Iñiqmasinchikkunaman yachachinapaq imayna preparakuymanta

DIOSMANTA Yachachinapaq Escuelapi yachachikuykunaqa huñunakuypi kaqkunata yanapananpaqmi, chaynallataqmi wakin huñunakuykunapi hinaspa asambleakunapi yachachikuykunapas. Mayqen huñunakuypipas yachachinaykipaq nisuptikiqa chayman hinam ruranayki allinta preparakuspa yachachinaykipaq. Apostol Pablom Timoteota kallpancharqa allin yachachiq kananpaq (1 Tim. 4:16). Huñunakuykunaman hamuqkunaqa tiempochakuspam Diosmanta yachanankupaq hamunku, wakinpiqa ima sasachakuytapas atipaspa. Chaymi congregacionpi yachachiytaqa anchata chaninchana, ¿imata ruraspataq allinta yachachiwaq?

Biblia leesqanchikmanta akllasqa yachachikuykuna

Kay yachachikuyqa escuelapim rurakun sapa semana Biblia leesqanchikmanta. Chayqa tukuy imapi yanapawananchikpaq hinam kanan. Nehemias 8:8 nisqanman hinam Esdrasqa compañaqninkunapiwan Diospa Palabranta runakunapa qayllanpi leerqaku, hinaspam entiendenankupaq yachachirqaku. Chaynatam qampas rurawaq Biblia leesqanchikmanta akllasqa yachachikuykunata yachachispayki.

¿Imaynatam chaypaq preparakuwaq? Atikuptinqa chay semanapaq kaq textokunata leey huk semana faltachkaptinraq otaq ñawpaqtaraq hinaspa congregacionnikipi kaqkuna imapi kallpanchakunanpaq kasqanpi piensay. Chaypaqqa Jehova Diosta mañakuy. Chay semanapaq textokunamanta tanteay, ¿mayqen consejokunataq, ima ejemplokunataq hinaspa mayqen yachachikuykunataq allin kanman iñiqmasinchikkunata yanapanaykipaq?

Chaynata ruranaykipaqqa allintaraqmi yachanayki. ¿Kapusunkichu entiendesqayki idiomapi Watchtower Library en CD-ROM hinaspa Índice de las publicaciones Watch Tower nisqa? Chayna kaptinqa allinta servichikuy chay yanapakuykunata. Chaypim tarinki akllasqayki textokunamanta astawan entiendenaykipaq yachachikuykunata, imakuna pasasqanmanta, profeciakuna imayna cumplikusqanmanta, Jehova Diospa imayna kayninmanta chaynataq Bibliapa consejonkunamanta astawan entiendenapaq yachachikuykunatapas. Achka yachachikuykunamanta yachachinaykimantaqa iskay-kimsa versiculollamanta allinta yachachiy.

Chaymantapas huñunakuypi kaqkunatam niwaq chay semanapaq Biblia leesqanku imakunapi yanapasqanmanta rimarinankupaq. ¿Leesqankumanta mayqen yachachikuytataq servichikunmanku sapanku otaq familiankuwan estudiasqankupi chaynataq predicacionpi otaq vidankupipas? ¿Imaynataq Jehova Diosqa karqa runankunawan hinaspa huk runakunawanpas? ¿Leesqankumanta ima yachasqankutaq iñiyninkupi chaynataq Jehova Diosta astawan kuyanankupaq kallpanchan? Sapa palabramanta rimanaykimantaqa akllasqayki textokuna imamanta yachachisqanpi hinaspa imayna yanapasqanpi piensay.

Diosta Servinapaq Huñunakuy

Diospaq Llamkayninchik qellqamanta discurso qonaykipaq kaptinqa manam allinnin kaq yachachikuykunallatachu akllanayki aswanqa huñunakuypi kaqkunamanmi lliw yachachikuyninmanta entiendechinayki. Chaymantapas yachachisqaykikuna Bibliapa textonkunawan imayna tupasqanmanta entiendenankupaq yanapay (Tito 1:9). Tiempo pisilla kasqanraykum mana atiwaqchu huk yachachikuykunamantawan rimaytaqa.

Wakin kutipiqa manapaschá Diospaq Llamkayninchik qellqamantachu yachachinki, ichapas Willakuq revistapa mayqen yachachikuyninmanta otaq huk yachachikuymantapas. Yachachiq kasqaykiraykum tanteanayki congregacionnikipa necesitasqanman hina yachachinaykipaq. Ichapas allin kanman yachachisqaykiwan tupaq rikchanachiyta otaq experienciatapas pisi rimayllapi willaspa yachachiynikiqa. Imamantapas yachachispaykiqa manam rimayllachu rimanayki aswanqa iñiqmasinchikkunatam yanapanayki Diospa kamachisqanta kasukuspa kusikuyta tarinankupaq (Hech. 20:20, 21).

