerqa iskayrayachisqan kaqkunamanta yachananpaq. Hinaspapas mamanpa rimapayasqanmi Mariataqa yanaparqa allinta tantiakunanpaq, mamanqa testigom. Chaykunawanmi Mariaqa allinta tantiakurqa.

10. Filipenses 4:13 nisqanman hinaqa ¿imaynatam Jehova Diosqa serviqninkunata yanapawasun? Rimarimuy iñiqmasinchik Benjaminmanta. (Qawaytaq fototapas).

¹⁰ Jehova Diosqa kallpatam quwanchik imatapas aguantanapaq. Apostol Pabloman hinam ñuqanchikmanpas Jehova Diosqa kallpata quwasun sasachakuyninchikta aguantanapaq (leey Filipenses 4:13). Africa lawpi iñiqmasinchik Benjaminta imayna yanapaykusqanmantayá yachaykusun. Taksachanmantam payqa familianwan guerramanta ayqikuq achka runakunawan kuska yacharqa. Paymi nin: “Sapa kutim Jehova Diosta mañakuq kani kallpata quwananpaq, chaynapi munasqanman hina imatapas ruwanaypaq. Diosqa uyariykamuwaspam hawkayayta quykuwarqa, kallpatapas quwarqam hinalla willakunaypaq, qillqanchikkunatapas iñiqmasinchikkunawanmi apachimuwarqa iñiyniypi allin kanaypaq”, nispa. Nintaqmi: “Huk iñiqmasinchikkunatapas Jehova Diosninchik imayna yanapasqanta leesqaymi kallpanchawarqa ñuqapas mana hukmanyanaypaq hinaspa Diosman sunqu hinalla kanaypaq”, nispa.

11, 12. ¿Imaynatam Jehova Diosqa iñiqmasinchikkunawan yanapawanchikman? (Qawaytaq fototapas).

¹¹ Jehova Diosqa iñiqmasinchikkunawanmi yanapawanchik. Wañukunan tutam Jesusqa taytanta waqa-waqarispan mañakurqa. Taytantam ruegakurqa pinqaypi mana qipachinanpaq. Diosqa manamá chaymantaqa librarqachu. Ichaqa huk angeltam kachamurqa kallpanchaykunanpaq (Luc. 22:42, 43). Chaynallataqmi ñuqanchiktapas Jehova Diosqa kallpanchawananchikpaq iñiqmasinchikkunata kallpanchanman qayaykamuwananchikpaq utaq watuykamuwananchikpaq. Chaynaqa, llapallanchikmi kallpanchakunanchik ‘sumaq rimaykunawan’ iñiqmasinchikkunata kallpanchaykunapaq (Prov. 12:25).

¹² Rimarisun iñiqmasinchik Miriamta ima pasasqanmanta. Qusan wañukusqanmanta semanakuna pasayllatam payqa wasinpi llumpay llakisqa kallachkarqa. Waqasqallanpiña kaspanmi piwanpas rimayta munarqa. Paymi nin: “Manam ganasniypas karqachu pita qayanaypaqpas, chaymi Jehova Diosta mañakullarqani. Wiqi ñawintin mañakullachkaptiymi celularniy waqayta qallaykurqa, allin amistadniyku punta apaqmi qayamuwachkasqa”, nispa. Chay punta apaqmi señoranpiwan Miriampa sunqunta tiyaykachirqa. Miriamqa cuentatam qukurqa payta qayanankupaq chay iñiqmasinchikkunata Jehova Dios kallpanchaykusqanta.

13. Rimarimuy Nehemiasta Jehova Dios mana yupaychaqnin runawan imayna yanapasqanmanta.

¹³ Jehova Diosqa mana yupaychaqnin runakunawanpas yanapawanchikmanmi (Prov. 21:1). Wakinpiqa Jehova Diosqa serviqninkunapa mañakusqankutam uyariykun mana yupaychaqnin runakunawan yanapaykachispa. Chaynatam Diosqa Nehemiasta yanapaykachirqa kamachiq Artajerjeswan. Artajerjesqa Nehemiastam permisaykurqa tuñisqa Jerusalen llaqtata kaqmanta hatarichimunanpaq (Neh. 2:3-6). Chaynam kunanpas Jehova Diosqa mana testigo kaqkunawanpas sasachakuyninchikpi yanapaykuwanchikman.

14. Iñiqmasinchik Suyinmanta yachasqaykiqa, ¿imaynatam kallpanchasunki ima sasachakuypipas tarikuptiki? (Qawaytaq fototapas).

