Kallpawan rimanapaq

PREDICASPANCHIK kallpawan mana rimaptinchikqa wasiyoqmi mana allintachu entiendewasun. Discurso qoq mana uyarikunanpaq hina huñunakuypi rimaptinqa uyariqninkunam puñuywan aysachikunmanku. Kallpawan mana rimanapaq kaq palabrakunapi qaparichkaq hina rimaptinñataqmi uyariqninkuna hukmanyarunmanku otaq piñakunmanku (Prov. 27:14). Rimarinapaq kaptin kallpawan mana rimaspaqa manataqmi hukkunataqa kallpanchachwanchu (Heb. 10:24, 25).

Uyarisuqnikikunapi reparay. ¿Haykataq hinaspa pikunataq uyarisuqnikikunaqa? Huk runallachu, huk familiachu, huñunakuypi kaqkunachu, predicanapaq huñunakuqkunachu, icha asambleapi kaqkunachu. Chayman hinam tanteanayki kallpawan otaq tumpallamanta rimanaykipaq.

Dios serviqkunam ñawpa tiempopi achka kutipi runakunapa qayllanpi rimarqaku. Jerusalenpi templota qespichisqanku tiempopiqa manaraqmi karqachu parlantewan rimanapaq aparatokunaqa, chaymi rurapusqanku patapi sayaykuspan rey Salomonqa llaqtamasinkunaman Diospa bendicionninkunamanta kallpawan willarqa (1 Rey. 8:55; 2 Cron. 6:13). Unay watakuna qepatañataqmi 33 kaq watapi, Jerusalenpi cristianokuna Pentecostes fiestapi chuya espirituta chaskiruptinku achka runakuna huñunakururqaku, wakinmi yachayta munaspanku, wakinñataqmi burlakunankurayku. Hinaptinmi apostol Pedro ‘sayariykuspan qayakuchkaq hina’ kallpawan rimarqa (Hech. 2:14). Chayna yachachisqanqa admirakuypaqmi karqa.

¿Imaynatataq musyawaq rimasqayki imayna uyarikusqanta? Chaypaqqa uyarisuqnikikunapim reparawaq. Uyarisunaykipaq pipas sasachakusqanmanta musyaspaykiqa kallpawan rimanaykipaqmi kallpanchakunayki.

Huk runallaman otaq achka runakunaman yachachispaykipas paykunapim reparanayki. Pipas karutaña uyarikuptinqa ichapas kallpawan rimanayki kanqa. Yuyaqña kasqanwan entiendeypi sasachakuptinqa manataqmi qayaykachachkaq hinachu rimanayki mana chayqa manam allinpaqchu hapisunki, wakinpiqa mana respetoyoq kasqaykitam piensanman. Wakin llaqtakunapiqa kallpawan rimaqtam piñakuqpaq otaq mana pacienciakuqpaq hina hapinku.

Uyarinankuta imapas sasachaptin. Predicasqanchikpi kallpawan otaq tumpallamanta rimanapaqqa maypi predicasqanchikman hinam kanan. Ichapas kallpawan rimana kanqa carrokuna ranranyaptin, warmakuna qapariptin, allqokuna wanwanyaptin, ima bullapas kaptin chaynallataq radiopas otaq televisionpas llumpayta uyarikuptin. Wakin sitiokunapiqa wasikunam qatinasllanpi kachkan, chaymi tumpallamanta rimana, mana chayqa wasiyoqmi hukman sientekunman vecinonpas uyarinanpaq hina rimaptinchikqa.

Congregacionpi otaq asambleakunapi discursota qochkaptiki yachachisqaykita uyarinankupaq imapas sasachaptinqa kallpawanmi rimanayki. Mana qatayoq localpi discurso qoyqa manam huñunakusqanchik Salonpi hinachu. Huk nacionpim 2 misionerokuna Diosmanta yachay munaq runapa pationpi discursota qorqaku gallo waqachkaptin chaynataq hichpanku plazapi cohetekunapas toqyachkaptin.

Discursota qochkaptiki uyarinankupaq imapas sasachaptinqa upallaykunaykim otaq kallpawanmi rimanayki. Piensarisun, calamina qatayoq localpi huñunakuy kachkaptin llumpayta paraykamuptinqa manapaschá yachachisqayki entiendeytaqa atinqakuchu. Chaynallataqmi sasachasunkiman wawakunapa waqasqanpas otaq huñunakuy qallariruptinña chayamuqkunapas. Chayna kaptinpas yachachisqaykita entiendechinaykipaqmi kallpanchakunayki.

