Ama iskayrayaspa rimanapaq

MANA iskayrayaspa rimaptinchikqa uyariwaqninchikkunam cuentata qokunqaku tukuy sonqowan rimasqanchikmanta. Apostol Pablom convencesqa kasqanta predicasqanpi qawachirqa. Tesalonica llaqtapi kaq iñiqmasinkunaman cartaspanmi nirqa: ‘Cristomanta allin noticia willasqaykutaqa manam rimayllachu rimarqaniku, chayqa chayamusurqankichik cheqaptapuni convencesqa kasqaykuwanmi’, nispa (1 Tes. 1:5). Pabloqa convencesqa kasqantam qawachirqa imayna rimasqanwan chaynataq imayna kawsasqanwanpas, ñoqanchikpas convencesqa kasqanchiktam qawachina Diosmanta yachachisqanchikpi.

Mana iskayrayaspa rimayqa manam kamachichkaq otaq hatunchakuchkaq hina rimaychu. Diospa Palabranmanta mana iskayrayaspa yachachiqqa iñiyninpi qaqa hina kasqantam qawachin (Heb. 11:1).

Mana iskayrayaspa rimanapaq. Predicaspanchikpas convencesqa rimanapaqmi kallpanchakuna. Runakunaqa manam ima nisqallanchikpichu reparanku aswanqa imayna rimasqanchikpim. Chayna rimasqanchikwanmi cuentata qokunku willasqanchikqa ancha allin kasqanta.

Huñunakuypipas mana iskayrayaspam yachachina. Apostol Pedrom iñiqmasinkunaman qellqarqa: “Kallpanchamuspaymi Diospa cheqap favorninmanta willamuykichik chaypi qaqa hina sayanaykichikpaq”, nispa (1 Ped. 5:12). Apostol Pablopas Roma nacionpi kaq iñiqmasinkunaman qellqaspanmi mana iskayrayaspan nirqa: “Wañuptinchikpas, kawsaptinchikpas manam imapas Diospa kuyakuyninmantaqa rakiwachwanchu nitaq angelkunapas nitaq munaychakuqkunapas nitaq kunan kaqpas nitaq hamuq kaqpas nitaq mana rikusqanchik atiyniyoqkunapas. Puyupa altonkunapi kaqkunapas, uku-ukupi kaqkunapas chaynataq Diospa tukuy ima unanchasqankunapas manam rakiwachwanchu paypa kuyawasqanchikmantaqa”, nispa (Rom. 8:38, 39). Pabloqa qellqarqataqmi predicayqa ancha allin kasqanmanta, kikinpas tukuy sonqonwan predicaspanmi qawachirqa chay rurayqa allinpuni kasqanta (Hech. 20:18-21; Rom. 10:9, 13-15). Kunan tiempopi ancianokunapas mana iskayrayaspam Diospa Palabranmanta yachachinanku.

Chaynallataqmi tayta-mamakunapas convencesqa rimananku Diospa Palabranmanta wawa-churinkuman yachachispaqa. Chaynata yachachinankupaqmi Diosta tukuy sonqonkuwan kuyananku chaynataq kamachikuyninkunatapas. Bibliaqa ninmi: “Runaqa riman sonqonpi llimpariqmantam”, nispa (Luc. 6:45; Deut. 6:5-7). Mana iskayrayaspa rimasqankuqa tayta-mamakunatam yanapan ‘cheqaptapuni Diosman iñisqankuta’ wawa-churinkuman qawachinankupaq (2 Tim. 1:5).

