Ñam cosechanapaqña kachkan
1. ¿Ima ancha valorniyoq ruraymi kay tiempopi rurakuchkan?
1 Samaritana warmita Jesus predicaruspanmi qatiqninkunata nirqa: “Qawariychik tarpusqakunata, ñam kachkan poqosqaña cosechanapaq”, nispa (Juan 4:35, 36). Arí, cheqapmanta yachay munaqkunatam huñuchkarqaku, Jesusqa yacharqamá enteron pachapi chay rurakunanta. Kay tiemponchikpipas Jesusqa hinallam hanaq pachamanta chayta ruranapaq yanapawachkanchik (Mat. 28:19, 20). ¿Imakunataq qawachiwanchik chay ruray astawan yapakusqanta?
2. ¿Imakunam qawachin enteron pachapi cosecha astawan yapakusqanta?
2 Enteron pachapi cosecha. Pasaq 2009 watapim Jehová Diospa llaqtan enteron pachapi astawan yapakurqa (3,2%). Predicananchikta mana munaq nacionkunapipas yapakurqam (14%). Sapa killam 7.619.000 runakunaman Bibliamanta yachachirqaku, chayqa llapallan Testigokunamantapas masninraqmi, hinaspa 2008 watapi Bibliamanta estudio qosqanchiktaqa masyanmi yaqa pichqa pachak waranqawan. Chayna yapakusqanraykum huklaw nacionkunapi astawan necesitakun misionerokunata. Achka nacionkunapim huk rimayniyoq runakunapas Diospa llaqtanman yaykuchkanku. Sutillamá Jehová Diosqa astawan huñuchkan kay cosecha tiempopa tukupayninpiqa (Isa. 60:22). Hinaptinqa, ¿predicasqayki lawpi runakunata yachay munaqta hinachu qawanki?
3. ¿Imatam wakin iñiqmasinchikkuna ninku predicasqanku lawpi runakunamanta?
3 Llaqtanchikpi cosecha. Pipas ninmanpaschá: “Predicasqay lawpi runakunaqa manam uyarinkuchu”, nispa. Arí, wakin sitiokunapiqa manañam yachay munaq runakunaqa achkañachu kanku, chaymi wakin iñiqmasinchikkuna ninku, chay lawpi tukurusqanta hinaspa puchuqkunallataña yanapana kasqanta. Ichaqa, ¿chaynachu kanman?
4. ¿Imaynatam predicayninchikta qawananchik, hinaspa imanasqa?
4 Cosecha tiempopiqa qallariyninmanta tukuyninkamam anchata llamkana. Chaynallataqmi Jesuspas kaynata nirqa: “Achkallañam kachkan cosechanapaqqa, cosechaqkunam ichaqa aslla. Chaynaqa mañakuychikyá chakrayoqta cosechaqkunata kachananpaq”, nispa (Mat. 9:37, 38). Jehová Diosmi chakrayoqqa, paymi yachan haykapi hinaspa maypi cosecha kanantaqa (Juan 6:44; 1 Cor. 3:6-8). Ñoqanchikqa, ¿imatam rurananchik? Bibliam nin: “Tutapaymanta muhuykita tarpuy. Ama pisipaspayki chisinkuytapas tarpuy”, nispa (Ecl. 11:4-6). Arí, cosechaqa ñam tukuykuchkanña, ¡manam samanapaq tiempochu!
5. ¿Imanasqataq hinalla ganaswan predicananchik runakuna mana uyariyta munachkaptinkupas?
5 Cosechaqa manam tukunraqchu. Predicasqayki lawpi achka kutitaña predicaptiki manaña pipas interesakuptinpas, allinpunim ganaswan hinalla predicayqa (2 Tim. 4:2). Kay pachapi tukuy ima pasakusqanmi runakunapa imayna kasqanta cambiachin hinaptinmi yuyaymananku hamuq tiempomanta. Mozo-sipaskunapas wiñasqankuman hinam hawkayaytawan seguro kayta maskanku. Ñawpaqta mana uyariy munaqkunapas yaqapaschá sapa kuti predicananchikpaq kallpanchakusqanchikta qawaspanku admirakunqaku, hinaspa ñoqanchikmanta yachayta munanqaku. Chaymantapas, yachachkaspanku mana uyariy munaqkunapas willasqamá kananku (Eze. 2:4, 5; 3:19).
6. ¿Imataq yanapawasun ganaswan hinalla predicanapaq?
6 Sichu predicasqanchik lawpi mana uyariwaptinchikpas, ¿imataq yanapawasun hinalla kusisqa predicanapaq? Wasin-wasin predicaspapas, predicachwantaqmi negociokunapi hinaspa telefonowanpas. Predicaspapas manataqmi hina kaqllamantachu rimananchik, aswanmi yachay munasqankumanta. Lloqsichwantaqmi tarden lawpi, otaq wasinkupi runakunata tarinapaq horapi. Ichapas huk rimaytapas yachachwan huk runakunaman astawan predicanapaq. Sichu precursor regular kaspaqa astawanmi predicayta atisun. Chaymantapas atispaqa mana ancha predicasqa lawkunamanmi richwan. Achka llamkayraq kasqanta piensaspaqa kallpanchakusunmi astawan predicanapaq.
7. ¿Haykapikamataq llamkananchik kay cosechapi?
7 Chakrapi llamkaqkunaqa pisi tiempollapim imapas kawsayninkuta huñunanku, chaymi mana samaspa llamkanku tukunankukama. Chaynallataqmi Dios serviyninchikpipas llamkana. ¿Haykapikamataq chayta rurasun? ‘Kay pacha [otaq mana allinkuna] puchukanankamam’ (Mat. 24:14; 28:20). Jesus hinam ñoqanchikpas Diospa kamachiwasqanchikta tukuyta munanchik (Juan 4:34; 17:4). Chaynaqa hinallayá ganaswan hinaspa kusikuywan predicasunchik puchukay tiempo chayamunankama (Mat. 24:13). ¡Manamá cosechaqa tukunraqchu!
[2 kaq paginapi suti rikuylla kaq willakuy]
Cosecha tiempopiqa qallariyninmanta tukuyninkamam anchata llamkana