Yachachisqanchikwan kallpanchanapaq

RUNAMASINCHIKMAN Diosmanta willaspapas tukuy sonqonkuwan kasukunankupaqmi kallpanchana. Bibliapi sonqo nispanqa runapa imayna piensasqanmanta, imanasqa imapas piensasqanmanta chaynataq piensasqanman hina rurasqanmantam rimachkan. Diospa Palabranqa muhumanmi rikchakun, chaytam tarpuna runakunapa sonqonpi (Mat. 13:19). Hinaptinmi tukuy sonqonkuwan Diosta kasukunqaku (Prov. 3:1; Rom. 6:17).

Yachachisqaykikunawan allinta kallpanchanaykipaqqa: 1) uyarisuqniki imanasqa imayna kawsasqanpi reparay, 2) Diosta kuyananpaq hinaspa respetananpaq kallpanchay, 3) imayna kawsasqanpi reparaspan Jehova Diosta agradananpaqpas kallpanchay.

Allinta reparay. Wakinqa manam chayllachu kasukunku Diosmanta yachasqankuta. Bibliamanta estudiachispaqa yaqapaschá pantay piensasqankunata cambiananpaq Bibliapa nisqanwan astawan entiendechinayki kanqa, wakinpiñataq mana. Chaypaqmi tapukuwaq: “¿Munanchu Diosmanta yachayta? ¿Imakunapitaq creenña otaq manaraq creenchu? ¿Imanasqataq chaynata piensan? ¿Imakunataq sasachanman Diospa munasqanman hina kawsananpaq? ¿Chaykunata atipananpaqchu yanapanata necesitan?”, nispa.

Imanasqa imapi creesqankumanta yachayqa sasam. Bibliam nin: “Pozopi uku-uku yaku hinam runapa tanteayninqa. Imayna horqoytapas yachanmi entiendeq runaqa”, nispa (Prov. 20:5). Entiendeq runaqa musyanmi mana sutilla kaqkunamantapas, chaypaqqa allintam imapipas reparanan.

Manam rimaspallachu ima piensasqankutaqa qawachinku. Estudiachisqanchik runaqa yaqapaschá yachachisqanchikwan imayna sientekusqanta qawachinman rikchayninpi otaq imayna rimasqanpi. Tayta-mama kaspapas warmaykikunapa imayna portakusqanwanmi musyawaq imanasqa chayna portakusqankumanta. Chaykunapi reparaspaqa musyankim estudiantepas otaq warmaykikunapas imanasqa chayna tarikusqankuta.

Tapukuykunawanmi ima piensasqankumanta yachawaq. Ichapas tapuwaq: “¿Imaynataq sientekuwaq . . . ? ¿Imataq convencechisurqanki . . . ? ¿Imatataq rurawaq . . . ?”, nispa. Ichaqa mana hukmanyachinaykipaqmi sumaqllata tapuwaq. Ichapas niwaq, “tapuykimanchu” nispa. Imam piensasqankumanta yachanapaqqa kallpanchakunam. Imam piensasqanmanta willawananchikpaqqa amistadtam armana. Confianzapaqña hapiwaptinchikpas allinta piensarispam tapuna, mana chayqa ima asuntonpipas metekusqanchiktam piensanman (2 Tes. 3:11).

Uyarisuqniki imaynanpata rimaptinpas hawkalla uyarinaykipaqmi entiendeq kanayki. Uyariwaqninchikkunata yanapanapaqqa imayna rimasqantam allinta uyarina chayman hina Bibliapa yachachikuyninkunawan kallpanchanapaq. Pantasqata rimaptinpas manam chayllachu corregina, aswanqa imayna rimasqanpim reparana. Chaynata ruraspaqa yachankim imayna yachachiyta, estudiantepas musyanqam piensasqanpi reparasqaykita (Prov. 16:23).

Achka kaptinkupas uyarisuqnikikunata kallpanchay. Uyarisuqnikunata qawarispa reparay imayna uyarisusqaykipi hinaspa piensarinankupaq tapuykunawan kallpanchay, chaywanmi musyanki imayna uyarisqankuta. Uyarisuqnikikunata reqsispaqa reparay imayna tarikusqankupi chayman hina Diospa Palabranwan piensarichinaykipaq (Gal. 6:18).

