MUSU-SIPASKUNAM TAPUKUNKU
¿Imatataq ruwayman mana allinkunallataña mana piensanaypaq?
¿Imayna runataq kanki?
Kusisqallaña
Valeriem nin: “Kusisqa kanaypaq hinaspa hukkunawanpas allinlla kanaypaqmi kallpanchakuni. Ancha allinmi sapa punchaw asiy-asiyllaña kayqa”, nispa.
Llakisqallaña
Rebecam nin: “Imapas allin kaptinqa piensanim mana allin kasqanta utaq mana cierto kasqanta”, nispa.
Entiendeq
Anam nin: “Kusisqallaña kaq runaqa imapas mana allin lluqsiptinmi llakisqa tarikun. Llakisqallaña kaq runañataqmi imawanpas piñasqallaña tarikun. Ichaqa entiendeq kasqaymi hawka tarikunaypaq yanapawan”, nispa.
¿Imanasqataq ancha allin?
Bibliapim nin: ‘kusisqa sunquyuq runaqa sapa punchawmi kusisqallaña’, nispa (Proverbios 15:15). Imapas llakikunapaq kaqkunapi mana piensaspankum kusisqa kaqkunaqa imawanpas mana chayllaqa hukmanyarunkuchu chaymi kusisqa kawsakunku, chaymantapas achka amistadniyuqmi kanku. Pimá munanman llakisqallaña kaqkunawan hukllawakuytaqa.
Chayna kaptinpas, kusisqallaña kaqkunapas vidankupi ima sasachakuypas kaptinqa hukmanyankum kaykunarayku:
Noticiakunapiqa lluqsimun guerrakunamanta, terroristakunamanta hinaspa suwakuykunamantam.
Lliw familiakunam sasachakuykunapi kanku.
Llapanchikmi mana tukuytachu ruwayta atinchik, chaymantapas pantaq runataqmi kanchik.
Wakinpiqa amistadninchikkunapas sienterachiwanchikmi.
Chay sasachakuykunataqa manam mana kaqpaqta hinaqa hapinaykichu nitaqmi chay sasachakuykunallapiña umayuqqa kanaykichu. Hinaspaqa manam imatapas llumpay mana allinpaqqa hapinkichu, manataqmi vidaykipi sasachakuy kaptinpas rabiasqallañaqa kankichu.
Llumpay sasachakuy kaptinpas aguantawaqmi, ima sasachakuypas allichakunanta yuyarispaykiqa.
Kaykunatam ruwawaq
Pantasqaykiwanqa amayá llumpaytaqa hukmanyaychu.
Bibliapim nin: “Kay pachapiqa manam pipas kanchu allinllata ruwaspa mana huchallikuqqa”, nispa (Eclesiastes 7:20). Runa kasqaykiraykum pantaq kanki, manam mana valeq kasqaykiraykuchu.
¿Imataq yanapasunkiman entiendeq kanaykipaq? Imatapas allinta ruwanaykipaq kallpanchakuy ichaqa ama piensaychu mana pantarunaykitaqa. Caleb sutiyuq musum nin: “Pantasqallaykunapi mana piensanaypaqmi kallpanchakuni”. Ninraqmi: “Aswanqa, chay pantasqaykunaraykum imatapas aswan allinta ruwayta yachani”, nispa.
Ama piwanpas tupachikuychu.
Bibliapim nin: “Amayá kikillanchikpaqqa imatapas munasunchu, amataqyá llallinakuq kanapaqqa pitapas tanqasunchu nitaq envidianakusunchu”, nispa (Galatas 5:26). Ichapas mana invitasunkichu kusirikunankupaq huñunakuyman utaq fiestaman rinaykipaq. Chaypi fotokusqankuta internetpi qawayllapi kaspaykiqa piñasqam hinaspa hukmanyasqam kanki. Hinaspaqa piensaytam qallaykuwaq kuyay amistadnikikuna chiqnisusqaykita.
¿Imataq yanapasunkiman entiendeq kanaykipaq? Entiendenaykim lliw kusirikuykunaman utaq fiestakunaman mana invitasunaykita. Chaymantapas, internetpi fotokuna churasqankuqa wakillanmi manam vidankupi lliw pasasqankuchu. Alexis sutiyuq sipasmi nin: “Pipas internetpiqa churan allin kaq fotonkunallatam”. Ninraqmi: “Manam churankuchu sapa punchaw imapas ruwasqankutaqa”, nispa.
Pacienciakuqyá kay, astawanraqyá familiaykiwanqa.
Bibliapim nin: “Atisqaykichikman hinayá kallpanchakuychik llapallan runakunawan hawkalla kawsakunaykichikpaq”, nispa (Romanos 12:18). Hukkunapa ruwasqankutaqa manam controlawaqchu, ichaqa kikikim controlakuwaq. Pacienciakuq kayqa kikikimantam.
¿Imataq yanapasunkiman entiendeq kanaykipaq? Pacienciayuq kanaykipaqyá kallpanchakuy, huk runakunawan allinlla apanakusqaykiman hinayá familiaykiwanpas mana piñanakuspalla kay. Melinda sutiyuq sipasmi willakun: “Lliwmi pantanchik chaymi wakinpiqa pitapas llakichinchik”. Ninraqmi: “Tantiakunanchikmi pitapas pacienciawan rimapayanapaq chaynapi allinlla kanapaq”, nispa.
Agradecekuq kay.
Bibliapim nin: “Agradecekuqtaqyá kaychik”, nispa (Colosenses 3:15). Agradecekuq kaspaykiqa allinkuna pasasusqaykipim astawanqa piensanki, manam mana allinkuna pasasusqaykipichu.
¿Imataq yanapasunkiman entiendeq kanaykipaq? Arí, sasachakuynikikunaqa kanqam ichaqa manam chayraykuchu llakisqallaña kanayki allinkuna pasasuptikipas. Rebeca sutiyuq sipasmi nin: “Sapa punchawmi allinkuna pasawasqanta anotani”. Ninraqmi: “Allinmi tarikuni tukuy ruwasqaykunawan kusisqa kasqayta yuyarispay”, nispa.
¿Amistadnikikunaqa imayna runakunataq kanku?
Bibliapim nin: “Mana allin kawsakuq runakunawan hukllawakuspaykichikqa allin kaqkuna ruwasqaykichiktam saqirunkichik”, nispa (1 Corintios 15:33). Hukkunamanta mana allinta rimaq, nanay simi, llakisqallaña kaqkunawan hukllawakuspaykiqa paykuna hinam qampas kanki.
¿Imataq yanapasunkiman entiendeq kanaykipaq? Amistadnikikunaqa sasachakuypi tarikuspankuqa yaqapaschá mana allinkunata ninqaku hinaspa llakisqa tarikunqaku. Chayna tarikuptinqa yanapaykuyá, ichaqa amayá sasachakuyninkuwanqa hukmanyaruychu. Michelle sutiyuq sipasmi nin: “Manam allinchu kanman llakisqallaña kaqkunawan amistadta armaruyqa”. Ninraqmi: “Amistadnikipas hinaspa qampas llakisqallaña kaspaykiqa manam yanapanakunkichikchu aswanqa astawan llakisqam tarikunkichik”, nispa.
¿Astawanraq yachayta munawaqchu?
‘Mana haykapipas qawasqanchik sasallaña punchawkunapi kasqanchiktam’ bibliapiqa nin (2 Timoteo 3:1). ¿Imaynatataq kusisqa kawaq sasachakuypa chawpinpi kawsakuspaykipas? Chaymanta astawan yachayta munaspaykiqa qaway “¿Dejaremos de sufrir algún día?” niqta.