Astawan yachay munaqkunapaq
¿Imatam kamachiqkunapa sunqunman Dios churanqaña?
Llumpa-llumpay ñakariy punchaw imayna qallaykunanmanta rimaspanmi Apocalipsis 17:16, 17 nin: ‘Rikusqayki chunka waqrakunam manchakuypaq animalpiwan chuchumikata chiqninqaku, hinaspam mana imayuqta chaynataq qalallata saqirunqaku, aychantapas mikurunqakum, hinaspapas pasaypaqtam kañaykunqaku. Chaynaqa kanqa paykunapa sunqunman [paypa piensasqanta] ruwanankupaq Dios churasqanraykum. Arí, llapallanku chaynallata piensaspankum manchakuypaq animalman atiyninkuta qunku kamachinanpaq’, nispa. Ñawpaqtam qillqanchikkunapi nirqa nacionkunata kamachiqkunapa “sunqunman” Diospa churananpaq piensasqanqa pantay religionkunata chinkachinanpaq kasqanta.
Kunanmi ichaqa chay entiendesqanchikta cambiananchik. Kamachiqkunapa “sunqunman” imata Dios churananmanta nispanqa rimachkan chay kamachiqkuna autoridadniyuq kasqankuta ‘manchakuypaq animalman’ qunankumantam. ¿Imaynatam cumplikunqa bibliapa chayna nisqan? Allinta entiendenapaqyá qatiqninpi tapukuykunamanta yachaykusun.
¿Imakunawantaq tupan Apocalipsis 17 capitulopi nisqanqa? ‘Hatun Babiloniawan’ sutichasqa “chuchumika” warmiqa tupan lliw pantay religionkunawanmi. ‘Manchakuypaq pukay-pukay animalñataqmi’ tupan Organización de las Naciones Unidas nisqawan. Chaytam nacionkuna hawkalla kananpaq rikurichirqaku 1919 watapi Sociedad de Naciones sutiwan (Apoc. 17:3-5). ‘Chunka waqrakunañataqmi’ tupan chay organizacionta yanapaq llapallan nacionkunawan.
¿Imatam biblia nin chuchumika warmiwan manchakuypaq animal imayna kasqankumanta? Ninmi chuchumika warmiqa chay manchakuypaq animalpi sillarayasqanta, chaywanmi yachanchik pantay religionkunaqa Organización de las Naciones Unidas nisqata yanapasqankuta utaq paykunapa munasqanta imatapas ruwachisqankuta.
¿Imam pasanqa chuchumika warmita? Manchakuypaq animalwan chunka waqrakunam chay warmita chiqninqaku. Arí, pantay religionkunapa tukuy imankuta qichuspanmi mana allin ruwasqankuta llapallankupa qayllanpi qawachinqaku. Chaymantam Diospa tantiasqanman hina qalaypaqta chinkachinqaku (Apoc. 17:1; 18:8). Chaynatam llapallan pantay religionkunaqa chinkachisqa kanqaku. Ichaqa manaraq chay pasachkaptinmi Jehova Diosqa kamachiqkunata ruwachinqa mana haykapipas ruwasqankuta.
¿Imatam Diosqa ruwachinqa chunka waqrakunawan rikchanachisqa nacionkuna kamachiqkunata? Yachamusqanchikman hinam Diosqa paypa piensasqanta kamachiqkunapa sunqunman churanqa, chaywanqa nichkan manchakuypaq animalpa utaq Naciones Unidas nisqapa makinman atiyniyuq hinaspa autoridadniyuq kasqankuta churanankumantam (Apoc. 17:13). ¿Kikinkumantachu kamachiqkunaqa chayta ruwanqaku? Manam. Bibliapim niwanchik chayta ruwanankupaqqa paykunapa sunqunman kikin Dios churananmanta (Prov. 21:1; tupachiy Isaias 44:28 nisqanwan). ¿Pisi-pisimantachu chay nacionkunaqa atiyniyuq kasqankuta Naciones Unidas nisqapa makinman churanqaku? Manam. Qunqaymantam. Atiyniyuq kasqankuta quykuptinkum Naciones Unidas nisqaqa Diospa munasqanman hina llapallan pantay religionkunata wiñaypaq chinkachinqa.
Chaynaqa, ¿ima pasanantam suyachkanchik? Manam noticiakunapiqa uyarisunchu pisi-pisimanta aswan achka nacionkuna Naciones Unidasta yanapanankumantaqa. Aswanqa Jehova Diosmi qunqaymanta kamachiqkunapa sunqunman churanqa atiyniyuq kasqankuta Naciones Unidaspa makinman churanankupaq. Chay pasasqanwanmi yachasunchik llumpa-llumpay ñakariy punchawqa qallaykunanpaqña kasqanta. Chaykamaqa “rikchachkaq hinallayá kasunchik, hinaspapas yuyaywanyá kawsasunchik”. Diospa palabranpa nisqanman hinam imakunapas qunqaymanta pasanqa (1 Tes. 5:6).