Revistanchikta leeqkunam tapukunku

¿Dioschu Milagrowan Runakunata Hampichkanman?

Yachanchikmá Jehová Diosqa onqoqkunata hampinanpaq atiyniyoq kasqanta, chaymantapas atinmanmi serviqninkunaman atiy qoytapas. Arí, chaynatam ñawpa tiempopi rurarqa. Apostolkunapa tiemponpim, Diosqa paykunaman chuya espirituta qorqa chayna milagrokunata ruranankupaq. Apostol Pablom nirqa: ‘Diosmi sapakamaman qon chuya espiritupa atiyninta llapallanpa allinninpaq. Espirituntakamam wakinman qon yuyaywan rimananpaq, [. . .] wakinmanñataq onqoqkunata sanoyachinanpaq, [. . .] wakinmanñataq Diospa revelasqanta chaskispan willakunanpaq, [. . .] wakinmanñataq mana yachasqan idiomakunata rimananpaq’, nispa (1 Corintios 12:4-11).

Nirqataqmi chay milagrokuna tukunanmantapas. Nirqam: “Hamunqam tiempo Diospa revelasqankunata manaña willakunapaq, manañam rimanqakuchu mana yachasqanku idiomakunatapas, yachaypas manañataqmi kanqachu”, nispa (1 Corintios 13:8).

Jesucristopas wakin qatiqninkunapas onqoqkunatam sanoyachirqaku. Chay tiempopi milagrokuna rurasqankuqa Diosta hatunchanankupaqmi karqa, hinaspa chayllaraq rikuriq congregacion Diospa favorecesqan kasqanta runakuna yachanankupaq. Tiempopa risqanman hinam ichaqa favorecesqa kasqankutaqa qawachinmanku karqa takyasqa iñiyniyoq kasqankuwan, confianzankuwan hinaspa kuyakuyninkuwanpas (Juan 13:35; 1 Corintios 13:13). Chaymi, 100 watakunapaqqa Diosqa manaña milagrokunata ruranankupaq atiytaqa qorqañachu.a

Ichapas tapukunki, “¿imanasqataq noticiakunapi hinallaraq uyarinchik milagrowan sanoyaq runakunamanta?”, nispa. Huk kutipim cáncer onqoywan kasqanta piensaq runamanta huk periódico willakurqa. Chay periodicopa nisqanman hinam, umanpi, riñonninpi chaynataq tullunkunapipas tumorniyoq kasqa, chaysi chay runaqa manaña sanoyayta piensasqachu, hinaptinsi Dios rimapayaykuptin, iskay-kimsa punchawllamanta chay onqoynin chinkarusqa.

Kayna willakuykunata uyarispaqa tapukuchwanmi: ¿Creenapaq hinachu kanman chay willakuykuna hinaspa pruebakunapas kanchu chayna onqoyniyoq kasqanmanta? ¿Doctorkunapas chayna kasqanmantachu ninmanku? Cheqaptaña chay runakuna sanoyarusqanta piensaptinkupas, ¿Bibliaqa yachachinchu chay milagrokuna Diosmanta kasqanta?

Kay tukuyninpi kaq tapukuyta kutichiyqa ancha allinmi Jesuspa kayna nisqanrayku, paymi nirqa: “Cuidakuychik ‘Diosmantam willakuchkani’ niq llulla runakunamanta. [. . .] Juicio punchaw chayaramuptinqa achkallañam niwanqaku: ‘Señorlláy, Señorlláy, ñoqaykuqa qamraykum willakurqaniku, qamraykum demoniokunata qarqorqaniku, qamraykutaqmi achka milagrokunatapas rurarqaniku’ nispa. Hinaptinmi nisaq: ‘Manam reqsikichikchu. ¡Qayllaymanta asuychik mana allin ruraqkuna!’” nispa (Mateo 7:15, 21-23).

Arí, kay rimaykunam sutillata qawachiwanchik, kunan tiemponchikpi Diospa sutinpi milagrokunata ruraqkuna kananmanta, ichaqa manamá Diospa favorninwanchu ruranmanku karqa. Chaynaqa, chay toqllakunapi mana wichinanchikpaqqa Jehová Diostam allinta reqsinanchik, yuyay qowasqanchiktapas allintam servichikuna, chaymantapas reqsinanchikmi Diospa munaynin ruraqkunatapas (Mateo 7:16-19; Juan 17:3; Romanos 12:1, 2).

[Willakuy]