Hukkunapaq mañakuytaqa amayá qunqasunchu

1. ¿Imaynatam yachanchik mañakusqanchikta Dios uyariyta munasqanta?

JEHOVA DIOSMI churin Jesustawan angelkunata kamachin tukuy imapi yanapanankupaq (Sal. 91:11; Mat. 28:18). Chaywanpas, manam paykunatachu kamachin serviqninkunapa mañakusqanta uyariysinanpaqqa, aswanqa kikinpuni uyarinanpaqmi tantiarqa. Chaymi bibliapi nin “pipapas mañakusqanta uyariq” kasqanta (Sal. 65:2). Chaymi anchata agradecekunchik Diosta mañakuyta atisqanchikmanta.

2. ¿Imatam Pablo hukkunapaq ruwarqa? ¿Imaynatam qatipakuchwan?

² Tukuy ima llakinchikkunamantam Jehova Diosmanqa willakuchwan. Chaywanpas, manam qunqananchikchu hukkunapaq mañakuytaqa. Chaytam ruwarqa apostol Pablopas. Paymi Efeso llaqtayuq iñiqmasinkunata nirqa: ‘Tukuy tiempom qamkunapaq Diosta mañakuchkani’, nispan (Efes. 1:16). Pabloqa mañakurqataqmi sapakamapaqpas. Timoteoman qillqaspanmi nirqa: “Tuta-punchaw ruegakuspaymi tukuy tiempo qamta yuyarispay Diosta agradecekuni”, nispan (2 Tim. 1:3). Pabloqa llakinkunamanta Diosman willakunan kaptinpas tiempochakurqam hukkunapaq mañakunanpaqpas (2 Cor. 11:23; 12:​7, 8).

3. ¿Imanasqam wakinpiqa qunqaruchwan hukkunapaq mañakuyta?

³ Wakinpiqa hukkunapaq mañakuytam qunqaruchwan. ¿Imanasqa? Chaymanta rimaspanmi Sabinaa nin: “Sapa punchawmi tukuy ima ruwayniyuq kanchik. Chaymantapas, sasachakuyllanchikpi umayuq kaspaqa kikinchikpa necesitasqallanchiktam mañakuchwan”, nispa. Chaymi kay yachachikuypi yachasun hukkunapaq mañakuy imanasqa ancha allin kasqanmanta hinaspa hukkunapaq mañakunapaq imakunata ruwanamanta.

¿IMANASQAM ANCHA ALLIN?

4, 5. ¿Imanasqam nichwan hukkunapaq Diosta mañakusqanchik anchata yanapasqanta? (Rimarimuytaq Santiago 5:16 nisqanmantapas).

⁴ Hukkunapaq ‘mañakusqanchikqa anchatam yanapan’ (leey Santiago 5:16). ¿Ciertotachu hukkunapaq mañakuspaqa imayna tarikusqankuta cambiayta atichwan? Arí. Jesusqa yacharqañam Pedro neganantaqa. Chaymi nirqa: ‘Qampaqmi Diosta mañakuruni iñiyniki mana pisinanpaq’, nispan (Luc. 22:32). Pablopas yacharqam paypaq Diosta mañakusqanku anchata yanapasqanta. Chaymi Roma nacionpi presochasqa kaspan Filemonman qillqarqa: “Diosta mañapuwasqaykichikwanmi qamkunaman kaqmanta hamuyta munachkani”, nispan (Filem. 22). Mañakusqankuman hinamá Pabloqa manapas unaymanta kacharisqa kaspan kaqmanta Diosmanta willakurqa.

⁵ Hukkunapaq mañakuspanchikqa manamá mañakusqanchikman hinapuni imatapas ruwananpaqchu Diosta kamachichkanchik. Chaywanpas preocupakusqanchikta yachaspanmi mañakusqanchikman hina wakinpiqa ruwanman. Chayta yachaspam imapas preocupawasqanchikmanta astawanraq willayta munanchik, hinaspam mana iskayrayanchikchu ñuqanchikpaq allin kaqta ruwananmantaqa (Sal. 37:5; qaway 2 Corintios 1:11 nisqanpaq willakuyta Biblia de Estudio nisqanpi).

