Lliw runakuna uyarinankupaq hina predicasun
1. ¿Imaytam ñawpa cristianokuna runamasinkuman predicaqku hinaspa imatam yachachiwanchik?
1 Apostolkunapa tiemponpi cristianokunaqa lliw runakunamanmi predicaqku (Col. 1:23). Diospa Gobiernonmanta willakuspankupas runamasinkupi reparaspam tanteaqku imaynata predicanankupaq. Judiokunaqa Diospa Palabrantam respetaqku, chaymi paykunapi reparaspan apostol Pedroqa willarqa Joelpa nisqanta servichikuspan (Hech. 2:14-17). Diospa Palabranta griego runakunaman willananpaqmi Pabloqa paykunata yuyaymanachispan predicarqa (Hech. 17:22-31). Kananpas wakin runakunaqa Bibliatam allinpaq hapinku, chaymi mana iskayrayaspa paykunamanqa willachwan. Wakin runamasinchikqa huk religionniyoqmi kanku otaq Bibliamanta hinaspa religionmanta mana uyariy munaqkunam, chaymi Diospa Palabranta uyarinankupaq hina reparaspa yachachinanchik.
2. ¿Imaynatam predicachwan Diospa Palabranta mana uyariy munaqman otaq uyariy munaqmanpas?
2 Predicananchikpaq qellqanchikkunata allinta servichikusun. Kay septiembre killamantapacham iskay killa predicasun chay killakunapaq sapaqchasqa qellqanchikkunawan; chaypaqmi servichikusun revistakunata, tratadokunata hinaspa folletokunata. Diospa Palabranta mana uyariy munaqkunataqa yachachichwanmi imam paykunapaq hina qellqanchikkunapi lloqsimuqwan. Pipas yachayta munaptinqa yapamanta watukuspam yanapana Unanchawaqninchikpi chaynataq Palabranpi iñinankupaq. Diospa Palabranta respetaq runakunawan rimaspaqa munachichwanmi qellqanchikkunapi yachachikuykunata leenanpaq. Chay killakunapi servichikunapaq mana tupawaptinchikpas servichikuchwanmi Yachachiq librota hinaspa Diosta uyariy otaq Diosta uyariy hinaspa wiñaypaq kawsay folletokunatapas. Diospa Palabranta lliw runakuna uyarinankupaq hinam predicananchik.
3. ¿Imanasqam yanapananchik llampu sonqoyoq kanankupaq?
3 Llampu sonqoyoq kanankupaq yanapasun. Runapa sonqonqa chakrapi tarpunapaq allpa hinam (Luc. 8:15). Diospa Palabran sonqonkupi sapichakuspa wiñananpaqmi llampu sonqoyoq kanankupaq yanapananchik. Chaynatam apostolkunapa tiemponpi cristianokunapas rurarqaku runamasinkuta yanapanankupaq, hinaptinmi Dios serviyta qallaykuptinku paykunaqa anchata kusikurqaku (Hech. 13:48, 52). Ñoqanchikpas atichwanmi chayna yanapayta uyariwaqninchikkunapi allinta reparaspaqa.