¿Cheqaptapunichu Diosqa kanman?
Runakunam ninku:
◼ “Diosqa wayra hinam maypipas kachkan.”
◼ “Diosqa kachkanmi, ichaqa mana rikuy atina kallpallam”, nispa.
Jesusmi nirqa:
◼ “Taytapa kasqanpiqa achkam kachkan lugarkuna yachakunapaq”, nispa (Juan 14:2). Kaypi nisqanman hinaqa, Diospaqa kanmi yachanan sitio, chaymi Jesusqa nirqa “Taytapa kasqanpiqa” nispa.
◼ “Taytapa kasqanmantam hamurqani kay pachaman, kunanñataqmi kay pachata saqespay kutisaq Taytayman”, nispa (Juan 16:28). Qawasqanchikman hinaqa Jesusqa yacharqam Taytan maypi kasqantaqa.
JESUSQA manam haykapipas nirqachu, Diosqa mana rikuy atina kallpalla kasqantaqa. Aswanmi payqa Taytanwan rimarqa orakuspa. Chaymantapas anchatam kuyarqa chaymi nirqa ‘Taytay’ nispa (Juan 8:19, 38, 54).
Arí, ‘Diosqa espiritum’ hinaspapas manam ‘pipas Diostaqa haykapipas rikurqachu’ (Juan 4:24; 1:18). Ichaqa, manam chayraykuqa nichwanchu mana cuerpoyoq kasqantaqa. Bibliapa nisqanman hinaqa, “kanmi kay pachapaq cuerpo, kantaqmi espirituman hina cuerpopas” (1 Corintios 15:44). Hinaptinqa, ¿Diosqa espiritu cuerpoyoqchu?
Arí, Bibliapa nisqanman hinam Jesusqa wañukusqanmanta kawsariramuspan, ‘hanaq pachaman yaykurqa, chaynapi Diospa qayllanpi kaspan favorninchikpi rimananpaq’ (Hebreos 9:24). Kayna nisqanmi sutillata qawachiwanchik, Diospa yachanan sitio kasqanta, chaynataq espirituman hina cuerpoyoq kasqantapas.
Hinaptinqa yaqapaschá tapukunki, “¿imaynatam yanapawachwan maypiña kachkaptinchikpas?”, nispa. Arí, Diosqa chuya espiritunwanmi yanapawanchikman, maylawpiña tarikuspapas. Imaynam taytapas churinta yanapaykunanpaq makinta qaywarin, chaynam Diospas chuya espiritunta servichikun munayninta rurananpaq (Salmo 104:30; 139:7).
Chaymantapas Diosqa sentimientoyoqmi, yachantaqmi imakuna allin hinaspa mana allin kasqantapas. Bibliam niwanchik llaqtanta kuyasqanmanta, allinkunata ruraptin kusikusqanmanta, chaymantapas taytacha-mamacha yupaychayta cheqnisqanmanta, hinaspa mana allinkunata qawaspa llakikusqanmantapas (Genesis 6:6; Deuteronomio 16:22; 1 Reyes 10:9). Hinaspapas Salmo 104:31 versiculopim niwanchik Dios ‘kusikusqanmanta’. Hinaptinqa, Diosninchik chayna kasqanraykum mana sasachu Jesuspa nisqanman hina sonqomanta kuyayqa. (Marcos 12:30.)a
[Willakuy]
a Kay yachachikuymantam astawan yachanki, ¿Imatapunim Bibliaqa yachachin?, libropa punta kaq yachachikuyninpi. Kay libroqa Jehová Diospa Testigonkunapa rurasqanmi.
[8 kaq paginapi suti rikuylla kaq willakuy]
Imaynam taytapas churinta yanapaykunanpaq makinta qaywarin, chaynam Diospas chuya espiritunta servichikun munayninta rurananpaq.