Diospa Palabranmanta yachay
¿Pitaq Jesucristoqa?
Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.
1. ¿Pitaq Jesucristoqa?
Manam runakuna hinachu karqa. Kay Pachapi manaraq nacechkaspanmi hanaq pachapi kawsarqa espiritu cuerpopi (Juan 8:23). Paytam Diosqa puntata unancharqa. Chaymantam Jesusqa Taytanta tukuy ima unanchaypi yanaparqa. Bibliam sutichan ‘sapallan churi’ nispa Dios puntata payta unanchasqanrayku. Bibliaqa sutichantaqmi ‘Simi’ nispa Diospa rantinpi rimaq kasqanrayku (Juan 1:1-3, 14; leey Proverbios 8:22, 23, 30; Colosenses 1:15, 16).
2. ¿Imanasqataq Jesusqa kay Pachaman hamurqa?
Hanaq pachamanta kay Pachaman kachamuspanmi Diosqa Maria sutiyoq doncella sipaspa wiksanman Churinta churarqa. Chaymi Jesuspa taytanqa mana runachu karqa (Lucas 1:30-35). Kay Pachamanmi hamurqa 3 asuntorayku: 1) Diosmanta cheqapta yachachinanpaq, 2) ejemplonwan Dios imayna serviyta qawachinanpaq, 3) ‘rantinchikpi wañuspa’ librawananchikpaq. (Leey Mateo 20:28; Juan 18:37.)
3. ¿Imamantam librawanchik?
Pipas preso kaptinqa librasqa kanapaqmi paganku. Chayman rikchakuqmi runakunaqa wañuypa presochasqan kachkanchik. Diosqa manam chaytachu munarqa runata unanchaspanqa. Ichaqa Adanmanmi Jehová Diosqa nirqa mana kasukuspanqa wañunanmanta. Kasukuspanqa wiñaypaqmi kawsanman karqa. Pachaknintin watakuna Adan kawsaspanpas mana kasukusqan punchawmantapacham wañuyta qallaykurqa (Genesis 2:16, 17; 5:5). Chaymi Biblia nin Adanwan ‘wañuy rikurisqanmanta’. Adanmantam mirarqanchik chaymi herenciata hina huchallikuyta chaskirunchik chayraykum yuyaqyaspa wañunchik. Chaymi huchamantawan wañuymanta libraqninchikta necesitanchik. (Leey Romanos 5:12; 6:23.)
4. ¿Imanasqataq Jesusqa wañurqa?
¿Pitaq pagayta atinman wañuymanta librawananchikpaq? Wañuspanchikqa huchallikusqanchikmantam paganchik. Huchallikuq kasqanchikraykum mana atichwanchu pitapas huchamanta hinaspa wañuymanta libraytaqa. (Leey Salmo 49:7-9.)
Jesusqa Diospa Churin kasqanraykum mana huchallikuq karqa. Chaymi payqa wañurqa runakunapa huchanmanta pagananpaq manam kikinpa huchanraykuchu. Diosqa runakunatam anchata kuyan chaymi churinta kachamurqa ñoqanchikrayku wañunanpaq. Jesuspas kuyawasqanchiktam qawachin Taytanpa kamachisqanman hina huchanchikrayku vidanta qosqanwan. (Leey Juan 3:16; Romanos 5:18, 19.)
5. ¿Imatam kunanqa rurachkan?
Jesusqa onqoqkunatam sanoyachirqa, wañuqkunatam kawsarichirqa, ñakariqkunatam yanaparqa chaykunata rurasqanwanmi qawachirqa Diosman sonqo kaqkunapaq hamuq tiempopi ima rurananta (Lucas 18:35-42; Juan 5:28, 29). Jesustam Dios kawsarichirqa hinaspam espiritu cuerpota hanaq pachapi qorqa (1 Pedro 3:18). Chaymantam suyarqa kay Pachata Kamachinanpaq Jehová Dios nombranankama (Hebreos 10:12, 13). Kay tiempopiqa Jesusmi hanaq pachamanta gobiernamuchkan, discipulonkunañataqmi allin noticiamanta Allpantinpi willakuchkanku. (Leey Daniel 7:13, 14; Mateo 24:14.)
Jesusqa chayllam atiyninta servichikunqa mana allin runakunata hinaspa mana allin rurasqankuwan ñakariykunatapas chinkachinanpaq. Jesuspi iñispa kasukuqkunam paraisopi kusisqa kawsanqaku. (Leey Salmo 37:9-11.)