6. ¿Imayna kanapaqmi yanapawanchik hukkunapaq mañakuyqa? (Rimarimuytaq 1 Pedro 3:8 nisqanmantapas).

⁶ Hukkunapaq mañakuyqa ‘sunqumanta llakipayakuq’ kanapaqmi yanapawanchik (leey 1 Pedro 3:8). Sunqumanta llakipayakuq kaspaqa pipas sasachakuypi kasqanta yacharuspam chaylla yanapaykuyta munasun (Mar. 1:​40, 41). Punta apaq Maycolmi nin: “Hukkunapaq mañakuspayqa imakunawan sasachakusqankutam astawanraq entiendeni, hinaspapas astawanmi kuyani. Paykuna mana yachaptinkupas hichpallankupi hinam tarikuni”, nispan. Punta apaq Richarpas kaynatam nin: “Pipaqpas mañakuspanchikqa astawanmi yanapayta munanchik. Paypaq imallatapas ruwaykapuspaqa mañakusqanchikman hina Dios yanapaykunanpaqmi yanapakuchkanchik”, nispan.

7. ¿Imatam yuyarisun sasachakuypi tarikuspapas hukkunapaq mañakuspaqa? (Rimarimuytaq Filipenses 2:​3, 4 nisqanmantapas, qawaytaq fotokunatapas).

⁷ Hukkunapaq mañakuspam cuentata qukusun mana ñuqallanchik sasachakuypi kasqanchikta (leey Filipenses 2:​3, 4). Kay pachata satanas kamachisqanraykum llapallanchik sasachakuykunapi tarikunchik (1 Juan 5:19; Apoc. 12:12). Hukkunapaq mañakuspam yuyarisun ‘enteron pachapi lliw iñiqmasinchikkunapas ñuqanchik hina ñakarisqankuta’ (1 Ped. 5:9). Katerin sutiyuq precursora iñiqmasinchikmi nin: “Hukkunapaq mañakuspaymi yuyarini paykunapas ñuqa hina sasachakuypi kasqankuta. Chaymi mana sasachakuyllaypi umayuqchu kani”, nispan.

¿PIKUNAPAQTAQ MAÑAKUCHWAN?

8. ¿Pikunapaqtaq mañakuchwan?

⁸ Diostam mañakuchwan unquqkunapaq, yuyaqkunapaq hinaspa colegiopi kaq musu-sipaskunapaq. Paykunamantam hukkuna burlakunku hinaspa Diosta mana kasukunankupaq hikutanku. Wakin iñiqmasinchikkunatañataqmi familianku utaq gobiernokuna chiqninku Diosta servisqankurayku (Mat. 10:​18, 36; Hech. 12:5). Wakinkuñataqmi wasinkumanta ayqikurqaku chay llaqtapi runakuna autoridadkunapa contranpi hatarispanku wañuchinakuptinku utaq imapas pasasqanrayku. Manapaschá chay iñiqmasinchikkunataqa sapakamatachu riqsinchik. Chaywanpas, paykunapaq mañakuspam kuyanakunanchikpaq Jesuspa kamachisqanta kasukuchkanchik (Juan 13:34).

9. ¿Imanasqataq mañakunanchik Diospa llaqtanpi yanapakuq iñiqmasinchikkunapaqwan señorankupaq?

⁹ Mañakuchwanmi enteron allpa pachapi Diospa llaqtanpi punta apaqkunapaqwan yanapaqninkunapaqpas, betel wasimanta cuentallikuqkunapaqpas, sapa betel wasipi imapas ruwaymanta encargakuqkunapaqpas, llaqtan-llaqtan watukuqkunapaqpas, congregacionpi punta apaqkunapaqpas chaynataq yanapaqninkunapaqpas. Paykunaqa sapakama sasachakuyniyuq kaspankupas yanapawananchikpaqmi tukuyta ruwanku (2 Cor. 12:15). Llaqtan-llaqtan watukuq Markosmi nin: “Tayta-mamay yuyaq hinaspa unquq kasqankuraykum paykunamanta karupi kaspay llumpayta llakikuni. Paniywan qusan kuyakuywan uywaptinkupas anchatam llakikuni astawan yanapayta mana atispay”, nispa. Ima sasachakuypi tarikusqankuta mana yachaspapas paykunapaq mañakuyqa ancha allinmi (1 Tes. 5:​12, 13). Mañakuchwantaqmi sapakamapa señorankupaqpas. Paykunamiki qusankuta tukuy imapi yanapanku congregacionpi iñiqmasinchikkunata hinalla yanapanankupaq.

