¿Imatam Diosqa ruwanqa guerrakunata chinkachinanpaq?

LLIW NACIONPI GOBIERNOKUNATAM DIOSQA CHINKACHINQA

Diosmi llapa gobiernokunata chinkachinqa Armagedona sutiyuq guerrapi (Apocalipsis 16:16). ‘Enteron pachapi kamachikuqkunam’ utaq gobiernokunam alistakunqaku ‘Diospa piñakuynin punchawpi guerrapaq’ (Apocalipsis 16:14). Chay punchawpim Diosqa llapa gobiernokunata chinkachinqa, hinaptinmi guerraqa manaña maypipas kanqachu.

Chaymantaqa Diosñam lliw runakunata hanaq pachamanta gobiernawasun, payñam wiña-wiñaypaq gobiernawasun. Diospa gobiernontaqa manam pipas chinkachiyta atinqachu (Daniel 2:44). Chay gobiernopiqa churin Jesucristom kamachiqninchik kanqa (Isaias 9:​6, 7; Mateo 28:18). Chay gobiernomantamb Jesusqa rimarqaña qatiqninkunaman Diosta mañakuyta yachachispan (Mateo 6:​9, 10). Jesucristoña enteron allpa pachapi lliw runakunata gobiernawaptinchikqa huk sunqullam kawsakusun.

Señorninchik Jesucristoqa manam kunan tiempopi gobiernokuna hinachu kikillanpaq munaq kanqa. Jesusqa allin ruwaq kamachiqmi, lliw runata kuyaqmi. Chaymi pay gobiernaspanqa lliw runata kuyanqa. Manañam pipas ima kastamantaña, ima llaqtamantaña, ima nacionmantaña kaspanpas hukmanqa sientekunqachu (Isaias 11:​3, 4). Manañam pipas derechonta valechinanpaqqa kunan tiempopi hinaqa juezkunapiqa purinqañachu. Aswanqa kikin Jesusmi sapa runata yanapaykunqa allin kananpaq. Chaytam bibliapipas nin: ‘Payqa yanapaykunanpaq qayakuq wakchatam yanapaykunqa. Yanapaykunqataqmi mana hatuntukuqtapas, yanapaykunqataqmi mana piniyuqtapas. […] Sasachakuymantawan ñakariymantam paykunataqa libraykunqa’, nispa (Salmos 72:​12-14).

Diosninchikqa runakunapa tukuy rikchaq ruwasqanku armankutam chinkachinqa, chay armakunawanmá kunanqa runakunaqa runamasinta wañuchichkan (Miqueas 4:3). Chinkachinqataqmi runamasinta wañuchiy munaq mana allin runatapas, runamasinta mana allin ruwaq runatapas (Salmos 37:​9, 10). Qaripas, warmipas, warmachakunapas maypiña kaspapas hawkam tarikusunchik (Ezequiel 34:28).

Diosninchikña gobiernawaptinchikqa alli-allinmi kawsakusunchik. Manañam pipas wakchaqa kanqachu, mikuymantaqa kanqachu, lliwmi wasichayuq kasunchik. Chaykunamantam kunan tiempoqa runakunaqa guerrapi kanchik. Diosña gobiernawaptinchikqa miskillaña mikuykunam achkanpi lliwpaq kapuwasunchik, llapallanchikpataqmi sumaq wasichanchikpas kapuwasunchik (Salmos 72:16; Isaias 65:​21-23).

Diosninchikña kay allpa pachata gobiernaptinqa guerra kasqanrayku tukuy imawan ñakarisqanchiktam qunqasunchik. Sanoy-sanoyñam kasunchik, yuyayninchikpipas allinñam tarikusunchik. Kunan tiempopi wakin runamasinchikkunaqariki guerrata pasasqankuraykum loco hinaña tarikullanku. Chay tiempopiqa guerrapi wañuqkunapas kay allpa pachanchikpim kawsarimunqaku (Isaias 25:8; 26:19; 35:​5, 6). Tayta-mamakunapas wawa-churinkuwan kuskañam kanqaku. Kay tiempopi imawanpas ñakarisqanchiktaqa manañam haykapipas yuyarisunchu (Apocalipsis 21:4).

LLIW RUNAPA HUCHANCHIKTAM DIOSQA CHINKACHINQA

Kay allpa pachanchikta Jehovac Diosña gobiernaptinqa llapallan runakunam payllataña sunqumanta yupaychasun. Diosninchikqariki “kuyakuq hinaspa hawkayay qukuq Diosmi” (2 Corintios 13:11). Diosmi yachachiwasun runamasinchikwan imaynata hawkalla kawsakunapaq (Isaias 2:​3, 4; 11:9). Diospa nisqanta uyarikuspaqa mana huchayuqñam kasun, mana pantaqñam kasun (Romanos 8:​20, 21).

SATANASTAWAN DEMONIOKUNATAM DIOSQA CHINKACHINQA

Diosninchikña kay allpa pachanchikta gobiernaspanqa satanastawan demoniokunatam chinkachinqa, hinaptinmi manaña kanqachu guerrapas. Satanaswan demoniokunam kay tiempoqa runakunata kallpanchan guerrata qallarichinankupaq (Apocalipsis 20:​1-3, 10). Satanaswan demoniokuna manaña kaptinqa ‘hawkañam kawsakusunchik’ (Salmos 72:7).

Diosqa chinkachinqamá guerrakunataqa. ¿Imanasqa? Payqariki tukuy atiyniyuqmi, hinaspapas munachkanmi guerrakuna chinkachiyta.

• Diosninchikqariki tukuy atiyniyuqmi, chaymi guerrakuna chinkachiytaqa atinqa, payqa yachanñam imaynata chinkachinanpaq (Job 9:4). Taytanchikpaqariki manam imapas sasachu (Job 42:2).

• Diosninchikqa ñakarisqanchikta qawamuspanqa anchatam llakikuwanchik, manamá munanchu ñakarinanchiktaqa (Isaias 63:9). Taytanchikqariki “chiqninmi mana allin ruwayman qukuruqkunataqa” (Salmos 11:5).

• Diosqa imapas niwasqanchiktaqa cumplinpunim, taytanchikqa manam llullakuwanchikmanchu (Isaias 55:​10, 11; Tito 1:2).