Bosquejota servichikunapaq

WAKINQA manchapakunkum bosquejota servichikuspa rimayta, chaymi piensanku umallankumanta yachachinankupaq kaqta lliwta yacharuspa otaq qellqaruspaqa mana manchapakuspa rimanankupaq kasqanta.

Familianchikwan otaq amistadninchikwan rimaspaqa manam qellqarusparaqchu rimanchik. Chaynallataqmi predicaspapas, Diosta tukuy sonqowan mañakuspapas otaq piwan rimaspapas.

¿Imapitaq mana tupanchu leespalla discurso qoyqa bosquejopa nisqanman hina rimaywanqa? Leespalla yachachiqqa imam kaqtam leen ichaqa manam allintachu uyariqninkunata yanapan. Imamantapas leespalla yachachiptikiqa uyarisuqnikikunam mana atencionwanchu uyarisunki. Uyarisuqnikikunata kallpanchayta munaspaqa sapa punchaw rimasqaykiman hinalla bosquejota servichikuspa rimay.

Diosmanta Yachachinapaq Escuelam yanapawanchik sapa punchaw allinta rimananchikpaq. Amistadninchikwan parlaspaqa manam ima niy munasqanchiktaqa papelmantaraqchu leenchik. Predicaq rispapas willakuy munasqanchiktaqa manam qellqaruspachu apanchik. Pimanpas imayna predicanapaq Escuelapi demostracionta ruraspaqa sapa punchaw rimasqaykiman hina rimanaykipaq kallpanchakuy. Yachachinaykipaq kaqta sumaqta preparakuspaqa allintam rimanki qellqaruspapas otaq umallaykimantapas. ¿Imaynatam mana manchapakuspa rimawaq bosquejota servichikuspa?

Tanteay ordenninpi rimanaykipaq. Bosquejota servichikuspa rimanayki kaptinqa imamanta yachachisqanta allinta entiendey. Chayqa manam palabrakunata akllayllachu aswanqa imayna rimanapaq tanteaymi.

Rimayninpi mana controlakuq runaqa mana tanteaspam imamantapas riman hinaspam chayna rimasqanmanta pesakun. Wakinñataqmi hukta-huktaña rimanku. Chaynata mana rimanapaqmi imamantapas manaraq rimachkaspa allinta piensarina. Puntata piensay uyarisuqnikikunata imayna yanapanaykipaq hinaspa rimayta qallariy.

¿Predicacionpaqchu alistakuchkanki? Chaypaqqa ama maletinllaykitachu otaq bolsallaykitachu alistay, imamanta willakunaykipaq kaqkunapipas reparay. Diospaq Llamkayninchik qellqapi yanapakuykunata predicanaykipaq servichikunayki kaptinqa achka kutikama leey ima nisqanmanta allinta entiendenaykipaq hinaspa pisillapi rimanaykipaq kallpanchakuy. Tanteaytaq imayna rimasqaykiman hinalla rimanaykipaq chaynataq predicasqayki lawpi pikunapaq kasqanpipas. ¿Imakunamantataq rimawaq? 1) Predicasqayki lawpi runakunata ima sasachasqanmanta. Uyarisuqnikita kallpanchay rimananpaq. 2) Chay sasachakuy imayna allichasqa kananta Bibliapi hukta otaq iskay textota leespa qawachiy, hinaspa explicay chay sasachakuykunata Gobiernonwan Jehova Dios imayna allichananmanta. 3) Uyarisuqnikita kallpanchay willasqaykiwan yanapachikunanpaq. Mayqen qellqatapas qoy otaq Biblia estudianaykichikpaq niy chaynataq yapapi hinalla rimanaykichikpaqpas.

Chaynata predicanaykipaqqa imamanta yachachinaykipaq kaqta umallaykipi tanteay. Imamanta predicanaykipaq kaqta qellqaspaqa rimayta qallarinaykipaq pisi rimayllapi qellqay, hukta otaq iskay textokunallata chaynataq rimayta tukunaykipaq kaqtapas. Rimanaykipaq kaqta chaynata preparakuspaqa yuyanankupaq hinam allinta yachachinki.

Predicasqanchik lawpi imamantapas tapusuptikiqa chaykunamanta contestanaykipaq yachachikuykunata maskay hinaspa iskay otaq kimsa textokunatapas qellqay chay yachachikuykunawan tupaq kaqkunata. Ichapas necesitasqayki yachachikuykunata tariwaq Traducción del Nuevo Mundo de las Santas Escrituras nisqa Bibliapi “Temas bíblicos para consideración” nisqanpi otaq Razonamiento a partir de las Escrituras nisqa libropi yana letrawan qellqasqa subtitulonkunapi. Servichikuwaqtaqmi huk qellqanchikkunatapas. Hinaspa chay tarisqayki yachachikuykunata pisi rimayllapi qellqaspa predicacionman apanaykipaq maletinnikipi otaq bolsaykipi churay. Chayna preparakusqaykiman hina wasiyoq tapusuptikiqa chayman hina allinta explicay (1 Ped. 3:15).