Uyarisuqnikunata kallpanchay. Imanasqa imapi creesqanmanta otaq mana creesqanmanta chaynataq imayna piensasqanmanta yachaspaqa atinkim imayna yanapayta. Jesusmi kawsarisqan qepata discipulonkunaman imakuna pasasqanmanta Bibliapa nisqankunawan ‘entiendechirqa’ (Luc. 24:32). Qampas estudianteta reqsisqaykiman hinam Diospa Palabranwan yanapawaq. Chaynata yachachiptikiqa convencesqam ninqa: “Kayqa ¡CHEQAPMI!”, nispa.

Jehova Diosqa kuyakuq, imapas qokuykuq chaynataq yachachisqankuna allinninchikpaq kasqanta qawachispaqa uyarisuqnikikunatam kallpanchanki payta kuyanankupaq. Allin kaqkunata rurasqanchikpi Dios reparasqanta qawachispapas paywan amistad ruray atisqankutam qawachinki. Chaypaqmi kallpanchawaq Salmo 139:1-3, Lucas 21:1-4 hinaspa Juan 6:44 nisqankunapi yuyaymananankupaq, qawachiwaqtaqmi tukuy sonqonkuwan serviqninkunataqa Dios anchata kuyasqantapas (Rom. 8:38, 39). Pantasqanchikkunapi Jehova Dios reparananmantaqa tukuy sonqowan servisqanchikpi reparasqanta entiendechiy (2 Cron. 19:2, 3; Heb. 6:10). Diosqa sapakamatam allinta reqsiwanchik, chaymi llapallan wañuqkunata admirakuypaq kawsarichinqa (Juan 5:28, 29; Luc. 12:6, 7). Diosmi runakunata unancharqa kikinman rikchakuqta, chaymi sumaq kayninkunamanta yachachispaqa runakunapa sonqonman chayasun (Gen. 1:27).

Kallpanchawaqtaqmi Jehova Diospa qawasqanman hina runamasinta qawananpaq. Diosqa maylaw nacionmanta otaq ima castamanta kaptinchikpas sapakamatam kuyapayawanchik (Hech. 10:34, 35). Biblia estudiaq chaykunamanta allinta entiendespanqa cheqnikuq kaynintam saqenqa, chaywanqa Diospa munayninmanta yachasqanman hinam runamasinwan sumaqta kawsanqa.

Uyarisuqnikikunataqa kallpanchawaqtaqmi Diosta respetanankupaq (Sal. 111:10; Apoc. 14:6, 7). Chaypaqmi qawachiwaq Jehova Diospa admirakuypaq tukuy rurasqankunata chaynataq tukuy ima qowasqanchiktapas, chaynata yachachispaqa Diosta tukuy sonqonkuwan kasukunankupaqmi kallpanchanki (Sal. 66:5; Jer. 32:40).

Allinta entiendechiy imayna kawsasqanchikpi Jehova Dios reparasqanta. Payqa sentimientoyoqmi, imayna kawsasqanchikqa kusichinmanmi otaq sonqontam nanachinman (Sal. 78:40-42). Imayna kawsasqanchik Diospa agradonpaq kaptinqa Satanas llulla kasqantam qawachisun (Prov. 27:11).

Uyarisuqnikikunaman allinta entiendechiy Diospa kamachisqanman hina kawsayqa allin kasqanta (Is. 48:17). Chaypaqmi qawachiwaq Diospa yachachisqanta pisi tiempollapas mana kasukuyqa cuerponchikpi chaynataq piensayninchikpipas mana allinninchikpaq kasqanta. Entiendechiy huchallikuyqa Jehova Diosmanta karunchasqanta chaynataq huchallikusqanrayku hukkunatapas hukmanyachisqanmanta (1 Tes. 4:6). Diosta kasukusqanrayku bendicionkuna chaskisqanta chaninchananpaq kallpanchay, chaynataq Diospa kamachisqanman hina kawsasqanrayku sasachakuyninkunamanta librasqa kasqanmantapas agradecekunanpaq kallpanchay. Diospa yachachikuyninkunapi iñispaqa allin kaqkunallata ruranankupaqchá kallpanchakunqaku (Sal. 119:104). Chaynata yachachiptikiqa Jehova Diospa kamachikuyninkunata kasukuspam tukuy sonqonkuwan servinqaku.

Piensarichiy cuentata qokunankupaq. Iñiyninkupi ñawparinankupaqqa sonqonkupi otaq piensayninkupi imayna kasqankumantam kanqa. Chaypaqmi yanapawaq Diospa Palabranwan.

