Respetaychikyá chayna runakunataqa
DIOSPA llaqtanpi punta apaq iñiqmasinchikkunam, cuentallikunku suqta ruwaykunamanta.a 1992 watamantapacham allin yuyayniyuq ancianokunata akllanku cuentallikusqanku ruwaykunapi yanapanankupaq. Yanapaqninkunaqa kay pachapi suyakuyniyuq iñiqmasinchikkunamantam kanku (Juan 10:16). Paykunam sapa semana rinku llamkasqankupi huñunakuyninkuman, punta apaqkunapa imapas yachay munasqankumantam willanku hinaspam yanapanku imatapas tanteanankupaq. Ichaqa Diospa llaqtanpi punta apaqkunam tanteanku ima ruwakunanpaqpas, yanapaqkunañataqmi qawananku chay tanteasqanku imayna ruwakusqanta. Paykunaqa ima llamkaytapas kusikuywanmi chaskinku. Chaymantapas Diospa llaqtanpi punta apaq iñiqmasinchikkunawan kuskam huk law nacionniyuqkunapaqwan hatun huñunakuymanpas rinku. Wakinpiñataqmi yanapakuq iñiqmasinchikkunaqa huk law nacionkunapi betel wasikunata watukunku Diospa llaqtanpi punta apaqkunapa rantinpi.
1992 watamantapacha chaypi yanapakuq huknin iñiqmasinchikmi willakun: ‘Llamkayniykuta allinta ruwaspaykuqa Diospa llaqtanpi punta apaqkunatam yanapaniku Diospa kamachisqanta tukuy sunqunkuwan ruwanankupaq’, nispa. Hukkaqnin iñiqmasinchikñataqmi 20 wataña yanapakun, payñataqmi nin: “Manam haykapipas piensarqanichu kayna llamkaypi yanapakuytaqa”, nispa.
Diospa llaqtanpi punta apaqkunaqa, achka llamkaykunatam yanapaqninkunamanqa qurqaku, chaymi yanapaqninkunataqa anchata chaninchanku. Ñuqanchikpas chaninchananchikmi chayna yanapakuq runakunataqa (Filip. 2:29).
a Ruwayninku imayna rakinasqa kasqanmanta yachanaykipaq qaway El Reino de Dios ya está gobernando, niq qillqapa 12 kaq yachachikuyninpi: “El Cuerpo Gobernante cuida de los intereses del Reino”, nisqanta.