Rimasqanchikta uyarinankupaq parlantewan rimanapaq aparatokunata servichikuspapas wakin kutipiqa allinta uyarinankupaqchá kallpawan rimana kanqa. Discursota qochkaptiki luz pasakuptinqa hinallam kallpawan rimanayki.

Imamanta yachachisqaykipi reparay. Imamanta yachachisqanchikman hinam kallpawan otaq tumpallamanta rimana. Yachachinaykipaq kaqta kallpawan rimanayki kaptinqa ama yanqacharuychu tumpallamanta rimaspaykiqa. Diospa mayqen juicionmantapas Bibliapi leespaykiqa kallpawanmi leenayki, kuyakuq kanapaq yachachikuykunamanta leespam ichaqa mana. Yachachisqaykiman hina kallpawan otaq tumpallamanta leey, ichaqa ama hatunchakuchkaq hinachu.

Kallpawan otaq tumpallamanta rimanapaq. Uyarisuqnikikunata kallpanchayta munaspaqa kallpawanpaschá rimanayki kanqa ichaqa ama qaparichkaq hinachu, chaynata rimaptikiqa hukmanyarunmankum. Pitapas consuelaspaqa llampu simillawanmi rimanayki.

Wakinpiqa kallpawanmi rimana. Pipas uyarisunaykita munaspaqa kallpawanmi rimanayki. Tayta-mamakunapas warmanku hawapi pukllaptinkuqa wasiman yaykunankupaqmi kallpawan qayanmanku. Congregacionpi otaq asambleapi huñunakuyta qallarichiqqa kallpawanmi rimanan. Bulla kasqanpi llamkaqman predicaspaqa allinmi kanman kallpawan saludaykuyqa.

Ichaqa hinallam kallpanchakunayki kallpawan rimapayanaykipaq. Mana uyarinanpaq hina rimaptikiqa mana yachasqaykita otaq hawa sonqolla rimasqaykitam piensanman.

Ima kamachikuymantapas kallpawan rimayqa allinmi kanman (Hech. 14:9, 10). Qaparisqanchikwanmi wakinpiqa librachwan runamasinchikta ima desgraciamantapas. Filipos llaqtapi carcelerom cuidasqan presokuna lluptirusqanta piensaspan wañurachikunanpaqña kachkarqa. Chaymi apostol Pablo qaparispan nirqa: “¡Ama imanakuychu, kaypim lliwchayku kachkaniku!”, nispa. Chayna qaparisqanwanmi chay runata salvarqa. Chaymantam Pablowan Silasqa carceleroman chaynataq wasinpi kaqkunamanpas Diosmanta yachachirqaku hinaptinmi llapallanku bautizakururqaku (Hech. 16:27-33).

Imaynatam kallpawan rimachwan. Wakinqa anchatam kallpanchakunku uyarichikunankupaq. Ichapas tumpallamanta rimaq kasqankurayku, chayna kaptinpas atinmankum kallpanchakuspaqa kallpawan rimayta. Kallpawan rimanaykipaqqa pulmonnikimanmi samayta huntachinayki hinaspapas derechotam sayanayki. Tiyaptikipas otaq sayaptikipas wasaykiwan umaykim derecho kanan. Hombroykita qepaman hoqarispa pulmonnikiman samayta huntachiy. Samaynikita imayna lloqsichiyta yachaspaykiqa uyarikunanpaq hinam rimanki.

Wakinñataqmi qaparichkaq hinaña rimanku. Ichapas chayna rimayta yacharunku llamkasqankupi otaq maymi kasqankupi bullallaña kaptin. Wakinqa ichapas wiñarqaku llumpay bullapa kasqanpi, chaymi piensanmanku qaparichkaq hina rimasqankuqa allin kasqanta. Bibliapa yachachisqanman hina ‘llakipayakuspa, sumaq sonqo kaspa, humillakuspa, llampu sonqo kaspa chaynataq pacienciakuspaqa’ atinmankum qaparichkaq hina rimasqankuta controlayta (Col. 3:12).

Allinta preparakusqayki, sapa kuti predicasqayki chaynataq Jehova Diosta mañakusqaykim kallpawan otaq tumpallamanta rimanaykipaq yanapasunki. Discursota qospaykipas otaq predicaspaykipas kallpanchakunaykim kallpawan rimaspayki uyarisuqnikikunata yanapanaykipaq (Prov. 18:21).