¿Haykataq Jehova Diospa testigonkuna kanku enteron pachapi?

¿Pikunatam Jehova Diospa testigon nispa sutichaniku?

Jehova Diospa testigon nispaqa sutichaniku sapa killa Diosmanta willakuqkunallatam (Mateo 24:14). Paykunaqa kanmanmi bautizasqaña kaqkunapas utaq manaraq bautizasqa kaqkunapas.

¿Qunachu qullqita Jehova Diospa testigon kanapaq?

Manam. Manam qullqitaraqchu qunayki testigo kanaykipaqqa nitaq Diospa llaqtanpi imapipas yanapakunaykipaqqa (Hechos 8:18-20). Manam yachakunchu pikuna qullqi qusqankutaqa. Llapallan testigokunam Diospa llaqtanpiqa yanapakunku tiemponkuta, kallpankuta hinaspa qullqichankutapas Diospa munaynin ruwakunanpaq servichikuspanku (2 Corintios 9:7).

¿Imaynatam yachanku sapa killa hayka testigokuna Diosmanta willakusqankuta?

Sapa killam testigokunaqa hayka hora willakusqankumanta huk papelchapi qillqaspa maymi huñunakusqankupi punta apaqkunaman qunku.

Hayka willakusqankumanta lliwta yuparuspam sapa nacionpi betel wasiman apachinku. Betel wasiñataqmi qawasqanku nacionkunapi utaq llaqtakunapi hayka willakusqankumanta Estados Unidos nacionpi betel wasiman apachinku.

Wata tukuruptinñataqmi,a chayraq yachakun sapa nacionpi testigokuna hayka kasqankumanta. Chayqa yanapakunmi enteron pachapi hayka kasqankuta yachanapaqpas. Internetpim “Enteron allpa pachapi” niqpi tarinki sapa nacionpi hayka testigo kasqanmanta. Chay willakuykunamanta yachaspaykum anchata kusikuniku Jesuspa tiemponpi Diosta yupaychaqkuna hina (Hechos 2:41; 4:4; 15:3).

¿Jehova Diospa testigon nispachu sutichankichik huñunakuynikichikman riq runakunata hinaspa yachachisqaykichik runakunatapas?

Manam. Manaraq testigo kaptinkupas anchatam kusikuniku ñuqaykuwan huñunakuptinkuqa. Paykunamanta achkam Jesuspa wañukusqanta yuyarinapaq huñunakuyman hamunku. Paykuna hayka kasqankutaqa yachaymankum Jesuspa wañukusqanta yuyarinapaq huñunakuyman hayka hamusqankuta yupaspayku. 2024 watapim Jesuspa wañukusqanta yuyarinapaq huñunakuyman riqkuna karqaku 21,119,442 runakuna.

Achka runakunam huñunakuyniykuman mana rispapas bibliamanta wasinkupi mana imallapaq yachachisqa kachkanku. 2024 watapim sapa killa yaqa 7,480,146 runakunaman bibliamanta wasinkupi yachachirqaku. Wakinpiqa iskay-kimsamanmi chay ratulla yachachirqaku.

¿Imanasqataq censota ruwaptinkuqa aswan achka testigokuna kanku qamkunapa nisqaykichikmantaqa?

Censaspanku ima religionniyuq kasqankuta tapuptinkuqa achkam ninku “kay-utaq wak religionniyuqmi kani” nispa chay religionpi mana bautizasqa kachkaspanpas. Estados Unidospi censo ruwaqkunam nin: “Censota ruwaspaqa yachaytam munaniku runakuna ima religionniyuq kasqankuta, ichaqa runakunam allinpaq qawasqankuta religionta religionninpaq hapinku”, nispa. Ñuqaykum ichaqa testigokunataqa yupaniku Diosmanta sapa killa willakuqkunallata, manam yupanikuchu testigo kasqanpaq lliw hapikuqkunataqa.