¿Tukuy lawkunapichu Diosqa kachkan?
¿Imatam bibliaqa yachachin?
Diosqa tukuy imatam rikuchkan. Atiyniyuq kasqanraykum maymi kasqallanmanta imatapas ruwanman (Proverbios 15:3, Chuya Qellqa, CQ; Hebreos 4:13). Bibliaqa ninmi Diosqa hanaq pachallapi kasqanmanta, manam tukuy lawpi kasqanmantachu.
¿Imayna cuerpoyuqtaq Diosqa?: Diosqa manam aychayuq nitaq tulluyuqchu, payqa espiritum (Juan 4:24). Chaymi mana pi runapas Diostaqa rikuyta atinmanchu (Juan 1:18). Diosta kasukuq wakin runakunaqa musquyninkupi hina qawaspankupas Diostaqa tiyanallanpim rikurqaku (Isaias 6:1, 2, CQ; Apocalipsis 4:2, 3, 8).
¿Maypitaq yachan?: Diosqa hanaq pachapim yachan, chaypim kachkan yachananpaq sapaqchasqa sitio (1 Reyes 8:30, CQ). Bibliam willawanchik huk kutipi Jehova Diospaa qayllanman angelkuna risqanmanta, chaywanmi yachanchik Diosqa huk hawaqllapi kasqanmanta (Job 1:6, CQ).
Huk hawaqllapi Dios kaspanqa, ¿yaqachu yanapayta atiwanchikman?
Atinmanmi. Taytanchik Jehovaqa hanaq pachapi yachaspanpas kay pachapi yachaqkunataqa yanapawanchikmi. Payqa kamachikuynin ruwaqkunata hinaspa kasukuqninkunataqa qawamuwachkanchikmi yanapaykuwananchikpaq (1 Reyes 8:39; 2 Cronicas 16:9, CQ). ¿Imaynatam Diosqa yanapawanchik?
Mañakusqanchikta uyarispam: Jehova Diosqa maypiña imay horaña mañakuptinchikpas uyariykuwanchikmi (2 Cronicas 18:31, CQ).
Llakisqa kaptinchik sunqunchikta tiyaykachispam: Bibliam nin: “Tayta Diosqa, llakisqa sunquyuqkunapa hichpallanpim kachkan, payqa llakisqa sunquyuqkunatam salvaykun”, nispa (Salmos 34:18, CQ12).
Allin kawsakunapaq palabranwan yachachiwaspanchikmi: Jehova Diosqa palabranwanmi yachachiwanchik allin yachayniyuq kanapaq, chaynapi allinta tantiakuspa kusisqa kawsakunanchikpaq (Salmos 32:8, CQ).
Tukuy lawpi Dios kasqanmanta runakunapa nisqan
Wakin runakunam ninku: “Diosqa tukuy ima unanchasqanpim kachkan”, nispa.
Bibliapa nisqan: Diosqa manam kay pachapichu nitaq unanchasqankunapichu yachan (1 Reyes 8:27, CQ). Atiynin lucerokunapi hinaspa tukuy ima unanchasqankunapi sutilla kaptinpas (Salmos 19:1, CQ). Imaynam dibujaqpas mana imapas dibujasqanpichu yachan, chaynallataqmi Diospas mana unanchasqankunapichu yachan. Chaywanpas unanchasqakunata qawaspam yachachwan Diosninchikqa atiyniyuq, yachayniyuq chaynataq kuyakuq kasqanta (Romanos 1:20).
Wakin runakunam ninku: “Dios mana tukuy hinastinpi kaspanqa manachiki tukuy atiyniyuqchu nitaq tukuy yachayniyuqchu kanman”, nispa.
Bibliapa nisqan: Diosqa ancha-ancha atiyniyuqmi. Chayna atiyniyuq kasqanraykum tukuy imata yachan, chaynataq maymi kasqallanmanta imatapas ruwaykunman (Salmos 139:7, CQ).
Wakin runakunam ninku: “Salmos 139:8 willakun Diosqa tukuy lawpi kasqanta. Chaypim kaynata nin: ‘Cielokunaman wichariptiypas qamqa chaypim kachkanki. Wañuqkunapa kasqanman uraykuptiypas qamqa chaypim kachkanki’”, nispa.
Bibliapa nisqan: Bibliapa kay nisqanqa manam Dios tukuy lawpi kasqantachu niwachkanchik, aswanqa niwachkanchik maypiña tarikuptinchikpas Dios yanapaykuwananchikmantam.
a Bibliam nin Diospa sutinqa Jehova kasqanta.