2 Reyes
8 Kawsarichisqan warmapa mamantam Eliseo nirqa:+ “Jehova Diosmi nirqa kay nacionpi qanchis wata muchuy* kananmanta.+ Chaymi aylluykikunapiwan huklaw nacionman ripunayki”, nispa. 2 Diospa runan Eliseopa nisqanman hinam chay warmiqa ayllunpiwan ripukurqa, hinaspam Filistea runakunapa+ allpanpi qanchis wata yacharqa*.
3 Qanchis watamantam chay warmiqa Filistea runakunapa allpanmanta kutimurqa, hinaspam Israel nacionta kamachiqman rirqa chakrantawan wasinta kutichipunanpaq. 4 Kamachiqñataqmi Eliseopa yanapaqnin Gueaziwan rimachkarqa. Kamachiqmi Gueazita nirqa: “Willaway Eliseopa tukuy ima ruwasqanta”, nispa.+ 5 Wañukuq warmata Eliseo imayna kawsarichisqanmanta willachkaptinmi,+ chay warmapa maman chayarurqa chakrantawan wasinta kamachiq kutichipunanpaq.+ Hinaptinmi Gueaziqa kamachiqta nirqa: “Kamachiqlláy, kay warmipa wawantam Eliseoqa kawsarirachirqa. Kayqaya warmanpas”, nispa. 6 Chaymi kamachiqqa warmita tapurqa warmanta Eliseo imayna kawsarichisqanmanta, hinaptinmi warmiqa willarqa. Chaymantam kamachiqqa yanapaqninta nirqa: “Kay warmipa kapuqninkunata kutichipuy. Quytaq qullqitapas kay nacionmanta ripukusqanmanta kunankama chakranpi tarpuspan hayka ganasqanta”, nispa.
7 Eliseom Damasco+ llaqtata rirqa Siria nacionta kamachiq Ben-adad+ unquchkaptin. Chaymi Ben-adadman willaykurqaku: “Diospa runan Eliseom chayaramun”, nispanku.+ 8 Chaymi Ben-adadqa Hazaelta+ nirqa: “Imallatapas aparikuspayá Diospa runanman riruy.+ Jehova Diostayá tapuykapuwachun allinyasaqchus icha manachus”, nispa. 9 Hazaelqa Eliseomanmi rirqa Damasco llaqtamanta allinnin kaqkunata 40 camellokunapi aparikuspan. Chayaruspanmi Eliseota nirqa: “Siriata kamachiq runayki* Ben-adadmi tapukun: ‘¿Allinyasaqchu unqusqaymanta?’”, nispa. 10 Chaymi Eliseoñataq nirqa: “Kutispayki nimuy: ‘Allinyankipunis’, nispa. Chaywanpas Jehova Diosmi musquypi hina* qawachiwarqa wañunanmanta”, nispa.+ 11 Chaynata nispanmi Eliseoqa Hazaelta qawarayarqa pinqarikunankama. Chaymantam Eliseoqa waqayta qallaykurqa. 12 Hinaptinmi Hazaelqa Eliseota nirqa: “Taytáy, ¿imanasqataq waqachkanki?”, nispa. Eliseoñataqmi nirqa: “Yachanim Israel runakunata llumpayta ñakarichinaykita.+ Murallayuq llaqtakunatam kañanki, kallpasapa runankunatam espadawan wañuchinki, warmankunatam maqapaspa wañuchinki, hinaspapas wiksayuq warmikunapa wiksantam kuchunki”, nispa.+ 13 Chaymi Hazael nirqa: “¿Imaynamá kay mana valeq* runaykiqa chaytaqa ruwayman?”, nispa. Eliseoñataqmi nirqa: “Jehova Diosmi musquypi hina qawachiwarqa Siriapa kamachiqnin kanaykipaq”, nispa.+
