Diosmanta yachay munaqkunataqa chayllayá yanapasun

1. ¿Imaynatam wakin runakunaqa chaskiwanchik Diosmanta willakuptinchik? (Rimarimuytaq Hechos 13:​47, 48; 16:​14, 15 nisqanmantapas).

APOSTOLKUNAPA tiemponpi achka runakunam bibliamanta chayllaraq uyariruspanku iñikuyta qallaykurqaku (leey Hechos 13:​47, 48; 16:​14, 15). Chaynam kunanpas wakinkuqa willakusqanchikta kusikuywan uyarispanku iñikuyta qallaykunku. Wakinkuñataqmi qallariypiqa mana uyariyta munaspankupas tiempopa pasasqanman hina yachayta munanku. Chaynaqa, ¿imatam ruwananchik Diosmanta astawan yachay munaqkunata tarispaqa?

2. ¿Imaynanpitaq nichwan Diosmanta willakuyninchikqa huertapi llamkay hina kasqanta?

² Piensarisun kaypi: Huertapiqa tukuy tiempom imatapas tarpunchik, wiñananpaqñataqmi parqunchik, puqusqa kaqkunatañataqmi chaylla cosechanchik. Chaynam Diosmanta willakuspapas Diosmanta yachay munaqta tariruspaqa chaylla yanapanchik Diosta servinanpaq. Manaraq yachay munaqkunamanñataqmi parquchkaq hina hinalla Diosmanta willanchik, chaynapi bibliapa yachachikuyninkunaqa allinninchikpaq kasqanta entiendenankupaq (Juan 4:​35, 36). Pikuna astawan yachay munasqanta utaq manaraq munasqanta yachaykuspaqa yachasunmi sapakamata imayna yanapayta. Kay yachachikuypim yachasunchik pipas Diosmanta chayllaraq uyariruspan astawan yachayta munaptinqa imata ruwananchikmanta, yachasuntaqmi Diosta astawan kuyaspan serviqninña kananpaq imayna yanapanamantapas.

ASTAWAN YACHAY MUNAQTA TARIRUSPA

3. ¿Imatam ruwachwan Diosmanta yachay munaqta tariruspaqa? (Rimarimuytaq 1 Corintios 9:26 niqmantapas).

³ Willakuchkaspa Diosmanta astawan yachay munaqta tariruspaqa chayllam yanapananchik Diosmanta astawan yachaspa payman asuykunanpaq. Chaypaqqa ancha allinmi bibliamanta estudiachinapaq niyninchik, nichwantaqmi huñunakuykunaman hamunanpaqpas (leey 1 Corintios 9:26).

4. Willarimuy Diosmanta chayllaraq uyariruspan bibliamanta astawan yachay munaq sipasmanta. ¿Imatam paymanta yachanchik?

⁴ Bibliamanta estudiachinapaqyá nisun. Wakin runakunaqa Diosmanta chayllaraq uyariwaspanchikmi bibliamanta astawan yachayta munanku. Rimarisun Canada nacionpi sipasmanta. Payqa carretachaman asuykuspam Kusisqa kawsakunapaq folletonchikta hurqukuykurqa. Chaypi kaq iñiqmasinchikñataqmi nirqa chay folletowan mana qullqillapaq yachachisqanchikta. Estudiayta munasqanraykum iñiqmasinchikman celularninpa numeronta quykurqa. Hina chay punchawllataqmi mensajeta apachirqa haykapi estudianankumanta tapuspan, chaymi iñiqmasinchikqa nirqa semana tukuyta estudianankupaq. Sipasñataqmi nirqa: “¿Manachu paqarillan kanman?”, nispa. Hinaptinmi paqarintillan estudiayta qallaykurqaku, hina chay semana tukuyllatataqmi huñunakuymanpas rirqaña.

5. ¿Imakunatam ruwachwan wakinku biblia estudiayta munanankupaq? (Qawaytaq fotokunatapas).

⁵ Manam lliwchu rimamusqanchik sipas hina kanku. Wakinku Diosmanta yachayta munanankupaqqa imapas yachay munasqankumantam paykunawan rimachwanchik. Paykunawan rimanapaq mana amiruspa kutiptinchikqa yaqapaschá yanapay munasqanchikmanta cuentata qukuspanku biblia estudiayta munanmanku. ¿Ima nispataq nichwan biblia estudiayta qallaykunankupaq? Chaytam tapurqaniku mana sasachakuspalla bibliamanta estudiachiyta qallaykachiq achka iñiqmasinchikkunata. Qatiqninpiyá yachaykusun ima nisqankumanta.

