¿Yacharqankichu?

¿Imanasqataq Jesusqa templopi rantikuqkunata “suwakuna” nirqa?

BIBLIAM Mateo 21:12, 13 nisqanpi nin: ‘Jesusmi templopi [...] rantikuqkunata hinaspa rantiqkunata llapallanta qarqururqa, tikrarurqataqmi qullqi cambiaqkunapa mesankuta chaynataq paloma rantikuqkunapa tiyanankunatapas. Hinaspam nirqa: “Qillqasqam kachkan: ‘Wasiyqa sutichasqam kanqa Diosta mañakuna wasiwan’, qamkunam ichaqa suwakunapa machayninta ruwarunkichik”’, nispa.

Ñawpaq tiempomanta willakuqkunam ninku templopi rantikuqkuna llumpay preciopi imatapas rantikusqankuta. Judiokunamanta willakuq qillqapipas ninmi: ‘Apostolkunapa tiemponpiqa 2 palomachakunatam rantikuqku 25 punchaw llamkaypa chanin qullqipaq’, nispa. Pipas 2 palomachakunata Diosman qunanpaq rantiyta munaspanqa chayna qullqiwanmi rantinan karqa. Diosqa nirqam palomachakunata utaq quqñuchakunata wakchakuna payman qunankupaq, ichaqa llumpay preciopi rantikusqankuraykum manaña rantiytapas atiqkuchu (Lev. 1:14; 5:7; 12:6-8). Simeon ben Gamaliel sutiyuq kamachikuq judio runam chaywan piñakuruspan nirqa Diosman qunankupaq kaqkunamanta wakillantaña qunankupaq. Chaymi 2 palomataqa rantikuqku iskay-kimsa hora llamkaypa chanin qullqillapiña.

Templopi chay rantikuqkuna kikillankupaq munaq kasqankurayku hinaspa llumpay preciopi imatapas rantikusqankuraykum Jesusqa “suwakuna” nispa suticharqa.