14 Chaymantam Hazaelqa kamachiqman kutirqa. Hinaptinmi kamachiq nirqa: “¿Imatataq Eliseo niramusunki?”, nispa. Hazaelñataqmi nirqa: “Allinyankipunis”, nispa.+ 15 Ichaqa paqarintintam frazadata yakuman Hazaelqa challpururqa, hinaspanmi kamachiq Ben-adadpa siminta taparurqa wañunankama.+ Chaynapim Hazaelña kamachiq karqa.+
16 Israel nacionta Acabpa churin Jeoram+ pichqa wataña kamachichkaptinmi Jeosafatpa churin Jeoram+ Juda nacionta kamachiyta qallaykurqa. Kamachiytaqa qallaykurqa Juda nacionta Jeosafat kamachichkaptinraqmi. 17 Jeoramqa 32 watanpim Jerusalen llaqtamanta kamachiyta qallaykurqa. Payqa pusaq watam kamachirqa. 18 Acabpa ayllun hinam+ Jeoramqa Israel nacionta kamachiqkunapa ruwasqanta qatipakurqa.+ Jeoramqa Acabpa warmi churinwanmi casarakururqa.+ Chaynapim payqa Jehova Diospa chiqnisqan kaqkunata ruwarqa.+ 19 Chaywanpas yupaychaqnin Davidraykum+ Jehova Diosqa mana Judataqa chinkarachirqachu. Davidtam nirqa paymanwan churinkunaman huk mirayta* qunanmanta.+
20 Jeoram kamachichkaptinmi Edom runakunaqa Juda nacionta manaña kasukuyta munaspanku+ kamachiqninkuta churarurqaku.+ 21 Chaymi Jeoramqa Zair lawman rirqa llapallan carretankunawan. Edom runakunam Jeoramta hinaspa carretakunapa kamachiqninkunata chawpicharurqaku. Chaymi tuta hatariruspanku Edom runakunata wañuchiyta qallaykurqaku. Hinaptinmi Edom runakunaqa wasinkuman ayqikurqaku. 22 Edom runakunaqa manam kunankamapas Juda runakunataqa kasunkuchu. Libna llaqtayuq+ runakunapas Juda naciontaqa qipancharurqakum.
23 Jeorampa imayna kawsakusqanmanta hinaspa tukuy ima ruwasqanmantaqa Juda nacionta kamachiqkunamanta willakuq libropim qillqasqa kachkan. 24 Chaymanta qipatam Jeoramqa wañukurqa. Hinaptinmi pamparurqaku ñawpaq abuelonkunapa pampakusqan Davidpa llaqtan sutiyuq llaqtapi.+ Chaymi churin Ocoziasña+ kamachiyta qallaykurqa.
25 Acabpa churin Jeoram Israel nacionta 12 wataña kamachichkaptinmi Jeorampa churin Ocozias Juda nacionta kamachiyta qallaykurqa.+ 26 Ocoziasqa 22 watanpi kachkaspam Jerusalen llaqtamanta kamachiyta qallaykurqa. Payqa kamachirqa huk watallam. Mamanpa sutinmi karqa Atalia,+ payqa karqa Israelta kamachiq Omripa+ willkanmi*. 27 Ocoziasqa Acabpa ayllun hinam Jehova Diospa chiqnisqan kaqkunata ruwarqa.+ Chaynataqa ruwarqa taytan Jeoram Acabpa churinwan casarakusqanraykum.+ 28 Ocoziasmi Acabpa churin Jeoranwan rirqaku Ramot-galaad llaqtapi+ Siria nacionta kamachiq Hazaelwan peleaq. Ichaqa Siria runakunam Jeoramta flecharurqaku.+ 29 Chaymi Acabpa churin Jeoramqa Jezreel llaqtaman kutirqa+ flecharusqankumanta allinyananpaq. Flecharurqakuqa Siriata kamachiq Hazaelwan Rama llaqtapi peleachkaptinmi.+ Chayna unquchkaptinmi Judata kamachiq Ocozias Jeoramta watukuq rirqa. Ocoziasqa karqa Jeorampa churinmi.