Discursoykita preparaspaqa huñunakuypi kaqkuna imayna tarikusqankupi piensay. Imakunapi kallpanchakusqankumanta alabay. ¿Imaynatataq iñiqmasinchikta yanapanman yachachisqaykita kasukuyninku Dios serviyninkupi kusisqa kanankupaq?

¿Demostraciontachu rurachinki, icha mayqen iñiqmasinchiktachu imamantapas tapunayki kanqa? Chayna kaptinqa tiempowan ensayachiy. Yaqapaschá chayta ensayachipusunaykipaq hukta niwaq, ichaqa manam allinchu kanman chayna ruraynikiqa. Kallpanchakuy huñunakuy punchaw manaraq chayamuchkaptin ensayachinaykipaq, chaymantapas segurakuy yachachisqaykiwan tupaqta ruranankupaq.

Asambleakunapi

Dios serviyninkupi kallpanchakuq hinaspa congregacionpi allin yachachiq iñiqmasinchikkunatam tiempopa risqanman hina asambleapi discursota qonankupaq ninku. Asambleakunapi Diosmanta yachasqanchikqa mana qonqanapaqmi. Ichapas asambleapi yachachinaykipaq chaskiwaq leenaykipaq bosquejota, kunan tiempopi yanapawananchikpaq drama imayna kananpaq willakuyta otaq ima yachachikuytapas. Asambleapi imamantapas yachachinaykipaq nisuptikiqa allinta estudiay imanasqa chay yachachikuy allin kasqanta entiendenaykikama.

Asambleapi leenaykipaq bosquejota chaskispaykiqa imayna qellqasqa kasqanman hinallam leenayki. Chayta leenanpaq chaskiqqa allintam estudianan mayqan partenpi allinnin kaq yachachikuykuna kasqanmanta cuentata qokunanpaq hinaspa chayman hina yachachinanpaq. Chaymantapas uyarikunanpaq hina leespam musyawaq mayqen partepi kallpawan, ganaswan hinaspa imayna sentimientowan leenaykipaq chaynataq tukuy sonqomanta convencisqa leenaykipaqpas. Chaymantapas asambleapi kaqkuna allinta uyarinankupaq hinam rimanayki.

Yachachinaykipaq bosquejota chaskispaykiqa allintam preparakunayki chayman hina yachachinaykipaq. Discurso qosqaykipi wakinta leenaykimantaqa otaq llapanta qellqaruspa leenaykimantaqa piwanpas rimachkaq hinam sentimientowan yachachinayki. Hayka tiempopi rimanaykipaq kasqanman hinallam yachachisqaykiwan tupaqnin yachachikuyninkunatawan textonkunata servichikuspayki allinnin kaq yachachikuyninkunata allinta entiendechinayki. Bosquejoykipi nisqanman hinalla yachachiy, ama imatapas yapaychu munasqaykiman hinaqa. Yachachispanchikqa Diospa Palabranpa nisqanman hinam yachachinanchik, ancianokunam ‘Diospa Palabranmanta’ asambleapi yachachiqkunaqa kanku (2 Tim. 4:1, 2). Chaymi yachachiqqa bosquejonpa textonkunapi allinta reparanan, chayman hina uyariqninkunata piensarichinanpaq chaynataq imapi yanapasqanta qawachinanpaqpas.

Tiempowan preparakuy

¿Yaqachu sapa kuti congregacionnikipi discursota qonki? ¿Imaynatataq allinta yachachiwaq? Chaypaqqa tiempowanmi preparakunayki.

Huñunakuypi kaqkunata yachachisqanchikwan kallpanchanapaqqa tiempowanmi piensana. Haykapi discurso qonaykita yachaspaqa chaylla preparakuy, chaymi yanapasunki imata ruraspapas chaypi piensanaykipaq. Discurso qonaykipaq huk semanaraq otaq iskay-kimsa punchawraq faltachkaptin imamanta rimasqankuta otaq yachachinaykipaq hina imapas pasasqanmanta uyarispaykiqa ichapas chaykunata servichikuwaq. Leenaykipaq hinaspa yuyaymananaykipaq tiempochakusqaykiqa manam yanqapaqchu kanqa. Chaykunaqa yanapasunkim bosquejoykita mana sasachakuspalla allinta preparakunaykipaq. Chaynata ruraspaykiqa hawkallam yachachinki, chaynapim uyarisuqnikikunata yachachisqaykiwan kallpanchanki.

Jehova Diospa llaqtanpi yachachinapaq favorecesqa kasqanchikta chaninchasqanchikman hinam Jehova Diosta hatunchasun, chaynataqmi payman sonqo kaqkunatapas yanapasun (Is. 54:13; Rom. 12:6-8).