Religionpi kaqkunam Ucraniapi guerraman sayapakuchkanku ¿ima nintaq bibliapi chaymanta?

Rusiawan Ucrania nacion guerrapi kasqankumanta religionpi punta apaqkuna ima nisqankumanta yachaykusun.

• EUobserver periodicopim qillqarqaku: “Iglesia ortodoxa rusa nisqan religionpi umalliq Kirill sutiyuq runaqa manam imatapas nirqachu Rusia nacion Ucrania nacionta guerrawan ñakarichisqanmantaqa […]. Aswanqa iglesianpim Ucrania nacionmanta mana allinkunata rimarqa. Chayta valechikuspanmi presidentenku Putin Ucrania nacionta guerrawan ñakarichiyta qallaykurqa”, nispa (7 marzo 2022).

• AP News periodicopim qillqarqaku: “Umalliq Kirillmi […] nin Ucraniata guerrawan ñakarichisqankuqa huchata chinkachinapaq kasqanta. Chaynata nisqanwanmi nin Rusia nacionninpa ruwasqanqa allin kasqanta”, nispa (8 marzo 2022).

• The Jerusalem Post periodicopim qillqarqaku: “Iglesia ortodoxa ucraniana religionpi umalliq Epifanio I sutiyuqmi, lunes punchawta runakunata bendecispan kallpancharqa peleanankupaq. Nirqataqmi Rusiamanta soldadokunata wañuchiyqa mana hucha kasqanta”, nispa (16 marzo 2022).

• Consejo de Iglesias y Organizaciones Religiosas de Ucraniaa niqpim nirqaku: “Ucrania nacionniykuta defiendeq soldadokunapaqmi Diosta mañakuniku amparasqa hinaspa bendecisqa kanankupaq”, nispa (24 febrero 2022).

¿Allinchu kanman “Jesuspim iñiniku” niq religionkuna runakunata guerrapi wañuchinakunankupaq kallpanchayninku? ¿Ima niwaqtaq? ¿Imatataq bibliapiqa nin?

Religionkunaqa guerrakuna kananpaqmi yanapakurqaku

Ñawpaq tiempomantaraqmi achka religionkuna huk sunqulla kananchikta munaq tukuspanku guerra kaptinqa yanapakurqaku, utaq kikinku qallarichirqaku. Jehova Diospa testigonkunaqa unay watakunañam willakunku chaynata ruwasqankuqa mana allin kasqanmanta. Qillqanchikkunapi chaymanta ima nisqankumanta qatiqninpi yachaykusun:

• “Las cruzadas: ‘trágica ilusión’” niq yachachikuypim nin Iglesia catolica romana religion, Diospa hinaspa Cristopa munayninta ruwasqankuta niq tukuspanku achka runakunata ñakarichispa wañuchisqankumanta.

• “La Iglesia Católica y África” niq yachachikuypim nin runakuna llaqtamasintin chaynataq catolico kaqmasinkuta wañuchinakusqankumanta.

• “¿Tiene la culpa la religión?”, “El papel de la religión en las guerras” hinaspa “La religión toma partido” niq yachachikuykunapim nirqa sapa nacionpi clerigos catolicos, ortodoxos hinaspa protestantes niq religionpi kaqkunaqa guerra kaptin nacionninku ganananpaq sayapakusqankuta.

¿Sayapakunanchu guerrakuna kaptin Jesuspi iñiq religionqa?

Jesusqa kaynatam yachachirqa: “Runamasikitam kuyanki kikikita hina”, nispa (Mateo 22:39). Nirqataqmi: “Hinallayá kuyaychik enemigoykichikkunata”, nispa (Mateo 5:44-47).

Jesusqa kaynatam yachachirqa: “Munaychakuyniyqa manam kay pachapi kamachiqkunapa hinachu. Kay pachapi kamachiqkunapa hina kaptinqa serviqniykunam peleanman karqa judiokunaman mana entregasqa kanaypaq”, nispa (Juan 18:36). Nirqataqmi “espadata hapiqkunaqa espadawanmi wañuchisqa kanqaku”, nispa (Mateo 26:47-52).

Kaypi piensariy: Jesuspa qatiqninkunaqa manam Jesusta defiendenankupaqpas espadataqa hapinankuchu karqa. Ichaqa ¿allinchu kanman nacionninkuman sayapakuspanku runamasinkuta wañuchiyninku? Ñawpaq tiempopi Jesuspa qatiqninkuna paypa yachachisqanta kasukuspa kawsakusqankumanta yachanaykipaq leey “El cristianismo y la guerra: ¿son compatibles?” niq yachachikuyta.

¿Imataq pasanqa guerrakuna kananpaq yanapakuq religionkunata?

Bibliapiqa ninmi Jesuspa yachachisqanta mana kasukuq religionkunataqa Dios mana chaskisqanta (Mateo 7:21-23; Tito 1:16).

• Apocalipsis qillqapim nin Diospaqqa runakuna wañuchisqa kasqankumanta religionkuna huchayuq kasqankuta (Apocalipsis 18:21, 24). Chaymanta leey “¿Qué es Babilonia la Grande?” niq yachachikuyta.

• Jesusmi nirqa pantayta yachachiq religionkunataqa Jehova Dios chinkachinanmanta. Paykunaqa chinkachisqam kanqaku ‘mana allin ruruq sacha kuchurachikuspan ninaman wischuykachikuq’ hina (Mateo 7:15-20). Chay imayna kananmanta yachanaykipaq leey “¡Se acerca el fin de la religión falsa!” niq yachachikuyta.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images