Jesusqa yacharqam kasukuq kayta

¿MANA kasukuqchu kanki?a . . . Chayna kaptinqa amayá hukmanyaychu, yaqa llapallanchikmi kasukuytaqa mana munanchikchu. Jesuspas kasukuytaqa yachananmi karqa.

¿Pikunatam kasukunayki? . . . Arí, tayta-mamaykitam. Chaytam Bibliapas nin: “Churikuna, Señorman iñiqña kasqaykichikraykuyá tayta-mamaykichikta kasukuychik”, nispa (Efesios 6:1). ¿Jesusqa Tayta-mamanta kasukurqachu? ¿Pikunataq karqa?... Cheqap Taytanqa Jehová Diosmi, payqa ñoqanchikpapas Taytanchikmi (Mateo 6:9, 10). Sichu piensarqanki Josey hinaspa Mariapas tayta-mamanku kasqanta, allintaqmi. ¿Yachankichu imaynatam paykuna tayta-mamanku karusqankumanta? . . .

Gabriel sutiyoq angelmi Mariata nirqa qari wawayoq kananmanta. Ichaqa, ¿imaynataq wawayoq kanman mana pi qariwanpas puñuchkaspan? Jehová Diosmi milagrota rurarqa. Chay angelmi Mariata nirqa: “Chuya Espiritu qanman hamuptinmi hanaq pachapi Diospa atiynin puyu hina pampaykusunki. Chayraykum Diospa sapaqchasqan naceq wawapas sutichasqa kanqa Diospa Churinwan”, nispa (Lucas 1:30-35).

Jehová Diosmi hanaq pachapi kaq Churinta Mariapa wiksanman churaykurqa. Hinaptinmi wiksayakuq warmikunapa hina, Mariapa wiksanpi Jesusqa wiñayta qallaykurqa. Chaymantañam Joseyqa Mariawan casarakurqa. Hinaspam isqon killamanta hina, Jesusqa nacerqa. Yaqa llapallan runakunam piensarqaku Josey cheqap taytan kasqanta, ichaqa taytan hina uywaqnillanmi karqa. Chayna kasqanraykum nichwan Jesusqa iskay taytayoq kasqanta.

12 watachallanpim Jesusqa qawachirqa Taytan Jehová Diosta ancha kuyasqanta. ¿Imaynata? Jesuspa familianqa sapa watam karuta illaqku Jerusalenman pascuata ruranankupaq. Nazaret llaqtankuman kutimusqankupim Joseywan Mariaqa musyakururqaku paykunawan Jesus mana risqanta. ¿Imaynatam chinkarurqa?...

Chay tiempopaqqa Joseywan Mariaqa achka churi-wawayoqñam karqaku (Mateo 13:55, 56). Chaymantapas yaqapaschá Jacobowan, Juanwan, Zebedeowan hinaspa Salomey ayllunkunawan kutichkarqaku, Salomeyqa yaqapaschá Mariapa ñañan karqa. Chaykunaraykuchá Joseywan Mariaqa piensarqaku paykunawan kuska Jesus risqanta (Mateo 27:56; Marcos 15:40; Juan 19:25).

Jesusta mana tarispankum Joseywan Mariaqa utqayllamanña Jerusalenman kutirqaku hinaspam tukuy lawpi maskarqaku. Kimsa punchawmantañam chayraq templopi tarirurqaku. Hinaptinmi Maria tapurqa: “Wawalláy ¿imanasqamá kaytaqa rurawankiku? Taytaykiwan ñoqam llakisqallaña maskamuchkaykiku”, nispa. Jesusñataqmi nirqa: “¿Imanasqataq maskawarqankichik? ¿Manachu yacharqankichik Taytaypa asuntonkunapi kanayta?”, nispa (Lucas 2:45-50).

¿Mana allinchu karqa chayna rimasqan?... Yaqapaschá Joseywan Mariaqa cuentata qokurqaku Diospa wasinpi Jesuspa serviy munasqanta (Salmo 122:1). Jesuspaqqa allinmi kanman karqa tayta-maman templopi puntata maskayninkuqa, ¿aw?... Jesuspa nisqanqa anchatachá Mariata unay tiempota yuyaymanachirqa.

Chay punchawmantapacha, ¿imaynatam Jesusqa tayta-mamanwan portakurqa?... Bibliam niwanchik Nazaretman paykunawan kutispan hinalla ‘paykunata kasukusqanmanta’ (Lucas 2:51, 52). ¿Imatam paymanta yachawaq?... Arí, tayta-mamanchiktam kasukuna.

Qawasqaykiman hinaqa Jesusqa kasukuqmi karqa, ichaqa wakinpiqa sasachakurqam hanaq pachapi Taytan kamachiptinpas.

Qawasunchik, Jehová Diosmi Jesusta kamachirqa kay Pachaman hamuspan runakunarayku wañunanpaq. Ichaqa wañukunanpaqña tutapim, Jesusqa Diosta mañakurqa libraykunanpaq (Lucas 22:42). Kasukuynin sasaña kaptinpas taytantam kasukurqa. Diospa Palabranpa nisqanman hinaqa “ñakarisqankunawanmi kasukuyta yacharqa” (Hebreos 5:8). ¿Ñoqanchikpas chaynata rurachwanchu? . . .