Allin qawayninchikwan sapakama runamasinchikpi interesakusun
1 Runakunapa qayllanpi otaq wasin wasin predicaptinchikmi uyariqkunapa ñawinta sapakuti qawanchik manaraq rimapayachkaptinchik. Chayllam imayna qawawasqanchikwan musyakuchwan imatam ñoqanchikmanta piensanku hinaspa imayna paykuna tarikusqankutapas. Chaynallataqmi paykunapas qawawasqanchikwan musyanqaku imayna tarikusqanchikta. Testigo paninchik watukusqanmantam huk warmi nirqa: “Rimawasqanmanta astawan gustawasqanqa hawkalla asikuyninmi karqa. Chaymi yachayta munarqani imanasqa chayna kasqanta”. Paninchikpa kayna kusikuyninmi yanaparqa kay warmi uyarinanpaq.
2 Runakunata rimaspa qawayninchikmi allin yanapakuy kanqa callekunapi otaq huklawkunapipas predicaptinchik rimaykunata qallarinapaq. Huk wawqenchikmi sapa kuti payman asuykamuq runakunapa uyanta qawan. Qawanakuykuptinkum payqa asirin hinaspanmi revistakunata munachin. Kayna rurayninwanmi sumaq rimaykunata qallarin, hinaspam runakunaman saqen Bibliamanta achka qellqakunata.
3 Piensasqankutam musyanchik: Runakunata rimaspa qawayninchikmi yanapawasun piensasqankuta musyananchikpaq. Ejemplopaq, sichu pipas mana allinta entiendewanchik otaq nisqanchikwan mana acuerdopichu kachkan, sutillam uyanpi qawakunqa. Chaynallataqmi kanqa mana tiempoyoq kaptinpas otaq manaña uyariyta munaptinpas. Kaykunata musyaspanchikqa atichwanmi imayna predicayninchik cambiayta otaq rimayninchikta pisiyachiytapas. Runamasinchikkunapa imayna sientekusqankuta entiendespaqa paykunapi allin interesakusqanchiktam qawachisun.
4 Cheqap rimaywan hinaspa convencesqa rimaywan: Achka llaqtakunapim cheqap kuyakuyninkuta qawachinku runamasinkupa ñawinta qawaspanku. Yuyarisun imaynatam Jesús kutichirqa qatiqninkunapa kayna tapukusqankuta, “¿Hinaptinqa pitaq salvakuytaqa atinman?”. Bibliam nin: “Jesusñataqmi paykunata qawarispan nirqa: —Runakunaqa manam atinmanchu, Diospaqmi ichaqa tukuy imapas atinallan” (Mat. 19:25, 26). Chayna yachachisqanwanmi Jesusqa qawachirqa rimasqanmanta convencesqa kasqanta. Chaynallataq, runakunata rimaspa qawayninchikmi yanapawasun Diospa Munaychakusqanmanta cheqappiwan convencesqa rimanapaq (2 Cor. 2:17; 1 Tes. 1:5).