Jehova Diosqa anchatam munan serviqninkuna kuyasqanta hinaspa chaskisqanta yachanankuta. Bibliapim willawanchik payqa churin Jesucristota ancha kuyasqanta hinaspa chaskisqanta iskay kutipi nisqanta (Mat. 3:17; 17:5). ¿Qampas munankichu Jehova Diosninchik chaynata nisunaykita? Payqa manañamiki Jesusta hinachu hanaq pachamantaqa rimapayamuwanchik, aswanqa bibliapa nisqankunawanmi. Apostolninkunata anchata kuyasqanmanta Jesuspa nisqanta leespanchikmi kikin Jehova Dios chaynata niwachkanchikmanpas hina tarikunchik. Jesusqa taytan hinamá imatapas ruwarqa. Chaymi Jesusqa qatiqninkunata nirqa pantaq kaptinkupas anchata kuyasqanmanta. Chayta leespam ñuqanchikpas kikin Jehova Dios chaynata niwachkanchikmanpas hina tarikunchik (Juan 15:​9, 15). Sasachakuypi tarikuspapas manam piensanachu Dios manaña chaskiwasqanchikrayku sasachakuykunapi tarikusqanchiktaqa. Aswanqa yuyarinanchikmi sasachakuykunata aguantaptinchikqa kuyasqanchikta hinaspa paypi hapipakusqanchikta Jehova Dios yachasqanta. w24.03 28 parrs. 10-11

Tayta-mama kaspaykiqa warmachaykitam yachachiwaq huñunakuypi atisqanman hina rimarinanpaq. Wakinpiqa huñunakuypim yachanchik casadokuna imawan sasachakusqankumanta utaq Jehova Dios ima huchakunata chiqnisqanmanta. Chayna kaptinpas wakin parrafokunapiqa warmachakunapas rimariytam atinmanku. Chaymantapas, tayta-mamakunaqa warmankutam entiendechinmanku wakinpiqa makinkuta huqariptinkupas imaynanpi yachachimuq rimarinanpaq mana nimunanmanta. Chayta entiendespankuqa manam hukmanyanqakuchu (1 Tim. 6:18). Llapallanchikmi huñunakuypiqa allinta preparakuspa rimarichwan Jehova Diosta hatunchanapaq hina, chaynataq iñiqmasinchikkunata kallpanchanapaq hina (Prov. 25:11). Wakinpiqa imapas pasawasqanchikmantam rimarichwan, ichaqa manam allinchu kanman ñuqallanchikmantaña llumpayta rimayninchikqa (Prov. 27:2; 2 Cor. 10:18). Kikillanchikmanta rimanamantaqa rimarichwanmi Jehova Diosmanta, palabranmanta chaynataq llaqtanmantapas (Apoc. 4:11). w23.04 24, 25 parrs. 17-18

Rikchan-rikchanlla kanapaqqa hinaspa yuyaywan kawsakunapaqqa kuyakuqmi kananchik (Mat. 22:​37-39). Jehova Diosta kuyasqanchikmi yanapawanchik sasachakuy kaptinpas hinalla willakunapaq (2 Tim. 1:​7, 8). Runamasinchikkunata kuyasqanchikraykutaqmi paykunaman willakunchik, chaymi celularwanpas utaq cartawanpas willakunchik. Manam ninchikchu “paykunaqa manam haykapipas cambianmankuchu”, nispaqa. Aswanqa piensanchikmi qipakunataqa mana allin ruwasqankuta saqispa allin kaqtaña ruwayta qallaykunankumanta (Ezeq. 18:​27, 28). Chaymantapas iñiqmasinchikkunatam kuyanchik, chaytam qawachinchik kallpanchanakuspa hinaspa sapa kuti yanapanakuspa (1 Tes. 5:11). Guerrapi peleaq soldadokunaqa yanapanakunkum, chaynam ñuqanchikpas mana haykaqpas iñiqmasinchiktaqa llullanchiktaqa sientechichwanchu nitaq mana allinta ruwawaptinchikpas mana allinwanqa kutichikuchwanchu (1 Tes. 5:​13, 15). Chaymantapas iñiqmasinchikkuna kuyasqanchiktam qawachinchik pusawaqninchik punta apaqkunata respetaspanchik (1 Tes. 5:12). w23.06 10 parr. 6; 11 parrs. 10-11