Bibliapi kamachikuykunamanta, consejokunamanta, imapas pasasqanmanta chaynataq profeciakunamanta willaspapas uyarisuqnikikunamanmi allinta entiendechinayki ima asuntomantapas Jehova Diospa imam piensasqanta. Santiago 1:22-25 nisqanpim Diospa Palabranta tupachin espejowan. Chaymi yanapawanchik imayna sonqoyoq kasqanchikta qawakunapaq, Palabranqa qawachiwanchikmi Diospa munaynin imayna cumplikusqanta chaynataq kamachikuyninkuna imayna chaskisqanchikta. Diosqa reparanmi imayna sonqoyoq kasqanchikta (Prov. 17:3). Chayta ama qonqanankupaq uyarisuqnikikunata kallpanchay. Jehova Diospa qellqachisqankunapi yuyaymananankupaq kallpanchay chaynataq agradonpaq kawsanankupaqpas. Yanapaytaq Diospa Palabranta leespan imayna kasqanmanta cuentata qokunanpaq hinaspa yanapay mana allin piensayninkunata chaynataq munayninkunata saqenanpaq (Heb. 4:12; Rom. 15:4).

Wakin estudiantekunaqa Bibliamanta yachasqankuman hinam kawsayta munanku ichaqa hukkunapa imayna piensasqankuwanmi hukmanyanku. Ichapas runakunapa mana allin rurayninkuta mana saqespalla Dios serviyta munanku. Chayna tanteasqanku mana allinpaq kasqantam qawachinayki (1 Rey. 18:21). Jehova Diosta mañakuspa imayna kawsasqankuta cambianankupaq kallpanchay (Sal. 26:2; 139:23, 24).

Bibliawan qawachiy kasukunankupaq kallpanchakusqankupi Jehova Dios reparasqanta hinaspa explicay imanasqa sasachakusqankumanta (Rom. 7:22, 23). Kallpanchaytaq kikinpa munasqankunapi mana hapipakunanpaqpas (Prov. 3:5, 6; 28:26; Jer. 17:9, 10).

Imanasqa imapas ruray munasqankupi reparanankupaq kallpanchay. Chaypaqmi tapukunmanku: “¿Imanasqataq kay rurayta munani? ¿Jehova Dios agradecekusqaytachu rurasqayqa qawachinqa?”, nispa. Allinta entiendechiy pipa amistadninmantapas Jehova Diospa amistadnin aswan allin kasqanta.

Uyarisuqnikikunaman allinta entiendechiy Jehova Diosta ‘tukuy sonqowan’ serviyqa ima ninan kasqanta (Luc. 10:27). Chayqa Jehova Diospa munasqanman hinapuni kawsaymi. Chaymi yachachispaqa yanapanayki imam rurasqanpi, imanasqa rurasqanpi chaynataq Diospa kamachikuyninkunamanta imam piensasqanpi reparananpaq (Sal. 37:4). Bibliamanta estudiachisqayki imapi astawan kallpanchakunanmanta musyakuptinqa kallpanchay Jehova Diosta kaynata mañakunanpaq: “Qamtaña respetanaypaqyá iskayrayaq sonqoyta hukllaway”, nispa (Sal. 86:11).

Jehova Dioswan amistadta armaspankuqa tukuy sonqonkuwan iñisqankuraykum kasukunqaku, manam nisqaykiraykullachu. Chaynata yachachiptikiqa kikinmi ‘maskanqa Señorninchikpa agradonta’ (Efes. 5:10; Filip. 2:12). Chayna kawsasqanqa Diostam kusichinqa (Prov. 23:15).

Jehova Diosmi runakunapa sonqonta qawan, paytaqmi amistadnin kanankupaqpas kallpanchan (Prov. 21:2; Juan 6:44). Ñoqanchikqa yanapakuqllam kanchik (1 Cor. 3:9). Ñoqanchiknintakamam ruegachkaq hina Diosqa runakunata rimapayachkan (2 Cor. 5:20; Hech. 16:14). Jehova Diosqa manam pitapas obliganchu Palabranmanta yachanankupaqqa, ichaqa Palabranwan yachachiptinchikmi mañakuyninkuta contestanqa chaynataq imamanta tapukuyninkutapas entiendechinqa. Pimanpas yachachispaqa chaypi reparay hinaspa Jehova Diosta mañakuy yachachisqaykipi yanapasunaykipaq (1 Cron. 29:18, 19; Efes. 1:16-18).