Uyariwaqninchikkunapa sunqunman imaynata chayanapaq
1. ¿Imaynatam Jesusqa yachachirqa?
1 Jesusmi yachachisqanwan uyariqninkunapa sunqunman chayarqa (Luc. 24:32). Jehova Diostaqa tukuy sunqunchikwanmi kasukuna, ¿imaynatam Diosmanta yachachisqanchikkunata yanapachwan tukuy sunqunkuwan paykunapas Jehova Diosta kasukunankupaq? (Rom. 6:17).
2. ¿Imayna kasqanchiktaq yanapawachwan runamasinchikpa sunqunman chayanapaq?
2 Sumaqllatam yachachina. Runakunaqa vidankuta cambianku manam imataq allin utaq mana allin kasqanmanta yachachisqallanchikwanchu, nitaq pantasqa religionpi kasqankuta qawachinapaq bibliapi ima nisqankunata leepusqallanchikwanchu, chaynata ruwaptinchikqa Diosmanta yachay munasqankutapas saqirunmankum. Chaymi allinta yanapanapaqqa puntata yachana imanasqa ima religionpi kasqanmanta chaynataq imanasqa imayna vidayuq kasqanmantapas. Chaypaqa allinta tanteaspam sumaqllata tapuchwan (Prov. 20:5). Imayna tarikusqanmanta willawasqanchikta uyarinapaqqa pacienciakuspam tiempochakuna (Prov. 25:15). Chayqa yanapawasunmi sunqunman chayanapaq hina bibliapa ima nisqankunata akllaspa leepunanchikpaq. Diosmanta yachachisqanchikkunaqa manam chaynallachu kanku, wakinqa yaqa huk watallapim bautizakurunkuña, wakinñataq iskay-kimsa watamantaña. Diospa chuya espiritunpa yanapayninwanmi pisi-pisimanta vidankuta cambianku (Mar. 4:26-29).
3. ¿Imaynatam yanapachwan Diosman sunqu kanankupaq?
3 Imaynatam yanapachwan Diosman sunqu kananpaq. Diosqa kuyakuq chaynataq qukuykuq kasqanmanta yachachisqanchikmi yanapanqa payman sunqun kananpaq. Chaypaqmi leepuchwan Salmos 139:1-4 hinaspa Lucas 12:6, 7 nisqanta. Diosta agradecekuspanqa tukuy sunqunwanmi pay yupaychayta munanqa (Rom. 5:6-8; 1 Juan 4:19). Chaymantapas imayna kawsasqanwan Dios llakichisqanmanta yachaspanqa kallpanchakunqam Diospa munasqanman hina kawsakunanpaq (Sal. 78:40, 41; Prov. 23:15).
4. ¿Imaynatam Jehova Diosta qatipakuchwan runamasinchikman yachachispa?
4 Jehova Diosqa manam hikutawanchikchu kamachikuyninkunata kasukunapaqqa, aswanqa entiendechiwanchikmi kamachikuyninkuna kasukuyqa allinninchikpaq kasqanta (Is. 48:17, 18). Yachachisqanchik runamasinchiktaqa entiendesqanman hina kikin tanteakunanpaqmi saqinanchik, chaynata ruwaspaqa Jehova Diostam qatipakuchkanchik. Kikinku tanteakuspankuqa manam chayllachu qipaman kutirunqaku (Rom. 12:2). Chaynata yachachiptinchikqa astawanmi asuykunqaku ‘runapa sunqun chuyanchaq’ Jehova Diosman (Prov. 17:3).