¿Imaynatam pitapas allinta consejachwan?

1. ¿Pikunataq hukkunata consejanmanku, imanasqa?

WAKIQNINCHIKPAQQA manam sasachu pitapas consejayqa, wakiqninchikmi ichaqa manchakunchik utaq imayna consejaytapas mana yachanchikchu. Chayna kaptinpas llapallanchikmi wakinpiqa pitapas consejananchik kanqa. Jesusmi nirqa kuyakuq kasqanchikwan qatiqninkuna kasqanchikta riqsichikunanchikmanta (Juan 13:35). Kuyakuq kasqanchikraykum iñiqmasinchikkunata consejana kaptinqa consejaykusunchik. Bibliam niwanchik imam kaqta rimaspa consejayqa ‘sumaq amistadta qallarichisqanmanta’ (Prov. 27:9).

2. ¿Imatam punta apaqkuna astawanqa yachananku hinaspa imanasqa? (Qawaytaq “¿Imaynatam consejana semanapi punta kaq huñunakuypi?” niqtapas).

² Punta apaqkunam astawanqa pitapas allinta consejaytaqa yachananku, ¿imanasqa? Jehova Dioswan Jesusqa paykunatam churarqa iñiqkunata yanapanankupaq (1 Ped. 5:​2, 3). ¿Imata ruwaspankum chayta kasukunku? Huñunakuykunapi bibliapa nisqanman hina yachachispankum. Kasukunkutaqmi sapakama iñiqkunata consejaspankupas. Consejankumá Diosmanta karunchasqa kaqkunatapas. Chaynaqa, ¿imaynatam punta apaqkunapas chaynataq llapallanchikpas consejana kaptinqa pitapas allinta consejachwan?

3. (1) ¿Imaynatam allin consejaq kayta yachachwan? (Rimarimuytaq Isaias 9:6 nisqanmantapas, qawaytaq “Jesustayá qatipakusun pitapas consejaspaqa” niqtapas). (2) ¿Imamantam kay yachachikuypi yachasun?

³ Allinta consejaytam yachachwan bibliapi willawasqanchik Diospa serviqninkunamanta yachaspanchik. Astawan qatipakunapaqqa Jesusmi. Paymantam bibliapi nin ‘suma-sumaq rimapayakuq’ utaq consejakuq kasqanta (leey Isaias 9:6). Kay yachachikuypim yachasun consejanapaq pipas niwaptinchik imata ruwanamanta hinaspa mana niwaptinchikpas consejana kaptin imayna consejanamanta. Yachasuntaqmi haykapi hinaspa imaynata consejanamantapas.

CONSEJANAPAQ PIPAS NIWAPTINCHIK

4, 5. ¿Imatam nikunanchik consejananchikpaq pipas niwaptinchikqa? Rimarimuy unquq amistadninchik tapuwasqanchikmanta.

⁴ Consejanapaq pipas niwaptinchikqa ichapas ñuqanchikpi confiasqanmanta kusisqa kaspanchik kamas yanapayta munachwan. Ichaqa imatapas chaylla nirunamantaqa nikunanchikraqmi: “¿Allintachu yachani tapuwasqanmanta?”, nispa. Mana yachaspa consejanamanta aswan allinqa kanman chaymanta allinta yachaqta tapukunanpaq yanapayninchikmi.

⁵ Chayta allinta entiendenanchikpaq kaypi piensarisun. Mayqan amistadninchikpas niwachwan: “Unquyniypaq ima hampikuna allin kasqanmantam maskachkarqani, ¿mayqintaq aswan allin kanman?”, nispa. Ichapas pay hina tarikuspanchik ima ruwaytaqa yachanchik. Chaywanpas mana doctor kaspanchikqa utaq chay unquypaq ima allin kasqanta mana yachaspanchikqa aswan allinqa kanman chaymanta allin yachaqta tapukunanpaq niymi.

6. ¿Imanasqataq consejanapaq pipas niwaptinchikqa wakinpiqa mana kamasqa nirunanchikchu?

⁶ Tapuwasqanchikmanta allinta yachasqanchikta piensaspapas wakinpiqa manam kamasqa nirunanchikchu. ¿Imanasqa? Bibliapim nin: “Allin ruwaq runaqa sumaqta tantiaykuspam rimarin”, nispa (Proverbios 15:28). Chayraykum tapuwasqanchikmanta yachasqanchikta piensaspapas tiempochakunanchik chaymanta aswan allinta yachananchikpaq, Diosta mañakunanchikpaq hinaspa yuyaymanananchikpaq. Chayta ruwaspaqa Jehova Diospa munasqanman hinam pitapas consejasun.