6. ¿Imakunatam yachay munaqta nichwan kutispa bibliamanta yachachinapaq?

⁶ Experienciayuq chaynataq precursor kaq iñiqmasinchikkunam nirqaku “bibliamanta estudiasun” ninanmantaqa “bibliamanta rimasunchik, parlasunchik” utaq “bibliamanta astawan yachasunchik” niy aswan allin kasqanta. Kutinanchikpaq hinam nichwan: “Bibliaqa tukuy ima tapukusqanchikkunamantam riman, chayqa ancha admirakuypaqmi ¿aw?”, nispa. Utaqmi nichwan: “Bibliaqa manam religionllamantachu riman, kantaqmi sumaq consejokunapas allinlla kawsakunapaq”, nispa. Chaymantañataqmi nichwan: “10 utaq 15 minutollapim qampas chaykunamanta yachawaq”, nispa. Manam ninanchikraqchu sapa semana watukuy munasqanchikmantaqa. Chaynata niptinchikqa obligasqa hinam sientekunmanku.

7. ¿Imaynatam achka runakuna cuentata qukunku Diosmanta imam kaqta yachachisqanchikta? (Rimarimuytaq 1 Corintios 14:​23-25 nisqanmantapas).

⁷ Huñunakuyman hamunanpaqyá nisun. Apostol Pablopa tiemponpi runakunaqa yaqachusmi huñunakuykunaman chayllaraq rispanku cuentata qukuqku Diosqa paykunawan kasqanta (leey 1 Corintios 14:​23-25). Chaynam kay tiempopipas achka runakuna huñunakuyninchikpi Diosmanta imam kaqta yachachisqanchikta cuentata qukuspanku payta serviyta munanku. Kusisqa kawsakunapaq libronchikpa 10 kaq yachachikuyninpim rimachkan huñunakuyman riyqa imanasqa ancha allin kasqanmanta. Ichaqa manam chay yachachikuyman chayaytaraqchu suyananchik. Chayllaraq rimaspam uyariwaqninchikta nichwan semana tukuyta huñunakuyninchikman hamunanpaq. Chaypaqqa nichwanmi chay punchaw imamanta yachanamanta chaynataq willakuq qillqanchikpi imamanta yachanamantapas.

8. ¿Imakunamantam willachwan pitapas huñunakuyman hamunanpaq nispaqa? (Rimarimuytaq Isaias 54:13 nisqanmantapas).

⁸ Huk kutipim willakuq qillqanchikmanta yachanapaq huñunakuyman chayllaraq riq warmi yachachiqninta tapurqa: “¿Ñawpaqmanta tapumuqqa sapakamapa sutintachu yachan?”, nispa. Hinaptinmi iñiqmasinchikqa nirqa huk familia hinalla kasqanchikrayku sutinchikmanta riqsinakusqanchikta. Payñataqmi nirqa iglesiankupiqa mana ancha riqsinakusqankuta. Pitapas huñunakuyninchikman hamunankupaq nispaqa willananchikmi huñunakuyninchikkunaqa mana huk religionkunapa hina kasqanta (leey Isaias 54:13). Willananchiktaqmi Jehova Diosta yupaychananchikpaq, paymanta yachananchikpaq chaynataq kallpanchanakunanchikpaq huñunakusqanchikmantapas (Heb. 2:12; 10:​24, 25). Huñunakuyninchikkunapiqa manamá chaqwataqa nitaq ima costumbretapas ruwanchikchu, aswanqa allin preparasqa yachachikuykunatam uyarinchik (1 Cor. 14:40). Chaymantapas, huñunakunanchik wasikunaqa allinta yachananchikpaq hina ruwasqam kachkan. Huñunakuyninchikpiqa manam politicamantaqa rimanchikchu nitaq mayqin partidoman sayapakuymantapas rimanchikchu. Manataqmi imaraykupas qaqchanakuchkaq hinaqa rimanchikchu. Huñunakuyninchik imayna kasqanta yachanankupaqmi qawachichwan ¿Imaynataq huñunakuyniykuqa? sutiyuq videota.

9, 10. ¿Imata piensaspankum wakinkuqa huñunakuyman hamuyta mana munankuchu? ¿Imakunatam nichwan? (Qawaytaq fototapas).

