¿Imaynatam familianchikman predicachwan?
1. ¿Imanasqam allinta piensaspa familianchikman predicananchik?
1 Ima sumaqmi kanman Jehová Diosta adoraspa familianchikkunawan mosoq mundoman yaykuyqa. Kay sumaq suyakuyqa cheqapmi kanman familianchikman predicaptinchik. Allintam ichaqa piensananchik, rimasqanchik sumaq kananpaq. Circuitopi superintendentem nin: “Allintam ruranchikman sichus allillamanta predicaspa familianchikta rikcharichisunchik uyarinanpaq”. ¿Imaynatam chayta ruranchikman?
2. ¿Imaynatam sonqonchikmanta interesakusqanchik familianchikta rikcharichinman?
2 Rikcharichisunchik. Puntamantaqa allinta piensay imam familiaykita interesanman (Pro. 15:28). ¿Imakunapim interesakun, ima sasachakuykunapim tarikun? Interesasqanman hinam revistapi huk temata otaq Bibliapi textotapas leechinchikman. Karupi yachaptinkuqa cartata apachinchikman, telefonowanpas qayanchikman. Tarpuy cheqapta sonqonpi mana llumpayta rimapayaspa, Jehová Diosñam wiñachinqa (1Cor. 3:6).
3. Familianchik ñoqanchikpi interesakusqanmanta, ¿imaynatam aprovechanchikman predicananchikpaq?
3 Demoniokunata runamanta qarqoruspam Jesusqa runata kamachirqa: “Wasikiman rispayki aylluykikunaman willamuy llakipayasuspayki Señor [“Jehová”, NM] Diospa imam rurasqanmanta, nispa” (Mar. 5:19). Payta uyarispaqa imaynataraqchá familianqa admirakurqa. Manapaschá chaynaqa sucedesunkichu, familiaykim ichaqa interesakunman rurasqaykikunapi wawaykikunapa rurasqankunapipas. Escuela del Ministerio Teocraticopi discurso qosqaykimanta, asambleaman risqaykimanta, Betel wasita visitasqaykimanta, imakunam kawsaynikipi yanapasusqaykitapas willawaqmi. Kaykunam masta sonqonta kicharinman Jehová Diosmanta organizacionninmantapas uyarinankupaq.
4. ¿Imakunapim mana pantananchikchu familianchikman predicaspa?
4 Allinta piensana. Familianchikman predicaspaqa manam nisyutachu rimapayana. Biblia estudiayta qallarichkaspam huk hermanonchik pantasqanta yuyarin: “Llumpaytam mamayta pisipachirqani Bibliamanta tukuy yachasqayta willaspay, papaywanpas simipura hapinakurqaniku”. Familianchikmanta hukllapas Bibliamanta uyariyta munaptinqa, huk kutipipas masta uyariwananchikpaq hinallatam rimana (Pro. 25:7). Mana reqsisqayki runaman hina predicay respetowan llampu simiwan pacienciawan (Col. 4:6).
5. ¿Imatam ruranchikman familianchik mana uyariyta munaptin?
5 Huk tiempopim Jesusmanta familiankuna piensarqaku mana yuyayninpi kasqanta (Mar. 3:21). Chay qepamanmi ichaqa ayllunkunapas Jesuspi iñirqaku (Hech. 1:14). Qallariypi familiaykiman predicaptikiqa manapaschá allintachu uyarisunki, ama chaywanqa hukmanyaychu. Imayna tarikusqanpas, imayna piensasqanpas cambianmanmi. Atikuptinqa, imapas interesasqanmanta rimapayay. Kusikuwaqmi yanapasqaykiwan wiñay kawsayman familiayki puririptinqa (Mat. 7:13, 14).