Sumaq rikchayniyoq mosoq tratadokuna
1. ¿Mayqan qellqanchikkunam sumaq rikchayniyoq kachkan predicananchikpaq?
1 2013 watapim, “Diospa Palabranqa Cheqapmi” niq kimsa punchaw asambleapi chaskirqanchik pichqa mosoq tratadokunata, chaymanta qepatam lloqsimurqa Diospa Gobiernonmanta noticiakuna 38 kaq tratado, sutinmi ¿Atinmankuchu wañuqkuna kawsarimuyta? Kay soqta tratadokunaqa sumaq rikchayniyoqmi kachkan. ¿Imanasqataq chayna ruwasqa kachkan? ¿Imaynatam servichikuchwan wasin-wasin predicaspanchik?
2. ¿Imapaqmi yanapawasun mosoq tratadokunapa sumaq rikchayninqa?
2 Imanasqam mosoq rikchayniyoq. Yaqa llapanpim wasin-wasin predicasqanchikqa allin kanqa, kay tawa kaqkunata ruwaptinchik: 1) rimayta qallarinapaqmi tapunanchik, 2) qawachinanchikmi Bibliapa ima nisqanta, 3) mayqan qellqanchiktapas leenanpaqmi munachinanchik hinaspa 4) huk tapukuytam saqenanchik kaqmanta watukuspanchik contestananchikpaq, manamá qonqananchikchu kaqmanta kutiytaqa. Kay mosoq tratadokunapa sumaq rikchayninmi yanapawasun kay tawa yanapakuykunata ruwanapaq.
3. ¿Imaynatam mosoq tratadokunata qochwan predicaspanchik?
3 Imaynatam servichikuna. Rimakuykuspam 1) qawachichwan qallariyninpi kaq tapukuyta hinaspam contestananta suyananchik, 2) tratadota kichaspam rimarichwan “¿Imatam Biblia nin?” nisqanmanta. Atikuptinqa otaq tiempon kaptinqa Bibliapim chay textota leepuchwan. Qawachichwantaqmi “¿Imapim kay nisqanqa yanapasunkiman?” niqtapas, 3) tratadota munachispam nichwan wakintapas leenanpaq, 4) manaraq pasakuchkaspayki qawachiy “Kaypi yuyaymanay” niqta, chayqa tukuynin paginapim kachkan hinaspa kallpanchakuy kutispayki Bibliawan chay tapukuyta kutichinaykipaq.
4. ¿Imaynatam mosoq tratadokunata servichikuchwan kaqmanta watukuspa?
4 Manam sasachu kaqmanta watukuypas. Tukuynin paginapi textokunatam servichikuchwan saqesqanchik tapukuyta kutichinapaq, hinaspam qawachichwan Diosmanta allin noticiakuna niq folletopa fotonta, chayqa tratadopim rikurin. Chay rimasqanchik yachachikuymanta astawan yachananpaqqa qawachichwanmi kikin folletopi hinaspam leeyta munaptinqa saqechwan. Chay folletowan qepakuptinqa, kaqmanta watukuspa kuska leenanchikpaqmi tanteananchik. Chaynapim estudio qoyta qallarisun. Folletota mana saqespanchikpas qochwanmi huk tratadota, chaynapi huk punchaw kutiptinchik estudianapaq.
5. ¿Imanasqataq ancha allin tratadokunawan predicayqa?
5 Tratadokunawanmi predicachkanchik 130 wata masninña. Sayayninwan rikchayninqa manam chaynallachu, ichaqa allintam yanapawanchik Diosmanta willakunapaq. Chaynaqa, kay mosoq rikchayniyoq tratadokunatayá allinta servichikusun runakunaman Bibliamanta yachachinanchikpaq (Prov. 15:7a).