⁹ Wakinkuqa manam huñunakuyninchikman riyta munankuchu testigoña kananpaq hikutananchikta piensaspanku. Chaymi willananchik huñunakuyninchikqa mana testigo kaqkunapaqpas kasqanta. Munaspanqa rispanmi tiyaykuspallan uyarikunman. Manam pipas ninqachu rimarinanpaqqa nitaq religionninmanta cambiakunanpaqqa. Churi-wawayuqkunatapas nichwanmi warmakunallapaq sapaq huñunakuyqa mana kasqanta. Paykunawan kuska yachachikuyta uyarinankupaqmi nichwan, chaynapi warmanku maypi kasqankuta, ima yachasqankuta paykunapas yachanankupaq (Deut. 31:12). Nichwantaqmi qullqitaqa mana mañasqanchikta. Ñuqanchikqariki Jesustam kasukunchik, paymi nirqa: “Qamkunaqa mana imallapaqmi chaskirqankichik, mana imallapaqtayá qumuychikpas”, nispa (Mat. 10:8). Huñunakuyman imayna pachasqa rinanmanta tapuwaptinchikqa nichwanmi pachanqa mana suma-sumaqraq nitaq musuqraq kananmanta. Diosqariki sunqunchiktam qawan (1 Sam. 16:7).

¹⁰ Tukuytayá ruwasun huñunakuyninchikman chayllaraq hamuq runamasinchik hawka hinaspa kusisqa kananpaq. Biblian mana kaptinqa biblianchikpi maskaspam qawachichwan yachachimuqpa nisqan textokunata. Yanapachwantaqmi yachachimusqanta qatinanpaqpas. Chaymantapas punta apaqkunatawan wakin iñiqmasinchikkunatam riqsiykachichwan. Huñunakuyninchikpi kusisqa kaspanqa kutimuytapaschá munanqa.

BIBLIAMANTA YACHACHIYTA QALLAYKUSPA

11. ¿Imakunatam ruwananchik pimanpas bibliamanta yachachiyta qallaykuspaqa?

¹¹ Pimanpas bibliamanta yachachiyta qallaykuspaqa nisqanchik horapi chayaspam yachachinanchik. Chaytam ruwananchik llaqtanchikpi runakuna imatapas horallanpi mana ruwaptinkupas. Yachachiyta qallaykuspaqa manam unaytachu yachachinanchik. Experienciayuq iñiqmasinchikkunam consejawanchik wasiyuq astawan yachayta munaptinpas ninakusqanchik tiempollapi yachachinapaq. Chaymantapas manam llumpaytachu rimananchik, chaynapi uyariwaqninchik astawan rimananpaq (Prov. 10:19).

12. Pitapas bibliamanta estudiachiyta qallaykuspaqa, ¿pikuna kuyanankutam munanchik?

¹² Pitapas bibliamanta estudiachiyta qallaykuspaqa munanchikmi Jehova Diostawan Jesusta riqsispa kuyananta. Chaypaqqa bibliawanmi tukuy imata yachachinanchik yachasqallanchikta willanamantaqa (Hech. 10:​25, 26). Chaytam ruwarqa apostol Pablopas. Payqa astawanqa Jesucristomantam yachachiq. Jesucristomriki kay allpa pachaman hamuspan yanapawarqanchik taytanta riqsispa kuyananchikpaq (1 Cor. 2:​1, 2). Chaymantapas Pabloqa iñiqkunatam kallpancharqa chayllaraq iñiqkunata allin iñiyniyuq, yachayniyuq, allin tantiaq chaynataq Diosta manchakuq kanankupaq yanapanankupaq (Sal. 19:​9, 10; Prov. 3:​13-15; 1 Ped. 1:7). Chayna kayqa quri, qullqi hinaspa alaqa rumikuna hina ancha valorniyuqmi (1 Cor. 3:​11-15). Pablo hinayá yachachisqanchikkunata yanapasun allin iñiyniyuq kanankupaq chaynataq Jehova Dioswan allin amistad kanankupaq (2 Cor. 1:24).

13. ¿Imaynatam yachachisqanchik runawan pacienciakuq kachwan? (Rimarimuytaq 2 Corintios 10:​4, 5 nisqanmantapas, qawaytaq fototapas).

