Hinallayá kallpanchakusun aswan allinta willakunapaq
1. ¿Pikunatam qatipakunanchik aswan allin yachachiq kananchikpaq?
1 Diosta yupaychaqkunaqa hinallam kallpanchakunanchik yachachisqanchik aswan allin kananpaq. Chaymi Jesusqa qatiqninkunata yanaparqa Diosmanta aswan allinta willakunankupaq (Luc. 9:1-5; 10:1-11). Chaynatam Priscilawan Aquilapas ruwarqaku, paykunaqa Apolostam ‘Diospa ruwasqanmanta aswan allintaraq yachachirqaku’ (Hech. 18:24-26). Pablopas Timoteotam kallpancharqa aswan allin yachachiq kananpaq unay watakunaña Diosmanta willakuptinpas (1 Tim. 4:13-15). Hayka wataña Diosta yupaychaspanchikpas hinallam ñawparinanchik Diosmanta aswan allin yachachiq kananchikpaqqa.
2. ¿Imatam ruwananchik iñiqmasinchikkunamanta yachanapaq?
2 Hukkunamanta yachasunchik. Hukkunapa imayna yachachisqankuta qawaspam astawan yachasunchik (Prov. 27:17). Diosmanta willakuq lluqsispanchikqa puriqmasinchikpa imayna rimarisqantam allinta uyarinanchik. Chaymantapas Diosmanta allintapuni willakuq iñiqmasinchikkunata tapukuspa willawasqanchikta uyarisun (Prov. 1:5). ¿Sasachakunchikchu runakunaman kaqmanta watukuq riyta, Bibliamanta yachachiyta otaq huk ruwaykunapipas? Chayna kaptinqa yanapakuytayá maskasun. Jehova Diospa chuya espiritunpas yanapawasunmi allin yachachiq kananchikpaq. Chaymi sapa kuti mañakunanchik chuya espiritunta quwananchikpaq (Luc. 11:13).
3. ¿Imaynam kananchik yanapawaptinchikqa?
3 Amayá piñakusunchu pipas allinninchikpaq rimapayawaptinchikqa (Ecl. 7:9). Apolos hinayá ama hatunchakuspa yanapakuykunata chaskisun. Chaynata ruwaspam yachayniyuq kasqanchikta qawachisun (Prov. 12:15).
4. ¿Imakunaraykum Diosmanta aswan allin willakuqqa kananchik?
4 Diosta hatunchasun. Jesusqa huk rikchanachiywanmi qatiqninkunata kallpancharqa Diosmanta aswan allinta willakunankupaq. Jesusqa uvas sacha hina pay kasqantam nirqa, qatiqninkunañataq ruruq kallmankuna hina kasqanta, paykunatam Diosqa rawmachkaq hina yanaparqa astawan ‘rurunankupaq’ (Juan 15:2). Imaynam uvas sachayuq runapas uvasninkuna achka rurunanta munan, chaynam Jehova Diospas munan paymanta aswan allinta ‘willakunanchikta’ (Heb. 13:15). ¿Imapaqtaq Diosmanta aswan allin willakuqqa kananchik? Jesusmi kaynata niwanchik: “Taytaqa hatunchasqam achkata ruruptikichikqa”, nispa (Juan 15:8).