7. ¿Imatam Natanmanta yachachwan?

⁷ Huk kutipim Natanta kamachiq David nirqa Jehova Diospaq wasita ruway piensasqanta, Natanñataqmi kamas nirqa chay piensasqanqa allin kasqanta. Jehova Diosmi ichaqa mana munarqachu wasita David ruwapunantaqa. Chayraykum Natanqa Davidta manaraq imatapas nichkaspan Jehova Diosta tapunman karqa (1 Cron. 17:​1-4). Chaywanmi yachanchik consejanapaq pipas niwaptinchikqa chaylla rimaruy mana allin kasqanta (Sant. 1:19).

8. ¿Imanasqaraqtaq allinta piensananchik pitapas manaraq consejachkaspa?

⁸ ¿Imanasqaraqtaq allinta piensananchik pitapas manaraq consejachkaspa? Consejasqanchikman hina tantiaruspan sasachakuypi kaptinmi ñuqanchikpas huchayuq kachwan, chaymi allinta piensananchik pitapas consejanapaqqa.

MANA NIWACHKAPTINCHIK CONSEJANA KAPTIN

9. ¿Imatam punta apaqkunaqa nikunanku pitapas manaraq consejachkaspanku? (Rimarimuytaq Galatas 6:1 nisqanmantapas).

⁹ Wakinpim punta apaqkunaqa pipas pantaptin kikinkumanta asuykuspa consejananku kanqa (leey Galatas 6:1). Hinalla mana allinta ruwaspanqa qipakunamanmi hatun huchata ruwarunman. Chayraykum punta apaqkunaqa yanapayta munanku Jehova Diosta hinalla servispan wiñaypaq kawsakunanpaq (Sant. 5:​19, 20). Ichaqa manaraq consejachkaspankum nikunanku: “¿Ciertotachu pantachkan icha conciencianman hinachu tantiakuchkan?”, nispanku. Pipapas tantiakusqan punta apaqkunapa munasqanman hina mana kaptinqa manam ninmankuchu mana allin kasqantaqa. Diosqariki sapakamatam saqiwanchik conciencianchikman hina wakinpi tantiakunapaq (Rom. 14:​1-4). Ichaqa ruwasqan Diospa munasqanman hina mana kaptinqa, ¿imaynatam punta apaqkunaqa consejananku?

10-12. ¿Imatam punta apaqkuna ruwananku mana mañakuchkaptin pitapas consejaspankuqa? Rimarimuy tarpuqmanta. (Qawaytaq fotokunatapas).

¹⁰ Wakinpiqa sasam punta apaqkunapaqqa mana mañakuchkaptin pitapas consejayqa. Apostol Pablom nirqa pipas mana cuentata qukuchkaspan pantarunanmanta, ichapas chayrayku piensanman consejanankuta mana necesitasqanta. Chaymi punta apaqkunaqa yanapananku imapi pantasqanta cuentata qukunanpaq hinaspa consejasqanta chaskikunanpaq. ¿Imakunatam chaypaq ruwanmanku?

¹¹ Rimarisun tarpuqmanta. Pipas duro allpapi tarpunanpaqqa aspinraqmi, chaynapi tarpusqan allin wiñananpaq. Chaymantañataqmi tarpun, tarpuruspanñataqmi parqun. Chaynallataqmi punta apaqpas pipas mana mañakuchkaptin consejananpaqqa tarpunanpaq aspichkaq hina kuyakuq hinaspa sumaq simillawan rimaq kanan. Chayna kaptinqa consejasqantam chaskikunqa. Chaymantañataqmi punta apaqqa ninman kuyasqanrayku paywan rimayta munasqanta.

¹² Chaymantapas consejasqanta chaskikunanpaqqa punta apaqqa yuyarichinantaqmi llapallanchik pantaq kasqanchikta hinaspa consejaykuwananchikta wakinpi necesitasqanchikta (Rom. 3:23). Chaymantam sumaqllata bibliapa nisqanwan yanapanman imapi pantasqanmanta cuentata qukunanpaq. Imapi pantasqanta cuentata qukuruptinñataqmi tarpuchkaq hina ninan imapi kallpanchakunanmanta. Chaymantañataqmi parquchkaq hina allinkuna ruwasqanmanta alabaykunan hinaspa paywan kuska Diosta mañakunan (Sant. 5:15).