10, 11. ¿Kusikunchu Jehova Dios achka iñiqmasinchikkunapaq mañakuptinchik?

¹⁰ Yachamusqanchikman hinam achka iñiqmasinchikkunapaq mañakunchik sapakamapa sutinkuta mana yachaspanchikpas. Ichapas mañakunchik Diosta servisqankurayku carcelpi kaqkunata utaq ayllunku wañukuptin llakisqa tarikuqkunata Dios yanapananpaq. Donald sutiyuq punta apaqmi nin: “Achka iñiqmasinchikkuna sasachakuypi tarikusqankuraykum pitapas mana qunqayta munaspa llapallankupaq Diosta mañakunchik”, nispa.

¹¹ Manamá yachanchikchu sapakama iñiqmasinchik imawan sasachakusqantaqa, chaymi llapallankupaq Diosta mañakuyqa ancha allin. Chaywanqa Jehova Diospas anchatam kusikun (Juan 17:20; Efes. 6:18). Chay ruwasqanchikwanmi sutillata qawachinchik llapallan iñiqmasinchikkunata kuyasqanchikta (1 Ped. 2:17).

¿IMAKUNATAM RUWACHWAN MAYQAN IÑIQMASINCHIKPAQPAS MAÑAKUSPAQA?

12. ¿Imaynatam iñiqmasinchikkunapa imayna tarikusqankuta yachay yanapawasun paykunapaq mañakunapaq?

¹² Pipaqpas mañakunapaqqa imayna tarikusqantayá allinta yachasun. Achka iñiqmasinchikkunapaq mañakuspapas mañakuchwanmi sapakamapaqpas. Mañakuchwanmi mana hampiy atina unquywan unquq iñiqmasinchikpaq, estudiaqmasinkuna tukuyta niptinku hukmanyasqa iñiqmasinchikpaq utaq Jehova Diospa yachachisqanman hina churinta utaq wawanta sapallan uywaq iñiqmasinchikpaq (Efes. 6:4). Iñiqmasinchikkuna imayna tarikusqankuta yachaspaqa ima necesitasqankutam entiendesun, chaynapim sapakamapaq mañakuyta atisun (Rom. 12:15).b

13. ¿Mañakuchwanchu mana riqsisqanchik iñiqmasinchikkunapaqpas?

¹³ Sutinta rimaspayá mañakusun. Iñiqmasinchikkunata mana riqsispapas sutinta rimaspam mañakuchwan. Chaypaqmi sutinkuta maskachwan jw.org nisqanpi. Chaypim kachkan Crimea, Eritrea, Rusia hinaspa Singapur nacionkunapi presochasqa iñiqmasinchikkunapa sutin.c Llaqtan-llaqtan watukuq iñiqmasinchik Brayanmi nin: “Carcelpi kaq iñiqmasinchikpa sutinta qillqaruspaymi uyarikuqta leeni, chaynapi paypaq mañakuspay sutinta mana qunqarunaypaq”, nispan.

14, 15. ¿Imaynatam yachachwan iñiqmasinchikkunapaq ima mañakuyta?

¹⁴ Imapi yanapaykunanpaqyá Diosta mañakusun. 6 parrafopi rimamusqanchik Maycol hinam ruwachwan. Paymi nin: “Carcelpi kaq iñiqmasinchikkunamanta jw.org nisqanpi leespaymi yuyaymanani paykuna hina kaspay imayna tarikunaypi. Carcelpi kaspayqa señoray imayna kananmantachá preocupakuyman. Chaypi piensaymi yanapawan carcelpi kaq casarasqa iñiqmasinchikkunapaq Diosta mañakunaypaq”, nispan (Heb. 13:3).

