Achka runakunam Jesusta rikurqaku

Kawsarimusqan qipatam Jesusqa 11 apostolninkunaman nirqa Galileapi kaq urqupi huñunakunankupaq. Chaypitaqmi kachkarqaku yaqa 500 qatiqninkunapas. Wakinkuqa iskayrayarqakuraqmi Jesus kawsarirusqanmanta, chaypi rimasqanta uyarispankum ichaqa manaña (Mateo 28:17; 1 Corintios 15:6).

Jesusmi qatiqninkunaman nirqa: ‘Tukuy atiytam chaskiruni hanaq pachapipas kay pachapipas. Chaynaqa llapallan nacionman rispayá yachachimuychik qatiqniykunaña kanankupaq, hinaspayá bautizamuychik taytapa, churinpa hinaspa chuya espiritupa sutinpi. Yachachimuychikyá kamachisqaykunata kasukunankupaq’, nispa (Mateo 28:18-20). Jesusqa munarqamá qatiqninkuna Diosmanta hinalla willakunankuta.

Jesuspa qatiqninkunaqa llapallankum kamachisqa karqaku runakunaman yachachinankupaq. Chiqniqninkuna harkakuptinkupas Diosmantam hinalla willakunanku karqa, chaymi Jesusqa nirqa: “Tukuy atiytam chaskiruni hanaq pachapipas kay pachapipas”, nispa. Chaywanqa, ¿ima niytataq munachkarqa? Nirqam: “Sapa punchawmi ñuqaqa qamkunawan kasaq kay tiempopa tukupayninkama”, nispa. Chaywanqa manam nichkarqachu milagrota lliw ruwanankumantachu, aswanqa chuya espiritu llapankuta yanapananmantam.

Kawsariramusqanmantaqa 40 punchawraqmi Jesusqa qatiqninkunaman rikurirqa, ichaqa sapa rikurisqanpim mana hina kaqlla rikchayniyuqchu karqa. Chaywanmi “sutillata qawachirqa chiqaptapuni kawsarirusqanta”, hinaspam paykunaman “Diospa munaychakuyninmanta willakurqa” (Hechos 1:3; 1 Corintios 15:7).

Galileapiraq kachkaptinkupaschá Jesusqa apostolninkunata nirqa Jerusalenman rinankupaq. Chaypi paykunawan huñunakuspanmi Jesusqa kamachirqa: “Jerusalenmanta ama lluqsispaykichikyá hanaq pacha taytaypa prometesusqaykichikta suyaychik, chaytaqa ñuqam willarqaykichik. Juanqariki chiqaptapunim yakuwan bautizarqa, qamkunam ichaqa kay punchawkunalla chuya espirituwan bautizasqa kankichik”, nispa (Hechos 1:4, 5).

Chaymantam Jesusqa apostolninkunawan yapatawan huñunakuspan Olivos muqupa hichpanpi Betania llaqtaman pusarqa (Lucas 24:50). Hanaq pachaman rinanmanta apostolninkunaman Jesus sapa kuti willachkaptinpas paykunaqa hinallam piensarqaku kay pachapi kamachiy qallarinanmanta (Lucas 22:16, 18, 30; Juan 14:2, 3).

Chaymi Jesusta nirqaku: “Señor, ¿kaqmantachu Diospa munaychakuyninta Israel nacionpi kunan tiempo hatarichichkanki?”, nispa. Jesusñataqmi nirqa: “Hanaq pachapi taytallaymi imay tiempo utaq imay punchaw imapas kanantaqa tanteanman, qamkunaqa manam necesitankichikchu chaymanta yachaytaqa”, nispa. Hinaptinmi kaqmanta nirqa: “Chuya espiritu qamkunaman hamuptinmi atiyta chaskinkichik hinaspam ñuqamanta willakunkichik: Jerusalenpi, enteron Judea lawpi, Samaria lawpi hinaspa kay pachapa cantonkama”, nispa (Hechos 1:6-8).

Hinaptinmi Olivos muqupiraq kachkaptinku Jesusqa hanaq pachaman huqarikuyta qallaykurqa. Puyu taparuptinmi Jesustaqa manaña rikurqakuñachu. Jesusqa kawsariruspanmi qatiqninkunamanqa huk-huk rikchayniyuq rikuriq. Ichaqa hanaq pachaman kutispanqa manam aycha cuerpoyuqñachu kutirqa, aswanqa espiritu cuerpoyuqñam (1 Corintios 15:44, 50; 1 Pedro 3:18). Chayta apostolkuna qawachkaptinkum aycha cuerpoyuq ‘yuraq pachayuq iskay angelkuna’ waqtankupi rikurirurqa. Hinaspam nirqaku: “Galilea lawmanta qarikuna, ¿imanasqataq sayachkankichik cielota qawaspa? Hanaq pachapi Diospa chaskisqan Jesusqa, imayna hanaq pachaman risqanta qawasqaykichikman hinam hamunqa”, nispa (Hechos 1:10, 11).

Hanaq pachaman Jesus huqarikusqantaqa qatiqninkunallam rikurqaku. Chaynam kamachinanpaq hamusqantapas qatiqninkunalla musyananku karqa, chaymi Jesusqa nirqa ‘hanaq pachaman risqanman hina hamunanmanta’.

Chaymantam apostolkunaqa Jerusalenman kutispanku qatiqnin punchawkunapi iñiqkunawan huñunakurqaku. Chay huñunakuypiqa karqakutaqmi ‘Jesuspa maman Mariawan wawqinkunapas’ (Hechos 1:14). Chaypim Diosta achkakama mañakurqaku. Mañakurqakum Diospa yanapayninwan Judas Iscariotepa rantinpi huk apostolta akllanankupaq, chaynapi 12 apostolkuna kaqmanta kananpaq (Mateo 19:28). Judaspa rantinpi akllasqankuqa Jesuspa ruwasqankunata hinaspa kawsarisqanta rikuqmi kanan karqa. Chaymi pita Dios akllasqanmanta yachanankupaq sortearqaku, chaywanmi Matiasta apostol kananpaq akllarurqaku. Payqa yaqapaschá Diosmanta willakunankupaq Jesuspa 70 kachasqanmanta huk kaqnin karqa (Hechos 1:26). Chaymanta qipamanqa bibliaqa manañam willakunñachu sorteasqankumantaqa (Salmo 109:8; Proverbios 16:33).

Hanaq pachaman Jesus kutikusqanmanta 10 punchaw pasaruptinmi judiokunaqa pentecostes sutichasqa fiestata 33 kaq watapi ruwarqaku. Chay kutipiqa Jesuspa 120 qatiqninkunam huñunasqa kachkarqaku Jerusalen wasipa altosninpi. Hinaptinmi qunqayllamanta wasi huntata uyarirurqaku sinchi wayrapa qapariyninta hina. Chaymantam lenguachkaq nina hina rikuriruspan sapakamaman tiyaykurqa. Chaymi tukuy rikchaq rimaykunapi llapallanku rimayta qallaykurqaku. Chaynatam Jesuspa nisqanman hina chuya espirituta chaskirqaku (Juan 14:26).