2 kaq yachachikuy
¿Pitaq Dios?
¿Pitaq cheqap Dios, imataq sutin? (1, 2)
¿Imayna cuerpoyoqtaq Dios? (3)
¿Mayqenkunataq Diospa sumaq kayninkuna? (4)
¿Imagenkunawanchu Diosta adorananchik? (5)
¿Imaynatam Diosmanta yachanchikman? (6)
1. Imaymanatam runaqa adoran. Bibliam ichaqa niwanchik huklla CHEQAP Dios kasqanta. Paymi unancharqa tukuy imata cielopipas kay Pachapipas, paytaq vidata qowanchik chaymi, payllata adorananchik. (1 Corintios 8:5, 6; Revelación [Apocalipsis] 4:11.)
2. Achkaña Diospa titulonkuna kaptinpas, hukllam sutinqa: JEHOVÁ. Diospa sutinqa achka Bibliakunapim mana rikurinchu, Señor otaq Dios nispam sutinpa rantinpi qellqanku. Bibliata qellqachkaptinkum ichaqa, 7,000 kutita hina Jehová sutiqa rikurirqa. (Éxodo 3:15; Salmo 83:18.)
3. Jehovaqa cuerpoyoqmi, manam ichaqa ñoqanchikpa hinachu. “Diosqa Espiritum”, ninmi Biblia. (Juan 4:24.) Espirituqa manam ñoqanchik hinachu aswan atiyniyoqmi. Manam haykapipas Diostaqa pi runapas rikurqachu. Cielopiña Jehová yachaspapas, lliwtam rikumun. (Salmo 11:4, 5; Juan 1:18.) ¿Imataq espíritu santoqa? Manam Dios hina personachu, Diospa fuerzanmi. (Salmo 104:30.)
4. Bibliam willawanchik Jehovapa imayna kayninmanta. Payqa kuyakuq, justiciayoq, yachayniyoq, atiyniyoqmi. (Deuteronomio 32:4; Job 12:13; Isaías 40:26; 1 Juan 4:8.) Nintaqmi llakipayakuq, sumaq sonqo, pampachakuq, imapas qokuykuq, pacienciayoq kasqanmantapas. Paymanmi rikchakunanchik kasukuq churikuna hina. (Efesios 5:1, 2.)
5. ¿Kumuykunanchikchu, orananchikchu imagenkunaman, cuadrokunamanpas? Manam. (Éxodo 20:4, 5.) Jehovallatam adorananchik chaytam pay kamachin. Manam piwanpas nitaq imawanpas Dios kaynintaqa rakinakunmanchu. Imagenkunaqa manam atiyniyoqchu yanapawananchikpaq. (Salmo 115:4-8; Isaías 42:8.)
6. ¿Imaynatam Diosta allinta reqsinchikman? Tukuy imaymana unanchasqanta qawarispa, chaykunapi allinta piensaspa. Diospa unanchasqankunam rikuchiwanchik hatun atiyniyoq, ancha yachayniyoq kasqanta. Imaymana rurasqanpim kuyakuyniyoq kasqanta rikunchik. (Salmo 19:1-6; Romanos 1:20.) Bibliata estudiaspataqmi Diosmantaqa masta yachasun. Chaypim payqa astawan willawanchik imayna Dios kasqanta. Willawanchiktaqmi munayninmantapas ima rurananchikta munasqanmantapas. (Amós 3:7; 2 Timoteo 3:16, 17.)
[5 kaq paginapi fotokuna]
Bibliata estudiaspa unanchasqantawan qawarispam Diosmantaqa yachanchik