2 Samuel

20 Benjamin ayllumanta Bicripa churinmi karqa chaqwa ruwaq. Paypa sutinmi karqa Seba.+ Paymi waqrata pukuspan+ nirqa: “Davidqa manam ñuqaykupaqa imaykupaschu. Jeseypa churin Davidmantaqa manam imatapas chaskisaqkuchu.+ ¡Israel runakuna! ¡Llapallanchikyá taytacha-mamachanchikman* kutikusunchik!”, nispa.+ 2 Chaynata niptinmi Israelpi llapallan runakunaqa Davidta saqiruspanku Bicripa churin Sebataña qatirqaku.+ Juda ayllu runakunam ichaqa Jordan mayumanta Jerusalen llaqtakama kamachiq Davidta riysirqaku.+

3 Jerusalen llaqtapi wasinman kamachiq David chayaruspanmi+ wasita qawanankupaq saqisqan chunka sapaq warminkunata huk wasimanña pusarurqa.+ Paykunamanqa mikuchirqam, ichaqa manañam paykunawanqa puñurqachu.+ Chay warmikunaqa chaypim wañukunan punchawkama wichqasqa karqaku, qusanku kawsachkaptinpas viudakuna hinam yacharqaku*.

4 Chaymantam kamachiq Davidqa Amasata nirqa:+ “Juda ayllu runakunatayá kimsa punchawllapi kayman huñuramuy, hamunkim qampas”, nispa. 5 Hinaptinmi Amasaqa pasarqa Juda ayllu runakunata huñuq, ichaqa manam nisqan punchawpichu kutimurqa. 6 Hinaptinmi Abisaita+ David nirqa: “Bicripa churin Sebaqa+ Absalonmantapas aswan mana allintaraqmi ruwaruwachwan.+ Chaynaqa, runaykunawanyá Sebata maskamuy, yanqañataq murallasqa llaqtakunaman yaykuruspan pakakurunman”, nispa. 7 Chaymi Abisaiqa Joabpa+ runankunawan, Keret runakunawan, Pelet runakunawan+ chaynataq kallpasapa soldadokunawan Jerusalen llaqtamanta rirqaku Bicripa churin Sebata maskaq. 8 Gabaon llaqtapi+ hatun rumipa hichpanman chayaruptinkum Amasaqa+ hamuchkasqa. Joabqa peleananpaq pachayuqmi rirqa, wiqawninpiñataqmi espada karqa. Amasaman asuykuchkaspanmi Joabqa espadanta wichiykachirqa.

9 Joabmi Amasata nirqa: “¿Allinllachu wawqilláy?”, nispa. Chaynata nispanmi Amasataqa muchachkaq hina alliq* makinwan barbanmanta hapirurqa. 10 Amasaqa manam kaqpaqpas hapirqachu Joabpa makinpi espada kasqantaqa. Joabqa wiksanpim wiqururqa,+ hinaptinmi Amasapaqa chunchulninpas taqtakururqa. Wañunayaptinmi manaña huktawanqa tuksirqachu. Chaymantam Joabqa hinaspa wawqin Abisaiqa Sebata maskaq rirqaku.

11 Joabpa huknin soldadonmi Amasapa waqtanpi sayaykuspan nirqa: “¡Pipas Joabtawan Davidta yanapaqqa Joabtayá qatichun!”, nispa. 12 Amasañataqmi ñanpi chutarayachkarqa yawarninpa hawanpi. Chay soldadoqa chaynin pasaqkuna sayaptinmi Amasapa ayanta ñanmanta huklawman suchurachirqa. Hinaspanmi pachawan tapaykurqa, chaynapi soldadokuna qawaspanku manaña sayanankupaq. 13 Ñanmanta huklawman suchurachiptinmi soldadokunaqa Joabta qatirqaku Sebata+ maskamunankupaq.

14 Sebaqa Israel ayllukunapa kasqanta muyuramuspanmi Abel Bet-maaca llaqtaman chayarurqa.+ Bicripa ayllunkunañataqmi Sebapiwan chay llaqtaman yaykurqaku.

15 Joabñataqmi soldadonkunapiwan chayaruspanku Abel Bet-maaca llaqtapa muyuriqninman churakururqaku. Chay llaqtaqa mana yaykuy atinam karqa, chaymi yaykunankupaq allpata muntururqaku. Joabpa wakin soldadonkunañataqmi pirqapa sikinta uchkuyta qallaykurqaku tuñichinankupaq. 16 Hinaptinmi yachayniyuq warmi llaqtapa pirqanmanta qayakamurqa: “¡Uyariykuwaychik, uyariykuwaychik! Joabtayá niykapullawaychik hamunanpaq, paywanmi rimayta munani”, nispa. 17 Joab asuykuptinmi chay warmi nirqa: “¿Qamchu kanki Joab?”, nispa. Chaymi Joabñataq nirqa: “Arí, ñuqam kani”, nispa. Hinaptinmi warmiñataq nirqa: “Taytáy, uyariykuway”, nispa. Joabñataqmi nirqa: “Niway”, nispa. 18 Hinaptinmi chay warmiñataq nirqa: “Ñawpaqtam niqku: ‘Pipas sasachakuyninta allichayta munaspanqa Abel Bet-maaca llaqtapiyá tapukamuchun’, nispa. 19 Kay llaqtapi kaqkunaqa hawka hinaspa kasukuq runakunam kaniku. Qamqa Israel nacionpi ancha riqsisqa llaqtatam chinkarachiyta munachkanki. ¿Imanasqataq Jehova Diospa runankunata wañurachiytaqa munachkanki?”, nispa.+ 20 Chaymi Joabñataq nirqa: “Manam piensayllapas-piensanichu llaqtapi runakunata wañuchiytaqa nitaq llaqtata chinkachiytapas. 21 Manam chaytaqa ruwasaqchu. Efrain urqupi+ yachaq Sebam+ kamachiq Davidta qipancharuspan ayqikaramun. Payqa Bicripa churinmi. Chay runallatayá quykuwayku, hinaptinqa pasakusaqkum”, nispa. Hinaptinmi chay warmiñataq Joabta nirqa: “¡Pirqapa hawantam Sebapa umanta wischumusqaykiku!”, nispa.

22 Chay yachayniyuq warmiqa chayllam pasarqa lliw runakunawan rimaq. Chaymi runakunaqa Sebapa umanta qururuspanku Joabman wischuykurqaku. Hinaptinmi Joabqa waqrata pukurqa, chaymi runankunañataq wasinkuman kutikurqaku.+ Joabñataqmi kamachiq Davidpa kasqan Jerusalen llaqtaman kutikurqa.

23 Chaymantam Joabña Israel soldadokunapa kamachiqnin karqa.+ Jeoyadapa+ churin Benayañataqmi+ karqa Keret hinaspa Pelet soldadokunapa kamachiqnin.+ 24 Adoramñataqmi+ karqa Davidpaq llamkaq runakunapa kamachiqnin. Ailudpa churin Jeosafatñataqmi+ karqa imapas pasasqanmanta qillqaq. 25 Sevañataqmi karqa kamachiqpa secretarion. Sadocwan+ Abiatarñataqmi+ karqaku sacerdotekuna. 26 Jairpa miraynin Irañataqmi autoridad* karqa.