¹⁴ Iñiqmasinchik Suyinmi nin Jehova Dios huk doctorwan yanapaykachisqanmanta. Paypa wawanqa umanwanmi unqullan. Huk punchawmi wasipa altusninmanta wichiykurqa. Chaymi warmi-qari llamkayninkuta saqispa warmankuta atiendeypiña karqaku, hinaptinmi qullqinkupas pisirurqa. Iñiqmasinchik Suyinqa tukuy chaykunawanmi muspaypi hinaña tarikullarqa, manaña kallpayuq. Chayna tarikuspanmi Jehova Diosta tukuy sunqunwan mañakullarqa yanapaykunanpaq, hinaptinmi Diosqa doctorwan yanapaykachirqa. Chay doctorqa paykunatam gobiernowan yanapaykachirqa, yanaparqataqmi mana llumpay preciopaq wasita arriendanankupaqpas. Chaymi Suyinqa nin: “Jehova Dios tukuy imapi yanapawasqankutam qawarqaniku. Payqa mañakusqaykutam uyariykullawarqaku”, nispa (Sal. 65:2).

DIOS IMAYNA YANAPAWASQANCHIKTA CUENTATA QUKUNAPAQ HINASPA CHASKIKUNAPAQQA IÑIYNIYUQMI KANANCHIK

15. ¿Imatam iñiqmasinchik Yaki ruwarqa mañakusqanta Dios uyarisqanmanta cuentata qukunanpaq?

¹⁵ Yaqa llapanpim Jehova Diosqa mana milagrota ruwasparaqchu imatapas quwanchik. Ichaqa imapas quwasqanchikqa hinallam yanapawanchik payman sunqu kanapaq. Chaymi qawan-qawanlla kananchik Jehova Dios imayna yanapawasqanchikta cuentata qukunapaq. Iñiqmasinchik Yakim piensarqa mañakusqanta Dios mana uyarisqanta. Chaymi payqa tantiakururqa tukuy ima mañakusqanta cuadernopiña anotananpaq. Punchawkuna pasaytam cuadernonpi anotakusqanta qawaykuspan cuentata qukururqa Jehova Diosqa yaqa llapan mañakusqanta uyariykusqanta. Wakin mañakusqantaqa Yakiqa qunqarusqañam kanpas. Ñuqanchikpas tiempochakunanchikmi mañakusqanchikman hina Diosninchik imayna yanapawasqanchikpi yuyaymananapaq (Sal. 66:19, 20).

16. Diosta mañakuspaqa ¿imakunamantam mana iskayrayananchikchu? (Rimarimuytaq Hebreos 11:6 nisqanmantapas).

¹⁶ Manamá iskayrayanchikchu mañakusqanchikta Dios uyariwasqanchikmantaqa. Chaynam mana iskayrayanachu ñuqanchikpaq imam allin kasqanmanta aswan allinta yachasqanmantapas. Chaymi munasqanchikman hina mana yanapawaptinchikpas chaskikunanchik (leey Hebreos 11:6). Chaytam ruwarqaku iñiqmasinchik Miguelwan Cristinapas. Paykunaqa betelpi yanapakuytam munarqaku. Miguelmi nin: “Achka kutikamam betelpi yanapakunaykupaq solicitudta apachirqaniku, chaypaqmi Jehova Diostapas sapa kuti mañakullarqaniku. Ichaqa manam qayamuwarqakuchu”, nispa. Chaywanpas Miguelwan Cristinaqa manam iskayrayarqakuchu ima ruwaypi astawan yanapakunankupaq Dios allinta yachasqanmantaqa. Chaymi tukuy sunqunkuwan yanapakurqaku aslla testigokunapa kasqanpi precursor regular kaspa, chaynataq huñunakuna wasikuna ruwaypipas. Kunanqa llaqtan-llaqtan watukuqñam kanku. Miguelmi nin: “Jehova Diosqa tukuy tiempom mañakusqaykuta uyariykuspa yanapaykuwarqaku, wakinpim ichaqa mana munasqaykuman hinapunichu. Chaywanpas imam mañakusqaykutam piensasqaykumantapas aswan sumaqtaraq quykuwarqaku”, nispa.

17, 18. Salmos 86:6, 7 nisqanman hinaqa ¿imamantam mana iskayrayananchikchu?

¹⁷ (Leey Salmos 86:6, 7). Davidqa manam iskayrayarqachu Jehova Diosqa mañakusqanta uyariykuspa yanapaykunanmantaqa. Ñuqanchikpas chaynam mana iskayrayananchikchu. Kay yachachikuypim yacharamunchik Jehova Diosqa imatapas allinta tantiakunapaq yachayta quwasqanchikmanta chaynataq ima sasachakuytapas aguantanapaq kallpata quwasqanchikmanta. Yacharamunchiktaqmi Diosninchikqa iñiqmasinchikkunawan yanapawasqanchikmantapas chaynataq mana yupaychaqnin runakunawan yanapawasqanchikmantapas.

¹⁸ Munasqanchikman hina Dios mana yanapawaspanchikpas payqa uyariwanchikpunim. Payqa tiempollanpim yanapaykuwasun imam necesitasqanchikman hina. Chaynaqa, kunanpas Jehova Dios yanapaykuwananchikmanta mana iskayrayaspayá hinalla mañakusunchik. Amataqyá iskayrayasunchu hamuq tiempopipas ‘llapallan kawsaqkunaman munasqanchikta quwananchikmantaqa’ (Sal. 145:16).