13. ¿Imatam punta apaqkunaqa ruwanmanku consejasqanta allinta entiendenanpaq?

¹³ Wakinpim iñiqqa punta apaqpa nisqanta huktaña entienderunman. Chaynaqa, ¿imatam punta apaqkunaqa ruwanmanku consejasqanta pipas allinta entiendenanpaq? Sumaqllatam tapunmanku consejasqanwan imata entiendesqanta hinaspa imata ruwananta (Ecl. 12:11).

HAYKAPI HINASPA IMAYNATA CONSEJANAMANTA

14. ¿Imanasqataq piñasqa kaspaqa mana pitapas consejananchikchu?

¹⁴ Pantaq kasqanchikraykum wakinpiqa ruwasqanchikwan utaq rimasqanchikwan hukkunata piñarachichwan (Col. 3:13). Bibliapipas ninmi wakinpiqa hukkunawan piñanakurunanchikmanta (Efes. 4:26). Ichaqa manam haykapipas piñasqa kaspaqa pitapas consejananchikchu. ¿Imanasqa? Piñakuq runataqa mana allin ruwaqpaqmi Diosqa hapin (Sant. 1:20). Piñasqa kaspa pitapas consejayqa aswan mana allinpim tukunman. Chaywanqa manam nichkanchik sientirachiwaqninchikta mana imatapas ninamantachu. Chaywanpas aswan allinqa hawkaña kaspa paywan parlaymi. Qatiqnin parrafopiyá qawaykusun Jobta allinta consejaq Eliumanta.

15. ¿Imatam Eliumanta yachachwan? (Qawaytaq dibujotapas).

¹⁵ Amistadnintukuqkuna tukuyta niptinmi Jobqa Jehova Diosmantapas yanqakunata nispan defiendekurqa. Chaywan piñakuspanpas Eliuqa manam chayllachu rimarurqa, aswanqa achka punchawmi pacienciawan uyariyllaraq-uyarirqa. Chaymantañam Jobtaqa rimapayarqa hawkalla hinaspa respetowan (Job 32:2; 33:​1-7). ¿Imatam Eliumanta yachachwan? Pitapas consejanapaqqa hawkam kananchik, hinaspapas rimapayananchikqa kuyakuyllawanmi chaynataq respetowanmi (Ecl. 3:​1, 7).

HINALLAYÁ ALLINTA CONSEJASUN HINASPA ALLIN CONSEJOKUNATA CHASKIKUSUN

16. ¿Imatam yachachwan Salmos 32:8 nisqanmanta?

¹⁶ Kay yachachikuypaq textopim Jehova Dios niwanchik: ‘Yachachisqayki allin kawsakunaykipaqmi’, nispan (leey Salmos 32:8). Arí, Jehova Diosqa tukuy tiempom yanapawanchik consejawaspanchik. Yanapawanchiktaqmi ruwayman churananchikpaqpas. Jehova Diosta qatipakuspam ñuqanchikpas pitapas consejaspaqa mana qunqarunanchikchu, aswanqa hinallam yanapananchik ruwayman churananpaq.

17. ¿Imaynataq kanku imam kaqta hinaspa bibliapa nisqanman hina consejakuq punta apaqkunaqa? (Rimarimuytaq Isaias 32:​1, 2 nisqanmantapas).

¹⁷ Tukupay punchawkunapi kasqanchikraykum kunanqa astawanraq hukkunata consejananchik hinaspa sumaq consejokunata chaskikunanchik (2 Tim. 3:1). Imam kaqta hinaspa bibliapa nisqanman hina consejakuq punta apaqkunaqa kanku ‘chaki allpapi yaku hinam’ (leey Isaias 32:​1, 2). Anchatamá kusikunchik paykunapas chaynataq amistadninchikkunapas allinta consejawasqanchikmanta. Paykunaqa consejawanchik manam uyariyta munasqallanchiktachu, aswanqa imam necesitasqanchiktam. Paykunapa niwasqanchikqa quri-qullqi hina ancha valorniyuqmi (Prov. 25:11). Chaynaqa, llapanchikyá hinalla yachayniyuq kasun pitapas allinta consejanapaq chaynataq consejawasqanchikta chaskikunapaq.