Familiaykipaq otaq iñiqmasikikunapaq Diosta mañakuspaqa manaraq qallarichkaspa imakunamanta orakunaykipaq allintaraq piensariy. Jesuspas imakunamanta mañakunankupaqmi discipulonkunaman yachachirqa (Luc. 11:2-4). Jerusalenpi templota qespirachispanmi rey Salomonpas Jehova Diosta unayta mañakurqa. Paypas tiempowanchá yuyaymanarqa imakunamanta mañakunanpaq. Puntatam rimarqa Davidman Jehova Dios prometesqanmanta, templomanta hinaspa imawan sasachakusqankumanta chaynataq wakin runakunamantapas (1 Rey. 8:22-53). Ñoqanchikpas paykuna hina mañakunapaqmi kallpanchakunanchik.

Imaynam bosquejoqa kanan. ¿Hayka yachachikuykunatam bosquejoykipi qellqawaq discursota qonaykipaq?

Bosquejoqa yachachinaykipaq kaqkunata yuyarinaykipaqmi yanapasunki. Rimayta qallarinaykipaq kaqta pisillata qellqay hinaspa imakunamanta yachachinaykipaq kasqanpipas reparay. Bosquejoykipi aswan allinnin kaq yachachikuykunaqa sutillam kanan, chaykunata mayúscula letrawan qellqay otaq imay colorwanpas señalay. Servichikuytaq chay yachachikuykunawan tupaq wakin yachachikuykunatapas hinaspa textokunatapas. Bibliamantapuni chay textokunata leeyqa allinmi kanman. Bosquejoykipiqa qellqawaqtaqmi servichikunaykipaq kaq rikchanachiykunata hinaspa reqsisqa runapa rimasqanmanta willakuykunatapas. Chaykunamanta willayta munaspaqa imam kaqtam qellqanayki. Yachachinaykipaq kaqta ordenninpi preparakuspaqa allintam yachachinki.

Wakin discursantekunaqa imamanta yachachisqanta yuyanankupaqmi bosquejonkupi anotanku wakin palabrakunata otaq wakin textokunata, servichikunkutaqmi dibujokunatapas. Chayna preparakusqankuwanmi uyariqninkunawan parlachkaqpas hina ordenninpi yachachinku. Kay yachachikuymi chaynata yachachinapaq yanapawanchik.

Kay libropi 39-42 paginankunapi “Discurso qonaykipaq kaqta qellqay” nisqan yachachikuymi yanapasunki kay yachachikuyman hina ruranaykipaq.

Imaynatam bosquejota servichikuwaq. Discursota qonapaqqa manam bosquejo preparayllachu, yachanaykim bosquejoykita imayna servichikuytapas.

Bosquejoykita allinta servichikunaykipaqqa puntatam preparakunayki. Titulonpi reparay, aswan allinnin kaq yachachikuykunata leey hinaspa chay yachachikuykuna yachachisqaykiwan imayna tupasqanpi piensay. Aswan allinniq kaq yachachikuykunamanta astawan entiendechinaykipaq tiempochakuy. Chaymanta punta aswan allinnin kaq yachachikuyta estudiaspa kaykunapi reparay: ejemplokunapi, textokunapi hinaspa yachachinaykipaq kaq rikchanachiykunapipas. Yuyanaykipaq achka kutikama practicay. Chaynata ruray qatiqninpi wakin yachachikuykunawanpas. Tiempollanpi tukunaykipaqpas tanteay imakunamanta manaña rimanaykipaq. Hinaspa bosquejoykipi kaqta llapanta practicay ichaqa aswan allinnin kaq yachachikuykunapi reparaspa. Amataqyá lliw rimanaykipaq kaqtaqa umaykipi takyachiychu.

Discursota qospaqa uyarisuqnikikunata qawarispa rimanaykipaq kallpanchakuy. Textota leespaqa uyarisuqnikikunata piensarichiy qellqasqaykikunata ama qawaspalla. Rikchanachiyta servichikuspapas ama leeychu, amistadnikiwanpas rimachkaq hina willay. Rimanaykipaqqa amataq sapa kutichu bosquejoykita qaway aswanqa sonqoykimanta rimay, chaynata ruraspaqa uyarisuqnikikunatam kallpanchanki.

Allinta rimanaykipaq bosquejo servichikuyta yachaspaqa allin discursante kanaykipaqmi ñawparichkanki.