2 Samuel

18 Davidmi paywan kaq soldadokunata yuparqa. Hinaspam churarqa 100 soldadokunapa chaynataq 1.000 soldadokunapa kamachiqninkunata.+ 2 Chaymantapas, Davidqa lliw runankunata kimsa tropaman rakiruspanmi kamachiqninkunata churarqa. Huknin tropapa kamachiqninmi karqa Joab,+ hukninpañataqmi Abisai.+ Paykunaqa karqaku Zeruyapa+ wawankunam. Huknin tropapa kamachiqninñataqmi karqa Gat llaqtayuq Itai.+ Chaymantam Davidqa runankunata nirqa: “Ñuqapas qamkunawanmi risaq”, nispa. 3 Runankunañataqmi nirqaku: “Manapunim riwaqchu.+ Qamqa 10.000 soldadokunamantapas astawanraqmi valenki.+ Ñuqayku lluptikuptiykupas utaq wakiqniyku wañuruptiykupas chiqnisuqnikikunataqa manam imapas qukunqachu. Chayraykuyá yanapamuwanaykikupaq llaqtallapi qipakuy”, nispa. 4 Kamachiq Davidñataqmi nirqa: “Qamkunapa nisqaykichiktam ruwasaq”, nispa. Chaymi Davidqa llaqtapa punkunpi qiparurqa. Runankunañataqmi pachakninpi hinaspa waranqanpi lluqsirqaku. 5 Davidmi Joabta, Abisaita hinaspa Itaita kamachirqa: “Churiy Absalontaqa amam imanankichikchu”, nispa.+ Davidpa chayna kamachisqantaqa llapallan runakunam uyarirqaku.

6 Davidpa runankunam Absalonta yanapaq Israel runakunawan peleaq rirqaku. Paykunaqa Efrain ayllupa allpanpim pelearqaku, chay peleasqankuqa karqa montellañam.+ 7 Davidpa runankunam Absalonpa runankunata wañurachirqaku.+ Chay punchawmi 20.000 runakuna wañururqaku. 8 Montepi peleaspankum karukunamanraq chayarurqaku. Chay montepi kasqankuraykum astawanqa wañururqaku espadawan wañunankumantaqa.

9 Absalonqa mulapi sillada richkaspanmi Davidpa runankunawan tuparurqa, hinaspanmi paykunamanta lluptikurqa. Lluptikuchkaptinmi mulaqa kallmasapa hatun sachapa ukunman yaykururqa. Chay sachapa kallmanmanmi Absalonpa chukchan arwikururqa, hinaptinmi sachapi warkurayaspa qiparurqa. 10 Chayna kasqanta rikuruspanmi huk runa Joabman willaykurqa:+ “Absalontam rikuramuni hatun sachapi warkurayachkaqta”, nispa. 11 Joabñataqmi chay runata nirqa: “¿Imanasqataq rikuchkaspaykiqa mana wañurachirqankichu? Ñuqaqa chunka qullqitam* hinaspa wiqaw watanatam quykiman karqa”, nispa. 12 Chay runañataqmi Joabta nirqa: “1.000 qullqitaña* quwaptinkupas manam kamachiqpa churintaqa wañuchiymanchu. Uyarirqanikum qamta, Abisaita hinaspa Itaita kamachiq David ‘churiy Absalontaqa amam imanankichikchu’ nispa nisusqaykichikta.+ 13 Chay nisqanta mana kasukuspay wañurachiptiyqa kamachiq Davidqa yacharunmanmi karqa. Manam qampas yanapawankimanchu karqa”, nispa. 14 Chaynata niptinmi Joabqa nirqa: “¡Hinañapas kachun yanqañam qanwanqa!”, nispa. Chaynata nispanmi Joabqa Absalonta sachapi warkurayachkaptin kimsa lanzawan qasqunpi* tuksirurqa. 15 Chaymantam Joabpa chunka yanapaqninkuna chayaramuspanku Absalonta wañupaykachirqaku.+ 16 Waqrata Joab pukuykuptinmi soldadonkunaqa Absalonta yanapaq Israel runakunataqa manaña qatirqakuñachu. Chaynatamá Joabqa manaña peleanankupaq harkarurqa. 17 Absalonpa ayantaqa montepim hatun uchkuman wischuykurqaku, hinaspankum hawanman rumita muntururqaku.+ Hinaptinmi Absalonpa runankunaqa wasinkuman ripukurqaku.

