¿Imanasqataq kay allpa pachapi guerrakunaqa mana tukunchu?
Bibliapim willawanchik kay allpa pachapi guerrakuna imanasqa mana tukusqanmanta. Guerrakuna kasqanraykum runamasinchikkunaqa hinalla tukuywan ñakarillachkanku. Kaykunaraykum guerrakunaqa hinalla kachkan:
HUCHAYUQ KASQANCHIKRAYKU
Diosmi punta tayta-mamanchik Adantawan Evata unancharqa pay hina kuyakuqta chaynataq hawkalla kawsakuy munaqta (Genesis 1:27; 1 Corintios 14:33; 1 Juan 4:8). Ichaqa Diosta mana kasukusqankurayku hinaspa huchallikurusqankuraykum manaña chaynachu karqaku. Chaymi ñuqanchikpas paykunamanta miraq kasqanchikrayku huchayuq chaynataq wañuqlla kanchik (Romanos 5:12). Huchayuq kasqanchikraykum sunqunchikpipas mana allin piensaykunallaña wakinpiqa kan, chaymi chay pensamientokuna wañuchinakuymanpas utaq ima mana allin ruwaymanpas apawachwan (Genesis 6:5; Marcos 7:21, 22).
RUNAPURALLA GOBIERNANAKUSQANCHIKRAYKU
Diosqa runakunataqa unanchawarqanchik manam kikinchikpura gobiernanakunapaqchu. Chaymá nacionkunapi runakunalla gobiernasqankurayku guerra chinkachiytaqa mana atinkuchu. Bibliapipas ninmi: “Runapaqqa manam makinpichu maynin puriyta akllakunanpaqqa”, nispa (Jeremias 10:23).
SATANASWAN DEMONIOKUNA MUNAYCHAKUSQANKURAYKU
Bibliapim niwanchik ‘mana allin runakunaqa satanaspa munaychakusqan kasqankumanta’ (1 Juan 5:19). Satanasqa mana llakipayakuq runa wañuchiqmi (Juan 8:44). Satanaswan demoniokunaqa runakunatam umachan guerrapi kikinkupura wañuchinakunankupaq (Apocalipsis 12:9, 12).
Runakunaqa manamá atisunchu guerrakunata wiñaypaq chinkachiytaqa, Diosllam chinkachiytaqa atinqa.