¹⁵ Presochasqa kaq iñiqmasinchikkuna sapa punchaw ima necesitasqankupi yuyaymanaspaqa imapaq mañakuytam astawan yachasun. Diostam mañakuchwan guardiakuna mana ñakarichinankupaq utaq Diosmanta yachananta carcelpi autoridadkuna mana harkakunankupaq (1 Tim. 2:​1, 2). Mañakuchwantaqmi congregacionninpi iñiqmasinchikkuna Diosman sunqu kasqanta yachaspanku kallpanchasqa tarikunankupaqpas chaynataq mana testigo kaqkuna willakusqanchikta uyarinankupaqpas (1 Ped. 2:12). Chaykunatam ruwachwan huk sasachakuypi tarikuq iñiqmasinchikkunapaq Diosta mañakuspapas. Iñiqmasinchikkunapa imayna kasqanta allinta yachaptinchikqa, sutinkuta rimaspa hinaspa imapi yanapananpaq Diosta mañakuptinchikqa sutillam qawakunqa lliw iñiqmasinchikkunata anchata kuyasqanchik (1 Tes. 3:12).

RIQSIKUNANCHIKMI JEHOVA DIOSLLA IMAYNA YANAPAYTA YACHASQANTA

16. ¿Imatam riqsikunanchik Diosta mañakuspaqa? (Rimarimuytaq Mateo 6:8 nisqanmantapas).

¹⁶ Yachamusqanchikman hinam hukkunapaq mañakuyqa imayna kawsakusqankupi anchata yanapan. Ichaqa riqsikunanchikmi Jehova Dioslla imayna yanapayta yachasqanta. Hukkunapaq mañakuspaqa manamá Diospa mana yachasqantachu willachkanchik. Payqa manaraq willakuchkaptinchikmi yachanña imam necesitasqanchikta. Chaymi paytaqa mana consejachwanchu pitapas imaynata yanapananpaqqa (leey Mateo 6:8). Kaykamam yacharamunchik imakunarayku hukkunapaq mañakunamanta. Ichaqa, ¿imaraykupiwanmi mañakunanchik? Hukkuna allin kanankuta munaspanchikmi. Arí, paykunata kuyaspanchikmi mañakunchik. Chayna kuyakuq kaspa Jehova Diosta qatipakuptinchikmi payqa anchata kusikun.

17, 18. ¿Imaynatam yachanchik hukkunapaq mañakusqanchikta Jehova Dios yachasqanta? Rimarimuy iskay warmachayuq taytamanta.

¹⁷ Hukkunapaq mañakusqanchik mana yanapasqanpaq rikchakuptinpas Jehova Diosqa yachanmi kuyasqanchikrayku paykunapaq mañakusqanchikta. Chaypaqyá piensarisun iskay warmachayuq taytapi. Qari warmacha unquspan camapi kaptinmi warmi warmachaqa papanta sapa kuti nin: “Papáy, hermanochaymi nisyuta unquchkan, yanapaykullayá”, nispan. Chay taytaqa churinta kuyasqanraykum sumaqta atienden. Chaywanpas anchatam kusikun warmi churin hermanochanta kuyasqanrayku yanapaykunanpaq niptinqa.

¹⁸ Chaynam Jehova Diospas munan hukkunamanta preocupakusqanchikrayku paykunapaq mañakunanchikta. Chaynata ruwaptinchikqa Jehova Diosmi yachanqa mana kikillanchikpaq munaq kaspanchik iñiqmasinchikkunata anchata kuyasqanchikta (2 Tes. 1:3; Heb. 6:10). Chaymantapas, yachamusqanchikman hinam mañakusqanchikqa hukkunapa imayna tarikusqankuta cambiayta atinman. Chaynaqa, ¡amayá qunqasunchu iñiqmasinchikkunapaq mañakuytaqa!