Unanchaqninchikmi runakunaman sumaq huertata qon

‘TUKUY imapa qallariyninpim cielokunata hinaspa kay pachata Dios unancharqa’ (Genesis 1:1). Kay rimaykunaqa ancha reqsisqam. Kay sumaq rimaykunawanmi Bibliaqa qawachiwanchik tukuy atiyniyoq Jehová Dios, lliw imakunata Unanchaq kasqanta. Qatiqninpim niwanchiktaq, unay tiempokunapi otaq punchawkuna nispa sutichasqanpi kay Allpa pachatawan tukuy ima admirakunapaq kaqkunatapas Dios unanchasqanta.

Kay Pachapi aswan allin kaq unanchasqanqa runakunam karqa. Punta kaq runatam unancharqa ñutu allpamanta. Payman rikchakuqtam unancharqa otaq paypa kuyakuyninta, yachayninta hinaspa wakin sumaq kayninkunatapas qatipakuy atiqta. Suticharqam Adan nispa, hinaspam Eden huertapi churarqa. Chay huertataqa kikin Diosmi rurarqa, chaypiqa karqam miskillataña ruruq achkallaña sachakuna.

Huk punchawmi Diosqa tantearurqa Adan mana sapallan kananpaq. Chaymi costillanmanta Eva sutiyoq warmita rurarurqa, hinaspam Adanman qorqa señoran kananpaq. Adanmi ancha kusisqa tarikurqa, hinaspam kaynata nirqa: “Payqa tulluymanta hinaspa aychaymanta kaqmi”, nispa. Arí, Bibliam nin: “Chayraykum qariqa tayta-mamanta saqespa hukllawakunqa warminmanña chaymi iskayninku huk runa hinallaña kanqaku”, nispa (Genesis 2:22-24; 3:20).

Adanwan Evaqa Diospa iskay kamachisqankunatam kasukunanku karqa. Puntataqa, Allpata cuidaspankum llamkananku karqa, hinaspam achka wawa-churiyoq kananku karqa. Chaymantapas, huertapa chawpinpim chullalla sacha karqa ‘allin kaqta hinaspa mana allin kaqta yachanapaq’, chay sachapa ruruntaqa manam mikunankuchu karqa (Genesis 2:17). ¿Imataq pasanman karqa mana kasukuptinkuqa? Wañunankumá karqa. Kasukuspankuqa qawachinmankum karqa kamachiq kasqanta respetasqankuta, kuyasqankuta hinaspa ancha agradecekusqankutapas. Arí, punta kaq warmi-qaritaqa manam imapas sasacharqachu kuyakuq Unanchaqninkuta kasukunankupaqqa. Paykunaqa mana pantaqmi karqaku, Bibliam nin: “Diosmi qawarqa lliw rurasqankuna sumaqllaña kasqanta”, nispa (Genesis 1:31).

(Genesis 1, 2.)