Iskay iñiqmasinchikkunapas Diospa llaqtanpi punta apaqkunañam
2023 watapim miercoles 18 de enero punchawta internetpi jw.org nisqanpi willakuy lluqsimurqa. Chaypim nirqa iñiqmasinchik Gage Fleegle hinaspa Jeffrey Winder Diospa llaqtanpi punta apaqkunaña kasqankumanta. Paykunaqa unay watañam Jehova Diosta tukuy sunqunkuwan servichkanku.
Gage Fleegle warmin Nadiapiwan
Iñiqmasinchik Gageqa wiñarqa Estados Unidospa Pensilvania lawninpim. Paymanqa tayta-mamanmi Jehova Diosmanta yachachirqa. Warmallaraq kachkaptinmi huk llaqtachaman astakurqaku Diosmanta astawan willakunankupaq. Chaypim payqa bautizakurqa 1988 watapa 20 de noviembre punchawninta.
Paytaqa tayta-mamanmi sapa kuti kallpanchaq tukuy tiemponwan Jehova Diosta servinanpaq. Paykunam llaqtan-llaqtan watukuq iñiqmasinchikkunata hinaspa betelpi yanapakuqkunata wasinkuman invitaq. Chaymi Gageqa cuentata qukurqa paykunaqa ancha kusisqa kasqankuta. 1989 watapa 1 de septiembre punchawnintam qallaykurqa precursor regular kayta. Chaymanta iskay wata pasayllatam betelpi yanapakuy tantiakusqanta hayparurqa. Chaytaqa tantiakurqa 12 watanpi kachkaspallanraqmi. Chaymi Brooklyn betelpi yanapakuyta qallaykurqa 1991 watapa octubre killanpi.
Chaypim llamkarqa pusaq wata librokunapa qaranta churaypi. Chaymantañataqmi nirqaku chay nacionpi Diosmanta willakuypi cuentallikuqkunawan llamkananpaq. Chay tiempopim iskay-kimsa wata yanapakurqa ruso rimaypi kaq congregacionpi. 2006 watapim Nadiawan casarakururqa, chaymantapacham kuskanku betelpi yanapakuchkanku. Iskayninkum portugues congregacionpi yanapakuchkarqaku. Ichaqa chunka wata masninñam castellano congregacionpi yanapakuchkanku. Iñiqmasinchik Gageqa Diosmanta willakuypi cuentallikuqkunawanmi unay wata llamkarqa. Chaymantam nirqaku enteron pachapi yachachikuymanta cuentallikuqkunawan llamkananpaq. Chaymantañataqmi nirqaku enteron pachapi Diosmanta willakuypi cuentallikuqkunawan llamkananpaq. 2022 watapa marzo killanpiñataqmi nirqaku enteron pachapi Diosmanta willakuypi cuentallikuqkunapa yanapaqnin kananpaq.
Jeffrey Winder warmin Angelapiwan
Iñiqmasinchik Jeffreyqa Estados Unidospi kaq Murrieta sutiyuq llaqtapim wiñarqa. Paymanpas tayta-mamanmi Jehova Diosmanta yachachirqa. Payqa bautizakurqa 1986 watapim 29 de marzo punchawpi. Qatiqnin killallatam precursor auxiliar kayta qallaykurqa. Gustaruptinmi manaña saqiyta munarqachu. Chaymi chay watallapi 1 de octubre punchawta precursor regular kaytaña qallaykurqa.
Warmallaraq kachkaspanmi Jeffreyqa betelpi yanapakuq iskay mayorninkunata watukuq rirqa. Chaymi paypas munarqa paykuna hina yanapakunanpaq wiñaruspan solicitudta apachiyta. Chaymantam 1990 watapi Wallkill betelpi yanapakunanpaq invitarurqaku.
Chaypim yanapakurqa limpiezapi, betelpa chakranpi chaynataq huk llamkaykunapipas. 1997 watapim Angelawan casarakururqa, chaymantam iskayninkuña betelpi yanapakuchkanku. 2014 watapim nirqaku Warwickman astakunankupaq, chaypim Jeffreyqa yanapakurqa betel wasi ruwakunanpaq. 2016 watapiñataqmi nirqaku Pattersonman astakunankupaq. Chaypim Jeffreyqa llamkarqa videokunata ruwaypi yanapakuqkunawan. Tawa wata pasaytañataqmi Warwickman kutirqaku, chaypim Jeffreyqa yanapakurqa betelpi llamkaqkunamanta cuentallikuqkunawan. 2022 watapa marzo killanpiñataqmi nirqaku enteron pachapi betelpi llamkaqkunamanta cuentallikuqkunapa yanapaqnin kananpaq.
Chay iñiqmasinchikkunaqa Jehova Diospa quwasqanchik sumaq regalo hinam kanku (Efes. 4:8). Jehova Diostayá mañakusun paypaq imapas ruwayninkupi hinalla bendecinanpaq.