Bibliata estudiaspa kusikuy

MAYNA kusisqam yuyaymanaspan Bibliata ‘tuta punchaw’ leeq runaqa (Sal. 1:1, 2). ¿Chaynatachu qampas kusikunki? ¿Imatam ruranayki Bibliata leespa astawan kusikunaykipaq?

Jehova Diospa nisqanta uyariy

Bibliata leey imam pasasqanmanta uyarichkawaqpas otaq qawachkawaqpas hina. Genesis librota leespaykiqa runakunapaq kay Allpata unanchaspan Jehova Diospa ima nisqankunata uyarichkawaqpas hina leey. Adantawan Evata unanchananpaq Ruraysiqnin Maestrota otaq Churinta rimapayasqanta uyariy. Qawachkawaqpas hina leey: Diospa contranpi Adanwan Eva churakusqanmanta, paykunata Dios imayna juzgasqanmanta hinaspa sumaq huertamanta qarqosqa kasqankumantapas (Gen. 1-3 caps.). Chaymantapas Jesucristo bautizakuchkaptin hanaq pachamanta Diospa nimusqanmanta leespa uyarichkawaqpas hina admirakuy, Jehova Diosmi kuyasqan Churinta kachamurqa runakunarayku wañunanpaq (Mat. 3:16, 17). ‘Ñoqam mosoqyachisaq tukuy imatapas’ nispa Diospa kayna prometesqanta apostol Juan uyarispan imayna sientekusqanpi piensay (Apoc. 21:5). Bibliata chaynata leeyqa ancha kusikunapaqmi.

Bibliata sapa kuti leespaykiqa Jehova Diospa admirakuypaq sumaq kayninkunata reqsispaykim kuyapayakuq Diosninchikman asuykunki. Payqa llakipayawanchikmi hinaspapas humillakuspa kallpanchakuptinchikqa yanapawanchikmi munayninta ruranapaq chaynataq allinta kawsakunapaqpas (Jos. 1:8; Sal. 8:1; Is. 41:10).

Bibliata leenaykipaq astawan tiempochakuspaqa Diospa munayninmanta sumaqta entiendespam kusikunki. Ichaqa manamá chayllachu. Leesqaykim yanapasunki ima sasachakuynikitapas allinta allichanaykipaq, chaymi Salmos qellqaq hina ninki: ‘Admirakuypaqmi kamachikuynikikunaqa chaymi kasukullani ñoqallayqa’, nispa (Sal. 119:129). Salmos qellqaq hinam kusikunki Diospa kamachisqanman hina imayna kawsanaykipaq yachachikuykunata Bibliapi tarispayki (Is. 55:8, 9).

Diospa yachachikuyninkunaqa allinta kawsanapaqmi yanapawanchik hinaspapas amparawanchikmi. Palabranta leespam entiendenchik aychanchikpa munasqanman hina kawsaspa sasachakusqanchikta Jehova Dios yachasqanmanta. Payqa manam munanchu kamachikuyninkunata mana kasukusqanchikrayku imawanpas ñakarinanchiktaqa. Ñoqanchikmanta nanachikuspanmi kusisqa kawsakunanchikta munan. Bibliata leeyqa yanapawasuntaqmi Taytanchik Jehova Diosta astawan hatunchananchikpaq.

Bibliata sapa punchaw leey

Bibliata sapa punchaw leeq runamantam Salmos qellqaq nin: ‘Tukuy ima rurasqanqa allinpunim lloqsin’, nispa (Sal. 1:3). Diosta mana kasukuq runakunapa kasqanpi kawsaspanchikpas, pantaq runa kaspanchikpas hinaspa Satanaspa tentasqan kaspanchikpas atichwanmi Jehova Diosmanta mana karunchakuspa tukuy sasachakuykuna atipaytaqa, chaypaqmi Bibliata leespa yachachikuyninkunata kasukunanchik.

Unanchaqninchikpa piensasqankunapi sapa punchaw huk ratollapas yuyaymanaspaqa kallpanchasqam kasun kay tiempopi mana allinkunata atipanapaq. Wakin iñiqmasinchikkunam iñisqankurayku carcelpi kaspanku, Biblianku mana kaptin periodicopi rikuriq textokunataña kaptaqku hinaspam umallankumanta yachaspa yuyaymanaqku. Jehova Diosmi bendecirqa Bibliamanta yachanankupaq kallpanchakusqankuta (Mat. 5:3). Kunanqa manam llapanchikchu presochasqa kachkanchik, ichaqa manam piensanachu Bibliapa huk textonta utqayllaman sapa punchaw leesqanchik milagrowan hina yanapawananchiktaqa. Yanapawananchikta munaspaqa Bibliatam sapa punchaw leenanchik, yuyaymanananchik hinaspa kasukunanchik.

Yachanchikmi imapas tanteasqanchikta wakinpiqa mana ruray atisqanchikta. Chayna kaptinqa allin kaqkunatam puntata rurananchik. Manam huk punchawllapas allinchu kachwan yakuta mana tomaspaqa, chaynallataqmi sasachakuyña kaptinpas Bibliata mana leespaqa mana allinchu kachwan (Hech. 17:11).

