Iskay iñiqmasinchikkunapas Diospa llaqtanpi punta apaqkunañam
SAPA watapaq hatun huñunakuypim willakurqaku iñiqmasinchik Jody Jedele hinaspa Jacob Rumph Diospa llaqtanpi punta apaqkunaña kasqankumanta, chayqa karqa 2024 watapi 5 de octubretam. Paykunaqa unay watañam Jehova Diosta tukuy sunquwan servichkanku.
Jody Jedele señoran Damarispiwan
Iñiqmasinchik Jodyqa nacerqa Estados Unidos nacionpi kaq Misuri llaqtapim. Paymanqa tayta-mamanmi Jehova Diosmanta yachachirqa. Paykunaqa yacharqaku mana ancha testigokunapa kasqanpim. Chaymi Jodyqa huklaw llaqtakunamanta Diosmanta willakuq riq achka iñiqmasinchikkunata riqsirqa. Iñiqmasinchikkuna kuyanakusqankuta hinaspa huk sunqulla kasqankuta qawaspanmi paypas Jehova Diosta serviyta munarqa, chaymi bautizakururqa 1983 watapi 15 de octubreta. Paytaqa Diosmanta willakuymi anchata gustaq. Chaymi colegionta tukuruspan 1989 watapi precursor regular kayta qallaykurqa.
Paywan hermanan taksachallaraq kachkaptinkum tayta-mamanqa betel wasiman pusaqku. Chaymi paykunaqa munaqku wiñaruspanku chaypi yanapakuyta, chaynamá karqa. Iñiqmasinchik Jodyqa 1990 watapa septiembre killanpim Wallkill betelpi yanapakuyta qallaykurqa. Puntatam yanapakurqa limpiezapi, chaymantañataqmi Servicios Médicos nisqapi.
Chay tiempopim betelpa hichpanpi españolpi congregacionkuna achkayachkarqa, chaymi necesitarqaku qari iñiqmasinchikkuna yanapakunankuta. Hinaptinmi Jodyqa huknin congregacionman riyta qallaykuspan españoltapas yachayta qallaykurqa. Chaymanta qipallatam precursora iñiqmasinchik Damarista riqsirurqa. Casarakuruptinkum paypas betel wasipiña yanapakuyta qallaykurqa.
2005 watapi betelmanta lluqsiruspankum Jodypa mamantawan Damarispa tayta-mamanta cuidayta qallaykurqaku. Chay tiempopim iskayninku precursor regular karqaku. Jodyqa achka kutipim precursorkunapaq escuelapi yachachiq karqa. Yanapakurqataqmi hospitalpi hampichikunapaq yanapakuqkunawanpas chaynataq huñunakuna wasikunata ruwaypi cuentallikuqkunawanpas.
2013 watapiqa Warwick betelta ruwaypi yanapakunankupaqñam invitarqaku. Chaymanta qipataqa yanapakurqakutaqmi Patterson hinaspa Wallkill betelpipas. Payqa yanapakurqam chaylawpi wasikuna ruwaymanta cuentallikuqkunawanpas chaynataq Servicios de Información sobre Hospitales nisqanpipas. 2023 watapa marzo killanpim nirqaku enteron pachapi Diosmanta willakuypi cuentallikuqkunapa yanapaqnin kananpaq. Diospa llaqtanpi imakunapi yanapakusqanmanta rimaspanmi nin: “Wakinpiqa llumpay preocupasqam tarikuchwan mana yachasqanchik kaqkunapi yanapakunapaq niykuwaptinchikqa. Chaynapi tarikuspam Jehova Diospi astawan hapipakunanchik. Paymi imapipas yanapawanchik”, nispan.
Jacob Rumph señoran Ingapiwan
Iñiqmasinchik Jacobñataqmi nacerqa Estados Unidos nacionpi kaq California llaqtapi. Warmachallaraq kachkaptinqa mamanqa testigo kaspanpas manam huñunakuykunamanqa riqchu nitaq Diosmantaqa willakuqchu. Jacobqa sapa watataqmi testigo abuelanta watukuq riq. Tukuy sunqunwan Diosta servisqanta qawaspanmi paypas Diosta serviyta munaq. Chaymi 13 watachallanpiraq kachkaspan biblia estudiayta qallaykurqa. Hinaspanmi 1992 watapi 27 de septiembreta bautizakururqa. Chaymantapas, mamanmi huñunakuykunaman kaqmanta riyta qallaykurqa, hinaspapas lliw familianmi Diosmanta yachayta qallaykuspanku bautizakururqaku.
Jacobqa jovenllaraq kachkaspanmi precursorkuna ancha kusisqallaña kasqankuta qawaq. Chaymi colegionta tukuruspan 1995 watapa septiembre killanpi precursor kayta qallaykurqa. 2000 watapiñataqmi Ecuador nacionpi Diosmanta mana ancha willakuqkunapa kasqan llaqtachaman rirqa. Chaypim Canada nacionmanta Inga sutiyuq precursora iñiqmasinchikta riqsirurqa. Tiempopa risqanman hinam casarakurqaku. Chayllaraq casarakuspankum Ecuador nacionpi aslla iñiqmasinchikunapa kasqanpi yanapakurqaku. Kunanqa achka iñiqmasinchikkunam chaypiqa huñunakunku.
Tiempopa risqanman hinam precursor especial karqaku, chaymantañataqmi llaqtan-llaqtan watukuq. 2011 watapim galaad escuelaman rirqaku. Chaymantam achka nacionkunaman rirqaku betelpi yanapakunankupaq, misionero kanankupaq hinaspa llaqtan-llaqtan watukuq kanankupaq. Payqa yachachirqataqmi Diospa munaychakuyninmanta willakuqkunapaq escuelapipas.
Coronavirus qallaykuptinmi Estados Unidosman kutirqaku. Chaypim Wallkill betelpi yanapakunanpaq invitarqaku. Jacobqa Diosmanta willakuypi cuentallikunanpaqmi yachachisqa karqa. Chaymantam Ecuador betelman rirqaku. Chaypim Jacobqa betel wasipi cuentallikuqkunamanta huknin karqa. 2023 watapim kutirqaku Warwick betelman. Hinaptinmi 2024 watapa enero killanpi Jacobqa enteron pachapi Diosmanta willakuypi cuentallikuqkunapa yanapaqnin kananpaq nombrasqa karqa. Diospa llaqtanpi maykunapi yanapakusqanmanta rimaspanmi nin: “Aswan allinqa manam Jehova Diosta maypi servisqanchikchu, aswanqa iñiqmasinchikkunawan serviymi”, nispa.
Kay iñiqmasinchikkunapa tukuy ruwasqankutam anchata valoranchik. Anchatataqmi kuyanchik (Filip. 2:29).