Diospa wasinta Jesus chuyanchasqanmanta

30 watapa yaqa abril killanpim Jerusalenman Jesus rirqa, achka runakunapas pascua fiestamanmi rirqaku. Wakinkum animalninkuta aparqaku Diospa wasinpi kañanankupaq, wakinkuñataqmi Jerusalenpiña rantiqku.

Jesusqa Diospa wasinman chayaruspanmi tarirurqa runakuna animalkunata chaypi rantikuchkaqta. ¡Jehova Diosta yupaychana wasipiraqmi rantikuchkasqaku! Chaymi Jesusqa waskamanta latigota ruwaykuspan ovejakunatawan vacakunata Diospa wasinmanta qarqururqa. Qullqi cambiaqkunapa mesankutapas tikraruspam chay qullqinkutapas maqchiparurqa. Paloma rantikuqkunatapas Jesusqa nirqam: “¡Kaykunata hurquychik! ¡Taytaypa wasintaqa amayá negocio ruwana wasita hinaqa ruwaychikchu!”, nispa.

Chaypi kaq runakunañataqmi mana imanakuytapas atispanku qawarqaku. Qatiqninkunam yuyarirurqaku Diospa akllasqan runaqa Diospa wasinta anchata kuyananmanta qillqasqa kasqanta.

33 kaq watapipas kaqmantam Jesusqa taytanpa wasin chuya kananpaq chaypi rantikuqkunata qarqururqa.