Bibliataqa llapantam leena

¿Leerunkiñachu Bibliata qallariyninmanta tukunankama? Wakinqa hukmanyankum Genesis libromanta Apocalipsis librokama sasa leey kasqanta piensaspanku. Chaymi achka runakuna enteron Biblia leeyta munaspanku puntata leenku Griego Rimaypi Qellqasqa Diospa Palabranta otaq Mateo libromanta Apocalipsis librokama. ¿Imanasqa? Ichapas Cristopa ejemplonta mana sasachakuspa qatipakunankupaq kay librokuna yanapasqanrayku otaq pisilla kasqanrayku. Mateo libromanta Apocalipsis librokama 27 librokunata leeruspankum, Hebreo Rimaypi Qellqasqa Diospa Palabranta otaq Genesis libromanta Malaquias librokama 39 librokunata leeyta qallaykunku, hinaspam yachasqankuwan kusikunku. Leeyta tukuruspankuqa costumbrarunkuñam, chaymi Mateo libromanta Apocalipsis librokama yapamantawan leenku, chaymantapacham Biblia leeytaqa manaña saqenkuñachu. Bibliata sapa punchaw leenaykipaq costumbranaykikama kallpanchakuy.

¿Kanchu pipas familiaykipi otaq congregacionnikipi leeyta mana atiq? ¿Kallpanchakuwaqchu Bibliata sapa kuti leepunaykipaq? Leepuptikiqa manam payllachu yuyaymanaspan kasukunqa, qamtapas yanapasunkim (Apoc. 1:3).

Tiempo pasasqanman hinaqa munankipaschá Bibliapa wakin yachachikuyninkunata astawan estudiayta. Chaynata estudiaspaykiqa entiendenkim Bibliapa yachachikuyninkuna imayna tupasqanta. Bibliaykipa sapa paginanpa chawpinpi otaq patanpi huk textokuna kaptinqa yanapasunkim huk textokunawan tupachinaykipaq hinaspa salmokunata otaq wakin cartakunata haykapi otaq imanasqa qellqasqankumanta entiendenaykipaq. Perspicacia para comprender las Escrituras nisqa librom achkanpi willakun runakunamanta, llaqtakunamanta hinaspa Diospa sumaq kayninkunamanta. Chay libroqa willawanchiktaqmi Diospa willakusqan imayna cumplikusqanmanta, Bibliapa nisqankuna haykapi pasasqanmanta hinaspa mayqan reykuna chaynataq profetakuna hina chay tiempollapi kawsasqankumantapas.

Estudiasqaykipi yuyaymanaspaqa entiendenkim Diospa llaqtanpi ñawpa tiempopi imanasqa imakunapas pasasqanmanta, chaynataq serviqninkunata imanasqa bendecisqanmanta otaq castigasqanmantapas. Entiendenkitaqmi: gobiernokunata, nacionkunata hinaspa runakunata Dios imayna qawasqanmantapas. Kaykunam yanapasunki Diospa piensasqanman hina piensanaykipaq.

Bibliapa willakusqan maypi pasasqanmanta rikuchkawaqpas hina leespaykiqa astawanmi entiendenki. Bibliapi rikuriq mapakunapim tariwaq Bibliapa willakusqan sitiokuna imayna kasqanmanta, karupi otaq hichpallapi kasqanmantapas. Mapakunata qawaspaykim leesqaykita astawan entiendenki. Yachankim israelitakuna Puka lamar qochapa mayninta chimpasqankuta, Diospa Prometesqan Allpa maymanta hinaspa maykama kasqanmanta, Diosmanta willakusqan llaqtakunapi apostol Pablo imakuna rikusqanmanta hinaspa Jesus maykunapi willakusqanmantapas. ¿Maypitaq chay mapakunata tariwaq? Traducción del Nuevo Mundo de las Santas Escrituras nisqa Bibliapim tarinki. Perspicacia nisqa libropipas kachkantaqmi 70 mapakuna, vol. 1 nisqapa tukupaynin paginakunapim chay mapakunamanta listata tarinki. Índice de las publicaciones Watch Tower nisqapas yanapasunkim qellqanchikkunapi huk mapakunatapas tarinaykipaq. Kay qellqaykikuna mana kaptinqa Willakuq qellqakunapi lloqsimuq mapakunata servichikuy Bibliata leespayki astawan entiendenaykipaq.

Hebreo Rimaypi Qellqasqa Diospa Palabranmi willawanchik Jehova Diosta hatunchananpaq rey Davidpa kayna qellqasqanmanta: “¡Mayna suma-sumaqmi qampa piensasqaykikunaqa! ¡Mayna achka-achkam tukuy chaykunaqa!”, nispa (Sal. 139:17). Griego Rimaypi Qellqasqa Diospa Palabranpim apostol Pablopas Unanchaqninchikta hatuncharqa kaynata nispan: “Diosllam sonqonchiktapas kancharichirqa achkiyninwan chaynapi Jesucristopa uyanpi kanchariq Diospa achkiyninta reqsinanchikpaq”, nispa (2 Cor. 4:6). Apostol Pabloqa pachaknintin watakuna qepatañam rey Davidmantaqa kawsarqa, chayna kaptinpas kusikurqakum Diospa Palabranta entiendespanku, qampas kusikunkim Jehova Diospa tukuy nisqankunata Bibliapi leenaykipaq tiempochakuspaqa.