18 Absalonmi kawsakuchkaspallaraq rumita sayachirqa “Kamachiqpa pampan” nisqankupi.+ Paymi nirqa: “Manam ñuqapaqa qari churiypas kanchu sutiy yuyarisqa kananpaq”, nispan.+ Chaymi sayachisqan rumita kikinpa sutinwan suticharurqa. Chaytam kunankama sutichanku “Absalonpa sayachisqan rumi” nispa.

19 Sadocpa churin Aimaazmi+ Joabta nirqa: “Kamachiqmanyá kallpaspay willaramusaq chiqniqninkunamanta Jehova Dios imayna librasqanta”, nispa.+ 20 Joabñataqmi nirqa: “Kunanqa manam willamuwaqchu, huk punchawña willamunki. Kamachiqpa churin wañurusqanraykum kunanqa mana willamuwaqchu”, nispa.+ 21 Chaymantam Joabqa Cus kasta+ runata nirqa: “Kamachiqman willamuy imam rikusqaykita”, nispa. Hinaptinmi chay runaqa Joabpa ñawpaqninpi qunqurakuykuspan kallpaylla* pasarqa. 22 Kaqmantam Aimaazqa Joabta nirqa: “Imaña kaptinpas, Cus kasta runapa qipantayá kallpaylla rirusaq”, nispa. Joabñataqmi nirqa: “Churilláy, ¿imapaqñataq riwaq? ¿Imatañataq willakamuwaq?”, nispa. 23 Chaywanpas kaqmantam Aimaazqa nirqa: “Imaña kaptinpas, rirusaqyá”, nispa. Hinaptinmi Joabñataq nirqa: “Riruyá”, nispa. Chaymi Aimaazqa kallpaylla rirqa Jordan mayu lawninta, hinaspam Cus kasta runataqa llallirurqaraq.

24 Davidqa llaqtapa punkunpim tiyachkarqa.+ Llaqtata cuidaq+ runañataqmi punkupa hawanpi altusman qispirurqa, hinaspam kallpaylla hamuq runata rikururqa. 25 Chaymi kamachiq Davidman willarqa. Davidñataqmi nirqa: “Sapallan hamuspanqa imatapas willakuqmi hamuchkan”, nispa. Kallpaylla hamuq runa asuykamuptinmi 26 llaqta cuidaq runaqa huk runatapas rikururqa kallpaylla hamuqta. Hinaspam punkupi runaman willarqa: “¡Huk runapas kallpayllam hamuchkan!”, nispa. Davidñataqmi nirqa: “Chay runapas willakuqmi hamuchkan”, nispa. 27 Llaqta cuidaqñataqmi nirqa: “Punta hamuq runaqa Sadocpa churin Aimaaz+ kaqllam kallpamuchkan”, nispa. Davidñataqmi nirqa: “Payqa allin runam. Allin willakuywanmi hamuchkan”, nispa. 28 Aimaazqa chayaruspanmi qaparispan Davidta nirqa: “¡Allin willakuywanmi hamuchkani!”, nispa. Chaymantam Davidpa ñawpaqninpi qunqurakuykuspan kumuykurqa, hinaspam nirqa: “¡Jehova Diosyá hatunchasqa kachun! Paymi qipanchasuqniki runakunata makikiman churaykun”, nispa.+

29 Davidñataqmi nirqa: “¿Allinllachu churiy Absalon kachkan?”, nispa. Aimaazñataqmi nirqa: “Joab kachamuwaptinkum rikurqani achkallaña runakuna chaqwakuqta, ichaqa manam yacharqanichu imam pasasqanta”, nispa.+ 30 Chaymi kamachiq Davidñataq nirqa: “Asurispa kaylawpi sayay”, nispa. Chaymi suchurispan chaylawpi sayarqa.

31 Chaymantam Cus kasta runa chayaramurqa,+ hinaspam nirqa: “Kamachiqlláy, willakuytam apamuchkayki. Jehova Diosmi qipanchasuqniki runakunamanta libraykusunki”, nispa.+ 32 Hinaptinmi Davidñataq nirqa: “¿Allinllachu churiy Absalon kachkan?”, nispa. Cus kasta runañataqmi nirqa: “Kamachiqlláy, ¡Absalon hinayá llapallan chiqnisuqnikikuna hinaspa qipanchasuqnikikuna wañuchunku!”, nispa.+

33 Chayna nisqanwanmi Davidqa hukmanyarurqa. Hinaspam punkupa hawanpi altusman qispiruspan waqakurqa. Purispanmi nirqa: “¡Churilláy Absalon! ¡Churilláy! ¡Churilláy Absalon! ¡Qampa rantikipi ñuqa wañuyman karqa! ¡Churilláy Absalon, churilláy!”, nispa.+