¹³ Diosmanta yachachispaqa Jesus hina pacienciakuqyá kasun. Amayá pinqachinapaq hinaqa imatapas tapusunchu. Yachachisqanchikmanta mayqintapas mana entiendeptinqa hinallayá yachachisun, hinaspayá hukpiña mana entiendesqanmanta rimarisun. Ima piensasqanpas bibliapa nisqanman hina mana kaptinqa amayá hikutasunchu chaylla cambiananpaqqa. Tiempopa pasasqanman hinam Jehova Diosta astawan kuyasqanrayku chayna piensasqantaqa cambianman (Juan 16:12; Col. 2:​6, 7). Bibliapiqa pantay yachachikuykunatam tupachin sasa tuñichina alli-allin takyasqa pirqawan (leey 2 Corintios 10:​4, 5). Pantay yachachikuykunapi manaña hapipakunanpaqqa puntatam yanapananchik Jehova Diospi tukuy sunqunwan hapipakunanpaq (Sal. 91:9).

YACHACHISQANCHIK RUNA HUÑUNAKUYMAN HAMUPTIN

14. ¿Imaynam kananchik huñunakuyninchikkunaman hamuqkunawan?

¹⁴ Jehova Diosqa munan haykam huñunakuyninchikkunaman hamuqkunata kuyananchiktam maymantaña kaptinkupas, apuña utaq wakchaña kaptinkupas (Sant. 2:​1-4, 9). Chaypaq imakunata ruwananchikmantayá astawan yachaykusun.

15, 16. ¿Imatam ruwananchik mana testigo kaqkunapas huñunakuyninchikpi kusisqa kanankupaq? Ichaqa, ¿imatam mana ruwananchikchu?

¹⁵ Wakin runakunaqa huñunakuyninchikmanqa hamunku imayna kasqanta yachaykuyta munaspallankum, utaq hukkaqnin iñiqmasinchik rinanpaq nisqanraykum. Chaymi huñunakuyninchikman chayllaraq pipas hamuruptinqa kusikuywan chaskiykunanchik. Ichaqa manam imatapas ninachu nitaq ruwanachu hukmanyachinapaq hinaqa. Niykuchwanmi ñuqanchikwan tiyananpaq, hinaspapas bibliata hinaspa qillqanchikkunatam quykuchwan, utaqmi ñuqanchikpata prestaykuchwan. Huk runam willakun huñunakuyninchikman chayllaraq riruspan iñiqmasinchikkuna hina mana pachasqa kasqanrayku pinqakusqanmanta. Ichaqa huk iñiqmasinchiksi nisqa Jehova Diospa testigonkunaqa wakin runakuna hinalla kasqanchikta, chaynapi imayna pachasqa kasqanmanta ama pinqakunanpaq. Chay runaqa manam haykapipas qunqarqachu iñiqmasinchikpa chayna nisqantaqa, hinaspam tiempopa risqanman hina bautizakururqa. Huñunakuyninchikkunaman chayllaraq hamuqkunata kuyakuywan chaskiykuspapas manam vidanmantaqa tapupayanachu hukmanyachinapaq hinaqa (1 Ped. 4:15).

¹⁶ Huñunakuyninchikkunamanqa mana testigo kaqkunapas hamusqantam yuyarinanchik. Chaymi paykunamantaqa utaq imapas creesqankumantaqa ima mana allintapas mana rimananchikchu. Imapas nisqanchikwan sientirachiptinchikqa manañam kutimuyta munanmankuchu (Tito 2:8; 3:2). Chaynaqa, manam allinchu kanman huk religionpa imapipas creesqanku mana valeq kasqanta niyninchikqa (2 Cor. 6:3). Ñawpaqmanta yachachimuq iñiqmasinchikkunaqa astawanraqmi chaykunataqa yuyarinanku. Chaymantapas, testigokunallapa rimasqanchik palabrakunatam allinta entiendechinanku mana testigo kaqkunapas entiendenankupaq.

17. ¿Imatam chaylla ninanchik Diosmanta yachay munaqta tariruspaqa?

¹⁷ Punchawkuna pasasqanman hinam Diosmantaqa astawan willakunchik, hinaspam ‘wiñaypaq kawsanankupaq kallpanchakuqkunata’ tarichkanchikraq (Hech. 13:48). Diosmanta yachay munaqta tariruspaqa chayllam ninanchik bibliamanta estudiachinapaq chaynataq huñunakuyninchikkunaman hamunanpaq. Chayta ruwaspaqa yanapachkanchikmi ‘kawsayman apaq ñanninta’ rispa wiñaypaq kusisqa kawsakunanpaq (Mat. 7:14).