Imakunapi iñisqaykimantapas manam iskayrayanaykichu. Ichapas tapusunkiman profesorniki, estudiaqmasiki otaq llamkaqmasiki costumbrekunapi imanasqa mana participasqaykimanta. Yaqapaschá respetasunki allinta piensarispa chaynataq mana iskayrayaspa contestaptikiqa. ¿Imatataq rurawaq suwakunaykipaq, huchapakunaykipaq otaq drogakunaykipaq pipas hikutasuptikiqa? Chaykuna mana ruray munasqaykitam sutillata qawachinayki mana iskayrayaspa rimasqaykiwan. Joseywan puñunanpaq Potifarpa warmin hikutaptinmi Joseyqa nirqa: ‘¿Imaynamá kay mana allinta ruraspayqa Diospa contranpi huchallikuyman?’, nispa. Joseyta chay warmi hinalla hikutaptinmi payqa chaylla lluptikurqa (Gen. 39:9, 12).

Mana iskayrayasqanchikta qawachinapaq. Convencesqa kasqaykitaqa imayna rimasqaykiwanmi qawachiwaq. Jesusmi achka kutita qawachirqa mana iskayrayasqanmanta kayna rimasqanwan: “Cheqaptapunim nikichik”, nispa (Juan 3:3, 5, 11; 5:19, 24, 25). Convencesqa kasqantam apostol Pablopas qawachirqa kayna rimaykunawan: “Chayraykum yachani”, “yachanipuni”, “Señor Jesuswan huklla kaspaymi yachanipuni”, “ñoqaqa cheqaptapunim rimachkani, manam llullakunichu”, nispan (Rom. 8:38; 14:14; 1 Tim. 2:7). Jehova Diosmi wakin kutipiqa Paymanta willakuqkunaman kamachirqa kaynata ninankupaq: ‘Prometesqaykunaqa cumplikunqapunim’, nispa (Hab. 2:3). Chayna willakuykunamantaqa mana iskayrayaspam rimanayki. Jehova Diospi confiaspa respetowan rimasqaykim convencesqa kasqaykita qawachinqa.

Convencesqa kasqaykitaqa qawachiwaqtaqmi tukuy sonqoykiwan rimaspa chaynataq makikiwanpas uyaykiwanpas rimasqaykipi yanapachikuspa. Manchapakuq kaptikipas otaq vozniki tumpallata uyarikuptinpas yachachinaykipaq kaqmanta mana iskayrayaspa rimaptikiqa uyarisuqnikikunam kallpanchasqa kanqaku.

Mana iskayrayasqanchikqa sutillam kanan. Tukuy sonqonchikwan mana rimaptinchikqa uyariwaqninchikkunam yachachisqanchikta yanqapaq hapinmanku. Chaymi imayna rimasqanchikman hinalla rimana. Uyariwaqninchikkuna hayka kasqanman hinapaschá kallpawan rimana kanqa. Tukuy sonqonchikwan imayna rimasqanchikman hinalla rimanapaqmi kallpanchakuna.

Mana iskayrayaspa rimanapaq yanapakuykuna. Tukuy sonqonchikwan rimanapaqqa allintam preparakuna. Chayqa manam qellqanchikkunapa nisqanman hina rimayllachu aswanqa imamanta yachachinanchikpaq kaqtam allinta entiendena chayman hina allinta yachachinapaq. Manam iskayrayanaykichu cheqap kasqanmantaqa nitaq uyarisuqnikikunata imayna yanapasqanmantapas. Yachachinaykipaq preparakuspaqa reparanaykim uyarisuqnikikuna imayna tarikusqanpi, imakunaña yachasqankupi chaynataq yachachisqaykimanta imam piensasqankupipas.

Clarota rimaptikiqa uyarisuqnikikunam cuentata qokunqaku convencesqa kasqaykimanta. Yachachinaykipaq kaqta allinta preparakuruspaqa kallpanchakuy achka kutikama practicanaykipaq. Ganaswan rimanaykipaq kaq yachachikuykunapim astawanqa reparanayki qellqasqaykiman hina mana rimanaykipaq. Chayna rurasqaykimanta Jehova Dios bendecisunaykipaqpas mañakuy. Chaynata ruraptikim ‘Diosninchik kallpanchasunki’ cheqapmanta mana iskayrayaspa yachachinaykipaq (1 Tes. 2:2).