2 Samuel
11 Davidmi kamachirqa Joabta, runankunata hinaspa Israelpi llapallan soldadokunata Ammon runakunata wañuchimunankupaq. Chayqa karqa wata qallariytam* utaq kamachiqkuna peleaq lluqsinanku punchawkunapim. Davidpa kamachisqan runakunam Raba llaqtata chawpicharurqaku,+ Davidñataqmi Jerusalenllapi qiparqa.+
2 Huk kutipim Davidqa inti siqaykuytaña camanmanta hatariruspan wasinpa hawanpi purikuchkarqa. Hinaspanmi kuyayllapaq warmita rikururqa bañakuchkaqta. 3 Davidqa chay warmi pi kasqanta yachananpaqmi tapuchimurqa, hinaptinmi nirqaku: “Payqa Eliampa+ churin Bat-seba+ sutiyuq warmim, qusanñataqmi Het kasta+ Urias”, nispa.+ 4 Bat-sebata pusamunankupaqmi Davidqa kamachirqa.+ Bat-sebaqa chuyanchakuchkarqam* chay punchawkunaqa.+ Pusaramuptinkum Davidqa paywan puñururqa.+ Chaymantam Bat-sebaqa wasinman kutikurqa.
5 Bat-sebaqa wiksayakuruspanmi Davidman willachimurqa: “Wiksayakurunim”, nispa. 6 Chayta yacharuspanmi Davidqa Joabman willachimurqa: “Het kasta Uriasta kachamuway”, nispa. Chaymi Joabqa Uriasta Davidman kacharqa. 7 Urias chayaramuptinmi Davidqa tapurqa Joab hinaspa soldadokuna peleasqankupi imayna kasqankumanta. 8 Chaymantam Davidqa Uriasta nirqa: “Wasikiman rispayki samamuy”, nispa. Davidpa wasinmanta Urias lluqsiruptinmi runakuna qipanta rirqaku kamachiqpa apachisqanta qunankupaq. 9 Uriasqa wasinman mana rispanmi kamachiq Davidpa punkullanpi Davidpa runankunapiwan puñurqa. 10 Hinaptinmi Davidman willaykurqaku: “Uriasqa manam wasinmanqa risqachu”, nispa. Chaymi Davidqa Uriasta nirqa: “Karumanta kutimuchkaspaykiqa, ¿imanasqataq wasikimanqa mana kutinkichu?”, nispa. 11 Uriasñataqmi Davidta nirqa: “Diospa baulninpas,+ Juda ayllu soldadokunapas, wakin Israel ayllu soldadokunapas, kamachiwaqniy Joabpas hinaspa runankunapas hawa pampapi carpakunallapi kachkaptinkuchu, ¿ñuqañataq wasiyman yaykuyman mikukuq, tomakuq hinaspa warmiywan puñukuq?+ ¡Manapunim chaytaqa ruwasaqchu!”, nispa.
12 Hinaptinmi Davidqa Uriasta nirqa: “Kunanpas kay Jerusalenpiyá qipakuy. Paqarinñam aviasqayki”, nispa. Hinaptinmi Uriasqa paqarintinkama qipakurqa. 13 Davidqa mikunankupaq Uriasta qayarachispanmi sinkarachirqa. Chaywanpas Uriasqa wasinmanqa manam rirqachu tutaykaramuptinpas, aswanqa Davidpa runankunapa kasqanpim puñurqa. 14 Paqarintinmi Davidqa Joabman cartata qillqarqa, hinaspam Uriaswan apachirqa. 15 Chay cartapim nirqa: “Uriastayá churaruychik llumpay peleasqankupa puntanman, hinaspayá sapallanta saqiykuychik wañurachinankupaq”, nispa.+
16 Joabqa allintam yacharqa llaqtapa mayninpi allin peleaq Ammon soldadokuna kasqanta, hinaspanmi Uriasta chaypi churarurqa. 17 Chay Ammon soldadokunaqa Joabwan peleanankupaq lluqsimuspankum Davidpa wakin runankunata wañurachirqaku, wañurachirqakutaqmi Het kasta Uriastapas.+ 18 Hinaptinmi Joabqa Davidman willachimurqa peleasqankupi tukuy ima pasakusqanta. 19 Willakuq riq runatam Joab nirqa: “Kay peleasqanchikpi tukuy ima pasasqanmanta willayta tukuruptikiqa, 20 ichapas kamachiq Davidqa piñakuspan nisunki: ‘¿Imanasqataq peleaspaqa llaqtaman llumpayta asuykurqankichik? ¿Manachu yacharqankichik pirqamanta flechamusunaykichikta? 21 ¿Pitaq wañurachirqa Jerubesetpa+ churin Abimelecta?+ ¿Manachu huk warmi maraypi kutakuna rumita altomanta kachaykamuptin Tebez llaqtapi wañururqa? ¿Imanasqataq pirqaman llumpayta asuykurqankichik?’, nispa. Chaynata nisuptikiqa: ‘Uriaspas wañukunmi’”, nispam ninki.
22 Chaymi willakuq runaqa Davidman rispan Joabpa lliw nisqanta willarqa. 23 Chaymantam willakuq runaqa Davidta nirqa: “Ammon runakunaqa ñuqaykumanta aswan kallpasapam kasqaku, kaylaw pampakamam lluqsiramurqaku ñuqaykuwan peleanankupaq. Chaywanpas llaqtapa punkunkamam kutirirachirqaniku. 24 Hinaptinmi flechaqkunaqa pirqapa hawanmanta flechamuspanku wakin runaykikunata wañurachin. Chaypim Uriaspas wañukun”, nispa.+ 25 Chaynata willaykuptinmi Davidqa chay willakuq runata nirqa: “Joabta nimuy: ‘Ama llakikuychu, peleaypiqa pipas wañunmi. Astawan peleaspaykiyá llaqtata munaychakuy’, nispayki.+ Hinaspayá Joabta kallpanchamuy”, nispa.
26 Uriaspa warminmi qusan wañukusqanta yacharuspan llumpayta waqarqa. 27 Chaymanta qipatam Davidqa wasinman pusachimurqa. Chaymi Davidpa warminña kaspan churinta wachakurqa.+ Davidpa ruwasqanqa llumpay mana allinmi Jehova Diospaqqa karqa.+