Predicaspaqa ama pisipasunchikchu
1 Sasa punchawkunapim kawsanchik. Kunanqa maypipas runakunam wañuchinakuchkanku, kastakunapas maqanakuchkankum, llumpay parapas, nisyu rupaypas, terremotokunapas, imaymanakunam manchakunapaq kachkan. Mana haykapi hinam runakunaqa necesitanku allin willakuykunata uyariyta. Astawanraqpas runakunaqa manam Diosmanta yachayta munankuchu. Wakin llaqtakunapiqa runakunata wasikunapi sasata tarinchik, astawanpas sasa tariymi uyariy munaqkunata otaq Bibliamanta yachay munaqkunatapas. Chaywanpas, manam pisipananchikchu Diospa takyachisqan Reinomanta allin noticiakuna predicaypi (Mat. 24:14).
2 Runakunata kuyakuy. Predicasqanchikwanmi Jehová Dios qawachin runakunata kuyasqanta. Payqa ‘mana chinkarunankuta munaspam, munachkan huchamanta wanakuspanku payman llapallanku kutirikunankuta’ (2 Ped. 3:9; Eze. 33:11). Chayrayku Jesusqa kayta kamachirqa: Puntataqa “Manaraq kay tiempo tukuchkaptinmi ñoqamanta allin noticia lliw nacionkunapi willakusqa kanqa” nispa (Mar. 13:10). Diosmi willan runakunaman Payman kutirikunankupaq hinaspa Satanaspa mundomantapas lluptiykunankupaq, manaraq piñakuynin punchaw chayamuchkaptin (Joel 2:28, 29, 32; Sof. 2:2, 3). ¿Manachu kaykunamanta Jehová Diosta agradecekuchwan? (1 Tim. 1:12, 13.)
3 Enterollan kay pachapim 2004 watapi Bibliamanta yachachisqaku 6.085.387 runakunata, sapa semanataqmi bautizakusqaku yaqa 5.000 mosoq discipulokuna. Jehová Diosmi bendicin publicadorkunata kallpanchakuspa llaqtankupi runakunaman predicasqankuta, chay rurasqankumantam wakinqa ña Diosman qoykukunña. ¡Maynataraq kayqa congregacionkunata kusichichkan!, hinaspa ¡ima sumaqraqpas Diospa llamkaqmasin kaspa runakuna salvakunankupaq llamkaypi yanapayqa! (1 Cor. 3:5, 6, 9.)
4 Diospa sutinta hatunchasunchik. Predicacionpi ñawparisunchik llapa runakunapa qayllanpi Jehová Diosta hatunchananchikpaq hinaspa sutintapas chuyanchananchikpaq (Heb. 13:15). Satanasmi “llapallan kay pachapi” runakunata pantachichkan kayna yuyaykunawan: Diosqa manam runapa sasachakuyninta allichanqachu, payqa manam runapa ñakarisqanpi reparanchuqaya, otaq Diosqa manam kanchu nispa (Apo. 12:9). Predicasqanchikwanmi hanaq pachapi sumaq Taytanchikpaqmi takyasunchik. Sutinta hinalla hatunchasunchik kunanpas wiñaypaqpas (Sal. 145:1, 2).